Study
- Anukramaṇī
- Source
9 prājāpatyaḥ saṃvaraṇaḥ| indraḥ| jagatī, 9 triṣṭup|
ajā̍taśatruma̱jarā̱ sva̍rva̱tyanu̍ sva̱dhāmi̍tā da̱smamī̍yate |
su̱nota̍na̱ paca̍ta̱ brahma̍vāhase puruṣṭu̱tāya̍ prata̱raṃ da̍dhātana
||1||अजा॑तशत्रुम॒जरा॒ स्व॑र्व॒त्यनु॑ स्व॒धामि॑ता द॒स्ममी॑यते ।
सु॒नोत॑न॒ पच॑त॒ ब्रह्म॑वाहसे पुरुष्टु॒ताय॑ प्रत॒रं द॑धातन
ā yaḥ some̍na ja̱ṭhara̱mapi̍pra̱tā'ma̍ndata ma̱ghavā̱ madhvo̱ andha̍saḥ |
yadī̍ṃ mṛ̱gāya̱ hanta̍ve ma̱hāva̍dhaḥ sa̱hasra̍bhṛṣṭimu̱śanā̍ va̱dhaṃ yama̍t
||2||आ यः सोमे॑न ज॒ठर॒मपि॑प्र॒ताऽम॑न्दत म॒घवा॒ मध्वो॒ अन्ध॑सः ।
यदीं॑ मृ॒गाय॒ हन्त॑वे म॒हाव॑धः स॒हस्र॑भृष्टिमु॒शना॑ व॒धं यम॑त्
yo a̍smai ghra̱ṃsa u̱ta vā̱ ya ūdha̍ni̱ soma̍ṃ su̱noti̱ bhava̍ti dyu̱mām̐ aha̍ |
apā̍pa śa̱krasta̍ta̱nuṣṭi̍mūhati ta̱nūśu̍bhraṃ ma̱ghavā̱ yaḥ ka̍vāsa̱khaḥ
||3||यो अ॑स्मै घ्रं॒स उ॒त वा॒ य ऊध॑नि॒ सोमं॑ सु॒नोति॒ भव॑ति द्यु॒माँ अह॑ ।
अपा॑प श॒क्रस्त॑त॒नुष्टि॑मूहति त॒नूशु॑भ्रं म॒घवा॒ यः क॑वास॒खः
yasyāva̍dhīt pi̱tara̱ṃ yasya̍ mā̱tara̱ṃ yasya̍ śa̱kro bhrāta̍ra̱ṃ nāta̍ īṣate |
vetīdva̍sya̱ praya̍tā yataṃka̱ro na kilbi̍ṣādīṣate̱ vasva̍ āka̱raḥ
||4||यस्याव॑धीत् पि॒तरं॒ यस्य॑ मा॒तरं॒ यस्य॑ श॒क्रो भ्रात॑रं॒ नात॑ ईषते ।
वेतीद्व॑स्य॒ प्रय॑ता यतंक॒रो न किल्बि॑षादीषते॒ वस्व॑ आक॒रः
na pa̱ñcabhi̍rda̱śabhi̍rvaṣṭyā̱rabha̱ṃ nāsu̍nvatā sacate̱ puṣya̍tā ca̱na |
ji̱nāti̱ veda̍mu̱yā hanti̍ vā̱ dhuni̱rā de̍va̱yuṃ bha̍jati̱ goma̍ti vra̱je
||5||न प॒ञ्चभि॑र्द॒शभि॑र्वष्ट्या॒रभं॒ नासु॑न्वता सचते॒ पुष्य॑ता च॒न ।
जि॒नाति॒ वेद॑मु॒या हन्ति॑ वा॒ धुनि॒रा दे॑व॒युं भ॑जति॒ गोम॑ति व्र॒जे
vi̱tvakṣa̍ṇa̱: samṛ̍tau cakramāsa̱jo'su̍nvato̱ viṣu̍ṇaḥ sunva̱to vṛ̱dhaḥ |
indro̱ viśva̍sya dami̱tā vi̱bhīṣa̍ṇo yathāva̱śaṃ na̍yati̱ dāsa̱mārya̍:
||6||वि॒त्वक्ष॑ण॒: समृ॑तौ चक्रमास॒जोऽसु॑न्वतो॒ विषु॑णः सुन्व॒तो वृ॒धः ।
इन्द्रो॒ विश्व॑स्य दमि॒ता वि॒भीष॑णो यथाव॒शं न॑यति॒ दास॒मार्य॑:
samī̍ṃ pa̱ṇera̍jati̱ bhoja̍naṃ mu̱ṣe vi dā̱śuṣe̍ bhajati sū̱nara̱ṃ vasu̍ |
du̱rge ca̱na dhri̍yate̱ viśva̱ ā pu̱ru jano̱ yo a̍sya̱ tavi̍ṣī̱macu̍krudhat
||7||समीं॑ प॒णेर॑जति॒ भोज॑नं मु॒षे वि दा॒शुषे॑ भजति सू॒नरं॒ वसु॑ ।
दु॒र्गे च॒न ध्रि॑यते॒ विश्व॒ आ पु॒रु जनो॒ यो अ॑स्य॒ तवि॑षी॒मचु॑क्रुधत्
saṃ yajjanau̍ su̱dhanau̍ vi̱śvaśa̍rdhasā̱vave̱dindro̍ ma̱ghavā̱ goṣu̍ śu̱bhriṣu̍ |
yuja̱ṃ hya1nyamakṛ̍ta pravepa̱nyudī̱ṃ gavya̍ṃ sṛjate̱ satva̍bhi̱rdhuni̍:
||8||सं यज्जनौ॑ सु॒धनौ॑ वि॒श्वश॑र्धसा॒ववे॒दिन्द्रो॑ म॒घवा॒ गोषु॑ शु॒भ्रिषु॑ ।
युजं॒ ह्य१न्यमकृ॑त प्रवेप॒न्युदीं॒ गव्यं॑ सृजते॒ सत्व॑भि॒र्धुनि॑:
sa̱ha̱sra̱sāmāgni̍veśiṃ gṛṇīṣe̱ śatri̍magna upa̱māṃ ke̱tuma̱ryaḥ |
tasmā̱ āpa̍: sa̱ṃyata̍: pīpayanta̱ tasmi̍n kṣa̱tramama̍vat tve̱ṣama̍stu
||9||स॒ह॒स्र॒सामाग्नि॑वेशिं गृणीषे॒ शत्रि॑मग्न उप॒मां के॒तुम॒र्यः ।
तस्मा॒ आप॑: सं॒यत॑: पीपयन्त॒ तस्मि॑न् क्ष॒त्रमम॑वत् त्वे॒षम॑स्तु