Study
- Anukramaṇī
- Source
13 avasyurātreyaḥ| indraḥ, 8 tṛtīyapādasya kutso vā, caturthapādasya uśanā vā, 9 indrākutsau| triṣṭup|
indro̱ rathā̍ya pra̱vata̍ṃ kṛṇoti̱ yama̱dhyasthā̍nma̱ghavā̍ vāja̱yanta̍m |
yū̱theva̍ pa̱śvo vyu̍noti go̱pā ari̍ṣṭo yāti pratha̱maḥ siṣā̍san
||1||इन्द्रो॒ रथा॑य प्र॒वतं॑ कृणोति॒ यम॒ध्यस्था॑न्म॒घवा॑ वाज॒यन्त॑म् ।
यू॒थेव॑ प॒श्वो व्यु॑नोति गो॒पा अरि॑ष्टो याति प्रथ॒मः सिषा॑सन्
ā pra dra̍va harivo̱ mā vi ve̍na̱: piśa̍ṅgarāte a̱bhi na̍: sacasva |
na̱hi tvadi̍ndra̱ vasyo̍ a̱nyadastya̍me̱nām̐ści̱jjani̍vataścakartha
||2||आ प्र द्र॑व हरिवो॒ मा वि वे॑न॒: पिश॑ङ्गराते अ॒भि न॑: सचस्व ।
न॒हि त्वदि॑न्द्र॒ वस्यो॑ अ॒न्यदस्त्य॑मे॒नाँश्चि॒ज्जनि॑वतश्चकर्थ
udyat saha̱: saha̍sa̱ āja̍niṣṭa̱ dedi̍ṣṭa̱ indra̍ indri̱yāṇi̱ viśvā̍ |
prāco̍dayat su̱dughā̍ va̱vre a̱ntarvi jyoti̍ṣā saṃvavṛ̱tvat tamo̍'vaḥ
||3||उद्यत् सह॒: सह॑स॒ आज॑निष्ट॒ देदि॑ष्ट॒ इन्द्र॑ इन्द्रि॒याणि॒ विश्वा॑ ।
प्राचो॑दयत् सु॒दुघा॑ व॒व्रे अ॒न्तर्वि ज्योति॑षा संववृ॒त्वत् तमो॑ऽवः
ana̍vaste̱ ratha̱maśvā̍ya takṣa̱n tvaṣṭā̱ vajra̍ṃ puruhūta dyu̱manta̍m |
bra̱hmāṇa̱ indra̍ṃ ma̱haya̍nto a̱rkairava̍rdhaya̱nnaha̍ye̱ hanta̱vā u̍
||4||अन॑वस्ते॒ रथ॒मश्वा॑य तक्ष॒न् त्वष्टा॒ वज्रं॑ पुरुहूत द्यु॒मन्त॑म् ।
ब्र॒ह्माण॒ इन्द्रं॑ म॒हय॑न्तो अ॒र्कैरव॑र्धय॒न्नह॑ये॒ हन्त॒वा उ॑
vṛṣṇe̱ yat te̱ vṛṣa̍ṇo a̱rkamarcā̱nindra̱ grāvā̍ṇo̱ adi̍tiḥ sa̱joṣā̍: |
a̱na̱śvāso̱ ye pa̱vayo̍'ra̱thā indre̍ṣitā a̱bhyava̍rtanta̱ dasyū̍n
||5||वृष्णे॒ यत् ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑तिः स॒जोषा॑: ।
अ॒न॒श्वासो॒ ये प॒वयो॑ऽर॒था इन्द्रे॑षिता अ॒भ्यव॑र्तन्त॒ दस्यू॑न्
pra te̱ pūrvā̍ṇi̱ kara̍ṇāni voca̱ṃ pra nūta̍nā maghava̱n yā ca̱kartha̍ |
śaktī̍vo̱ yad vi̱bharā̱ roda̍sī u̱bhe jaya̍nna̱po mana̍ve̱ dānu̍citrāḥ
||6||प्र ते॒ पूर्वा॑णि॒ कर॑णानि वोचं॒ प्र नूत॑ना मघव॒न् या च॒कर्थ॑ ।
शक्ती॑वो॒ यद् वि॒भरा॒ रोद॑सी उ॒भे जय॑न्न॒पो मन॑वे॒ दानु॑चित्राः
tadinnu te̱ kara̍ṇaṃ dasma vi̱prā'hi̱ṃ yad ghnannojo̱ atrāmi̍mīthāḥ |
śuṣṇa̍sya ci̱t pari̍ mā̱yā a̍gṛbhṇāḥ prapi̱tvaṃ yannapa̱ dasyū̍m̐rasedhaḥ
||7||तदिन्नु ते॒ कर॑णं दस्म वि॒प्राऽहिं॒ यद् घ्नन्नोजो॒ अत्रामि॑मीथाः ।
शुष्ण॑स्य चि॒त् परि॑ मा॒या अ॑गृभ्णाः प्रपि॒त्वं यन्नप॒ दस्यूँ॑रसेधः
tvama̱po yada̍ve tu̱rvaśā̱yā'ra̍mayaḥ su̱dughā̍: pā̱ra i̍ndra |
u̱grama̍yāta̱mava̍ho ha̱ kutsa̱ṃ saṃ ha̱ yad vā̍mu̱śanāra̍nta de̱vāḥ
||8||त्वम॒पो यद॑वे तु॒र्वशा॒याऽर॑मयः सु॒दुघा॑: पा॒र इ॑न्द्र ।
उ॒ग्रम॑यात॒मव॑हो ह॒ कुत्सं॒ सं ह॒ यद् वा॑मु॒शनार॑न्त दे॒वाः
indrā̍kutsā̱ vaha̍mānā̱ rathe̱nā'' vā̱matyā̱ api̱ karṇe̍ vahantu |
niḥ ṣī̍ma̱dbhyo dhama̍tho̱ niḥ ṣa̱dhasthā̍n ma̱ghono̍ hṛ̱do va̍ratha̱stamā̍ṃsi
||9||इन्द्रा॑कुत्सा॒ वह॑माना॒ रथे॒नाऽऽ वा॒मत्या॒ अपि॒ कर्णे॑ वहन्तु ।
निः षी॑म॒द्भ्यो धम॑थो॒ निः ष॒धस्था॑न् म॒घोनो॑ हृ॒दो व॑रथ॒स्तमां॑सि
vāta̍sya yu̱ktān tsu̱yuja̍ści̱daśvā̍n ka̱viści̍de̱ṣo a̍jagannava̱syuḥ |
viśve̍ te̱ atra̍ ma̱ruta̱: sakhā̍ya̱ indra̱ brahmā̍ṇi̱ tavi̍ṣīmavardhan
||10||वात॑स्य यु॒क्तान् त्सु॒युज॑श्चि॒दश्वा॑न् क॒विश्चि॑दे॒षो अ॑जगन्नव॒स्युः ।
विश्वे॑ ते॒ अत्र॑ म॒रुत॒: सखा॑य॒ इन्द्र॒ ब्रह्मा॑णि॒ तवि॑षीमवर्धन्
sūra̍ści̱d ratha̱ṃ pari̍takmyāyā̱ṃ pūrva̍ṃ kara̱dupa̍raṃ jūju̱vāṃsa̍m |
bhara̍cca̱krameta̍śa̱: saṃ ri̍ṇāti pu̱ro dadha̍t saniṣyati̱ kratu̍ṃ naḥ
||11||सूर॑श्चि॒द् रथं॒ परि॑तक्म्यायां॒ पूर्वं॑ कर॒दुप॑रं जूजु॒वांस॑म् ।
भर॑च्च॒क्रमेत॑श॒: सं रि॑णाति पु॒रो दध॑त् सनिष्यति॒ क्रतुं॑ नः
āyaṃ ja̍nā abhi̱cakṣe̍ jagā̱mendra̱: sakhā̍yaṃ su̱taso̍mami̱cchan |
vada̱n grāvāva̱ vedi̍ṃ bhriyāte̱ yasya̍ jī̱rama̍dhva̱ryava̱ścara̍nti
||12||आयं ज॑ना अभि॒चक्षे॑ जगा॒मेन्द्र॒: सखा॑यं सु॒तसो॑ममि॒च्छन् ।
वद॒न् ग्रावाव॒ वेदिं॑ भ्रियाते॒ यस्य॑ जी॒रम॑ध्व॒र्यव॒श्चर॑न्ति
ye cā̱kana̍nta cā̱kana̍nta̱ nū te martā̍ amṛta̱ mo te aṃha̱ āra̍n |
vā̱va̱ndhi yajyū̍m̐ru̱ta teṣu̍ dhe̱hyojo̱ jane̍ṣu̱ yeṣu̍ te̱ syāma̍
||13||ये चा॒कन॑न्त चा॒कन॑न्त॒ नू ते मर्ता॑ अमृत॒ मो ते अंह॒ आर॑न् ।
वा॒व॒न्धि यज्यूँ॑रु॒त तेषु॑ धे॒ह्योजो॒ जने॑षु॒ येषु॑ ते॒ स्याम॑