Study
- Anukramaṇī
- Source
11 vasuśruta ātreyaḥ| āprīsūktaṃ- (1 idhmaḥ samiddho'gnirvā, 2 narāśaṃsaḥ, 3 il̤aḥ, 4 barhiḥ, 5 devīrdvāraḥ, 6 uṣāsāktā, 7daivyo hotārau pracetasau, 8 tisro devyaḥ sarasvatīl̤ābhāratyaḥ, 9tvaṣṭā, 10 vanaspatiḥ, 11 svāhākṛtayaḥ )|gāyatrī|
susa̍middhāya śo̱ciṣe̍ ghṛ̱taṃ tī̱vraṃ ju̍hotana | a̱gnaye̍ jā̱tave̍dase
||1||सुस॑मिद्धाय शो॒चिषे॑ घृ॒तं ती॒व्रं जु॑होतन । अ॒ग्नये॑ जा॒तवे॑दसे
narā̱śaṃsa̍: suṣūdatī̱maṃ ya̱jñamadā̍bhyaḥ | ka̱virhi madhu̍hastyaḥ
||2||नरा॒शंस॑: सुषूदती॒मं य॒ज्ञमदा॑भ्यः । क॒विर्हि मधु॑हस्त्यः
ī̱l̤i̱to a̍gna̱ ā va̱hendra̍ṃ ci̱trami̱ha pri̱yam | su̱khai rathe̍bhirū̱taye̍
||3||ई॒ळि॒तो अ॑ग्न॒ आ व॒हेन्द्रं॑ चि॒त्रमि॒ह प्रि॒यम् । सु॒खै रथे॑भिरू॒तये॑
ūrṇa̍mradā̱ vi pra̍thasvā̱bhya1rkā a̍nūṣata | bhavā̍ naḥ śubhra sā̱taye̍
||4||ऊर्ण॑म्रदा॒ वि प्र॑थस्वा॒भ्य१र्का अ॑नूषत । भवा॑ नः शुभ्र सा॒तये॑
devī̍rdvāro̱ vi śra̍yadhvaṃ suprāya̱ṇā na̍ ū̱taye̍ | prapra̍ ya̱jñaṃ pṛ̍ṇītana
||5||देवी॑र्द्वारो॒ वि श्र॑यध्वं सुप्राय॒णा न॑ ऊ॒तये॑ । प्रप्र॑ य॒ज्ञं पृ॑णीतन
su̱pratī̍ke vayo̱vṛdhā̍ ya̱hvī ṛ̱tasya̍ mā̱tarā̍ | do̱ṣāmu̱ṣāsa̍mīmahe
||6||सु॒प्रती॑के वयो॒वृधा॑ य॒ह्वी ऋ॒तस्य॑ मा॒तरा॑ । दो॒षामु॒षास॑मीमहे
vāta̍sya̱ patma̍nnīl̤i̱tā daivyā̱ hotā̍rā̱ manu̍ṣaḥ | i̱maṃ no̍ ya̱jñamā ga̍tam
||7||वात॑स्य॒ पत्म॑न्नीळि॒ता दैव्या॒ होता॑रा॒ मनु॑षः । इ॒मं नो॑ य॒ज्ञमा ग॑तम्
il̤ā̱ sara̍svatī ma̱hī ti̱sro de̱vīrma̍yo̱bhuva̍: | ba̱rhiḥ sī̍dantva̱sridha̍:
||8||इळा॒ सर॑स्वती म॒ही ति॒स्रो दे॒वीर्म॑यो॒भुव॑: । ब॒र्हिः सी॑दन्त्व॒स्रिध॑:
śi̱vastva̍ṣṭari̱hā ga̍hi vi̱bhuḥ poṣa̍ u̱ta tmanā̍ | ya̱jñeya̍jñe na̱ uda̍va
||9||शि॒वस्त्व॑ष्टरि॒हा ग॑हि वि॒भुः पोष॑ उ॒त त्मना॑ । य॒ज्ञेय॑ज्ञे न॒ उद॑व
yatra̱ vettha̍ vanaspate de̱vānā̱ṃ guhyā̱ nāmā̍ni | tatra̍ ha̱vyāni̍ gāmaya
||10||यत्र॒ वेत्थ॑ वनस्पते दे॒वानां॒ गुह्या॒ नामा॑नि । तत्र॑ ह॒व्यानि॑ गामय
svāhā̱gnaye̱ varu̍ṇāya̱ svāhendrā̍ya ma̱rudbhya̍: | svāhā̍ de̱vebhyo̍ ha̱viḥ
||11||स्वाहा॒ग्नये॒ वरु॑णाय॒ स्वाहेन्द्रा॑य म॒रुद्भ्य॑: । स्वाहा॑ दे॒वेभ्यो॑ ह॒विः