Study
- Anukramaṇī
- Source
15 gaurivītiḥ śāktyaḥ| indraḥ, 9(prathamapādasya) uśanā vā| triṣṭup|
trya̍rya̱mā manu̍ṣo de̱vatā̍tā̱ trī ro̍ca̱nā di̱vyā dhā̍rayanta |
arca̍nti tvā ma̱ruta̍: pū̱tada̍kṣā̱stvame̍ṣā̱mṛṣi̍rindrāsi̱ dhīra̍:
||1||त्र्य॑र्य॒मा मनु॑षो दे॒वता॑ता॒ त्री रो॑च॒ना दि॒व्या धा॑रयन्त ।
अर्च॑न्ति त्वा म॒रुत॑: पू॒तद॑क्षा॒स्त्वमे॑षा॒मृषि॑रिन्द्रासि॒ धीर॑:
anu̱ yadī̍ṃ ma̱ruto̍ mandasā̱namārca̱nnindra̍ṃ papi̱vāṃsa̍ṃ su̱tasya̍ |
āda̍tta̱ vajra̍ma̱bhi yadahi̱ṃ hanna̱po ya̱hvīra̍sṛja̱t sarta̱vā u̍
||2||अनु॒ यदीं॑ म॒रुतो॑ मन्दसा॒नमार्च॒न्निन्द्रं॑ पपि॒वांसं॑ सु॒तस्य॑ ।
आद॑त्त॒ वज्र॑म॒भि यदहिं॒ हन्न॒पो य॒ह्वीर॑सृज॒त् सर्त॒वा उ॑
u̱ta bra̍hmāṇo maruto me a̱syendra̱: soma̍sya̱ suṣu̍tasya peyāḥ |
taddhi ha̱vyaṃ manu̍ṣe̱ gā avi̍nda̱daha̱nnahi̍ṃ papi̱vām̐ indro̍ asya
||3||उ॒त ब्र॑ह्माणो मरुतो मे अ॒स्येन्द्र॒: सोम॑स्य॒ सुषु॑तस्य पेयाः ।
तद्धि ह॒व्यं मनु॑षे॒ गा अवि॑न्द॒दह॒न्नहिं॑ पपि॒वाँ इन्द्रो॑ अस्य
ād roda̍sī vita̱raṃ vi ṣka̍bhāyat saṃvivyā̱naści̍d bhi̱yase̍ mṛ̱gaṃ ka̍: |
jiga̍rti̱mindro̍ apa̱jargu̍rāṇa̱: prati̍ śva̱santa̱mava̍ dāna̱vaṃ ha̍n
||4||आद् रोद॑सी वित॒रं वि ष्क॑भायत् संविव्या॒नश्चि॑द् भि॒यसे॑ मृ॒गं क॑: ।
जिग॑र्ति॒मिन्द्रो॑ अप॒जर्गु॑राण॒: प्रति॑ श्व॒सन्त॒मव॑ दान॒वं ह॑न्
adha̱ kratvā̍ maghava̱n tubhya̍ṃ de̱vā anu̱ viśve̍ adaduḥ soma̱peya̍m |
yat sūrya̍sya ha̱rita̱: pata̍ntīḥ pu̱raḥ sa̱tīrupa̍rā̱ eta̍śe̱ kaḥ
||5||अध॒ क्रत्वा॑ मघव॒न् तुभ्यं॑ दे॒वा अनु॒ विश्वे॑ अददुः सोम॒पेय॑म् ।
यत् सूर्य॑स्य ह॒रित॒: पत॑न्तीः पु॒रः स॒तीरुप॑रा॒ एत॑शे॒ कः
nava̱ yada̍sya nava̱tiṃ ca̍ bho̱gān tsā̱kaṃ vajre̍ṇa ma̱ghavā̍ vivṛ̱ścat |
arca̱ntīndra̍ṃ ma̱ruta̍: sa̱dhasthe̱ traiṣṭu̍bhena̱ vaca̍sā bādhata̱ dyām
||6||नव॒ यद॑स्य नव॒तिं च॑ भो॒गान् त्सा॒कं वज्रे॑ण म॒घवा॑ विवृ॒श्चत् ।
अर्च॒न्तीन्द्रं॑ म॒रुत॑: स॒धस्थे॒ त्रैष्टु॑भेन॒ वच॑सा बाधत॒ द्याम्
sakhā̱ sakhye̍ apaca̱t tūya̍ma̱gnira̱sya kratvā̍ mahi̱ṣā trī śa̱tāni̍ |
trī sā̱kamindro̱ manu̍ṣa̱: sarā̍ṃsi su̱taṃ pi̍bad vṛtra̱hatyā̍ya̱ soma̍m
||7||सखा॒ सख्ये॑ अपच॒त् तूय॑म॒ग्निर॒स्य क्रत्वा॑ महि॒षा त्री श॒तानि॑ ।
त्री सा॒कमिन्द्रो॒ मनु॑ष॒: सरां॑सि सु॒तं पि॑बद् वृत्र॒हत्या॑य॒ सोम॑म्
trī yaccha̱tā ma̍hi̱ṣāṇā̱magho̱ māstrī sarā̍ṃsi ma̱ghavā̍ so̱myāpā̍: |
kā̱raṃ na viśve̍ ahvanta de̱vā bhara̱mindrā̍ya̱ yadahi̍ṃ ja̱ghāna̍
||8||त्री यच्छ॒ता म॑हि॒षाणा॒मघो॒ मास्त्री सरां॑सि म॒घवा॑ सो॒म्यापा॑: ।
का॒रं न विश्वे॑ अह्वन्त दे॒वा भर॒मिन्द्रा॑य॒ यदहिं॑ ज॒घान॑
u̱śanā̱ yat sa̍ha̱syai̱3rayā̍taṃ gṛ̱hami̍ndra jūjuvā̱nebhi̱raśvai̍: |
va̱nvā̱no atra̍ sa̱ratha̍ṃ yayātha̱ kutse̍na de̱vairava̍norha̱ śuṣṇa̍m
||9||उ॒शना॒ यत् स॑ह॒स्यै॒३रया॑तं गृ॒हमि॑न्द्र जूजुवा॒नेभि॒रश्वै॑: ।
व॒न्वा॒नो अत्र॑ स॒रथं॑ ययाथ॒ कुत्से॑न दे॒वैरव॑नोर्ह॒ शुष्ण॑म्
prānyacca̱krama̍vṛha̱: sūrya̍sya̱ kutsā̍yā̱nyad vari̍vo̱ yāta̍ve'kaḥ |
a̱nāso̱ dasyū̍m̐ramṛṇo va̱dhena̱ ni du̍ryo̱ṇa ā̍vṛṇaṅ mṛ̱dhravā̍caḥ
||10||प्रान्यच्च॒क्रम॑वृह॒: सूर्य॑स्य॒ कुत्सा॑या॒न्यद् वरि॑वो॒ यात॑वेऽकः ।
अ॒नासो॒ दस्यूँ॑रमृणो व॒धेन॒ नि दु॑र्यो॒ण आ॑वृणङ् मृ॒ध्रवा॑चः
stomā̍sastvā̱ gauri̍vīteravardha̱nnara̍ndhayo vaidathi̱nāya̱ pipru̍m |
ā tvāmṛ̱jiśvā̍ sa̱khyāya̍ cakre̱ paca̍n pa̱ktīrapi̍ba̱: soma̍masya
||11||स्तोमा॑सस्त्वा॒ गौरि॑वीतेरवर्ध॒न्नर॑न्धयो वैदथि॒नाय॒ पिप्रु॑म् ।
आ त्वामृ॒जिश्वा॑ स॒ख्याय॑ चक्रे॒ पच॑न् प॒क्तीरपि॑ब॒: सोम॑मस्य
nava̍gvāsaḥ su̱taso̍māsa̱ indra̱ṃ daśa̍gvāso a̱bhya̍rcantya̱rkaiḥ |
gavya̍ṃ cidū̱rvama̍pi̱dhāna̍vanta̱ṃ taṃ ci̱nnara̍: śaśamā̱nā apa̍ vran
||12||नव॑ग्वासः सु॒तसो॑मास॒ इन्द्रं॒ दश॑ग्वासो अ॒भ्य॑र्चन्त्य॒र्कैः ।
गव्यं॑ चिदू॒र्वम॑पि॒धान॑वन्तं॒ तं चि॒न्नर॑: शशमा॒ना अप॑ व्रन्
ka̱tho nu te̱ pari̍ carāṇi vi̱dvān vī̱ryā̍ maghava̱n yā ca̱kartha̍ |
yā co̱ nu navyā̍ kṛ̱ṇava̍: śaviṣṭha̱ predu̱ tā te̍ vi̱dathe̍ṣu bravāma
||13||क॒थो नु ते॒ परि॑ चराणि वि॒द्वान् वी॒र्या॑ मघव॒न् या च॒कर्थ॑ ।
या चो॒ नु नव्या॑ कृ॒णव॑: शविष्ठ॒ प्रेदु॒ ता ते॑ वि॒दथे॑षु ब्रवाम
e̱tā viśvā̍ cakṛ̱vām̐ i̍ndra̱ bhūryapa̍rīto ja̱nuṣā̍ vī̱rye̍ṇa |
yā ci̱nnu va̍jrin kṛ̱ṇavo̍ dadhṛ̱ṣvān na te̍ va̱rtā tavi̍ṣyā asti̱ tasyā̍:
||14||ए॒ता विश्वा॑ चकृ॒वाँ इ॑न्द्र॒ भूर्यप॑रीतो ज॒नुषा॑ वी॒र्ये॑ण ।
या चि॒न्नु व॑ज्रिन् कृ॒णवो॑ दधृ॒ष्वान् न ते॑ व॒र्ता तवि॑ष्या अस्ति॒ तस्या॑:
indra̱ brahma̍ kri̱yamā̍ṇā juṣasva̱ yā te̍ śaviṣṭha̱ navyā̱ aka̍rma |
vastre̍va bha̱drā sukṛ̍tā vasū̱yū ratha̱ṃ na dhīra̱: svapā̍ atakṣam
||15||इन्द्र॒ ब्रह्म॑ क्रि॒यमा॑णा जुषस्व॒ या ते॑ शविष्ठ॒ नव्या॒ अक॑र्म ।
वस्त्रे॑व भ॒द्रा सुकृ॑ता वसू॒यू रथं॒ न धीर॒: स्वपा॑ अतक्षम्