Study
- Anukramaṇī
- Source
5 svastyātreyaḥ| viśve devāḥ| anuṣṭup, 5 paṅktiḥ|
viśvo̍ de̱vasya̍ ne̱turmarto̍ vurīta sa̱khyam |
viśvo̍ rā̱ya i̍ṣudhyati dyu̱mnaṃ vṛ̍ṇīta pu̱ṣyase̍
||1||विश्वो॑ दे॒वस्य॑ ने॒तुर्मर्तो॑ वुरीत स॒ख्यम् ।
विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॑
te te̍ deva neta̱rye ce̱mām̐ a̍nu̱śase̍ |
te rā̱yā te hyā̱3pṛce̱ sace̍mahi saca̱thyai̍:
||2||ते ते॑ देव नेत॒र्ये चे॒माँ अ॑नु॒शसे॑ ।
ते रा॒या ते ह्या॒३पृचे॒ सचे॑महि सच॒थ्यै॑:
ato̍ na̱ ā nṝnati̍thī̱nata̱: patnī̍rdaśasyata |
ā̱re viśva̍ṃ pathe̱ṣṭhāṃ dvi̱ṣo yu̍yotu̱ yūyu̍viḥ
||3||अतो॑ न॒ आ नॄनति॑थी॒नत॒: पत्नी॑र्दशस्यत ।
आ॒रे विश्वं॑ पथे॒ष्ठां द्वि॒षो यु॑योतु॒ यूयु॑विः
yatra̱ vahni̍ra̱bhihi̍to du̱drava̱d droṇya̍: pa̱śuḥ |
nṛ̱maṇā̍ vī̱rapa̱styo'rṇā̱ dhīre̍va̱ sani̍tā
||4||यत्र॒ वह्नि॑र॒भिहि॑तो दु॒द्रव॒द् द्रोण्य॑: प॒शुः ।
नृ॒मणा॑ वी॒रप॒स्त्योऽर्णा॒ धीरे॑व॒ सनि॑ता
e̱ṣa te̍ deva netā̱ ratha̱spati̱: śaṃ ra̱yiḥ |
śaṃ rā̱ye śaṃ sva̱staya̍ iṣa̱:stuto̍ manāmahe deva̱stuto̍ manāmahe
||5||ए॒ष ते॑ देव नेता॒ रथ॒स्पति॒: शं र॒यिः ।
शं रा॒ये शं स्व॒स्तय॑ इष॒:स्तुतो॑ मनामहे देव॒स्तुतो॑ मनामहे