Study
- Anukramaṇī
- Source
5 pūrurātreyaḥ| agniḥ| anuṣṭup, 5 paṃktiḥ|
bṛ̱had vayo̱ hi bhā̱nave'rcā̍ de̱vāyā̱gnaye̍ |
yaṃ mi̱traṃ na praśa̍stibhi̱rmartā̍so dadhi̱re pu̱raḥ
||1||बृ॒हद् वयो॒ हि भा॒नवेऽर्चा॑ दे॒वाया॒ग्नये॑ ।
यं मि॒त्रं न प्रश॑स्तिभि॒र्मर्ता॑सो दधि॒रे पु॒रः
sa hi dyubhi̱rjanā̍nā̱ṃ hotā̱ dakṣa̍sya bā̱hvoḥ |
vi ha̱vyama̱gnirā̍nu̱ṣagbhago̱ na vāra̍mṛṇvati
||2||स हि द्युभि॒र्जना॑नां॒ होता॒ दक्ष॑स्य बा॒ह्वोः ।
वि ह॒व्यम॒ग्निरा॑नु॒षग्भगो॒ न वार॑मृण्वति
a̱sya stome̍ ma̱ghona̍: sa̱khye vṛ̱ddhaśo̍ciṣaḥ |
viśvā̱ yasmi̍n tuvi̱ṣvaṇi̱ sama̱rye śuṣma̍māda̱dhuḥ
||3||अ॒स्य स्तोमे॑ म॒घोन॑: स॒ख्ये वृ॒द्धशो॑चिषः ।
विश्वा॒ यस्मि॑न् तुवि॒ष्वणि॒ सम॒र्ये शुष्म॑माद॒धुः
adhā̱ hya̍gna eṣāṃ su̱vīrya̍sya ma̱ṃhanā̍ |
tamid ya̱hvaṃ na roda̍sī̱ pari̱ śravo̍ babhūvatuḥ
||4||अधा॒ ह्य॑ग्न एषां सु॒वीर्य॑स्य मं॒हना॑ ।
तमिद् य॒ह्वं न रोद॑सी॒ परि॒ श्रवो॑ बभूवतुः
nū na̱ ehi̱ vārya̱magne̍ gṛṇā̱na ā bha̍ra |
ye va̱yaṃ ye ca̍ sū̱raya̍: sva̱sti dhāma̍he̱ saco̱taidhi̍ pṛ̱tsu no̍ vṛ̱dhe
||5||नू न॒ एहि॒ वार्य॒मग्ने॑ गृणा॒न आ भ॑र ।
ये व॒यं ये च॑ सू॒रय॑: स्व॒स्ति धाम॑हे॒ सचो॒तैधि॑ पृ॒त्सु नो॑ वृ॒धे