Study
- Anukramaṇī
- Source
9 vasūyava ātreyāḥ| agniḥ | anuṣṭup|
acchā̍ vo a̱gnimava̍se de̱vaṃ gā̍si̱ sa no̱ vasu̍: |
rāsa̍t pu̱tra ṛ̍ṣū̱ṇāmṛ̱tāvā̍ parṣati dvi̱ṣaḥ
||1||अच्छा॑ वो अ॒ग्निमव॑से दे॒वं गा॑सि॒ स नो॒ वसु॑: ।
रास॑त् पु॒त्र ऋ॑षू॒णामृ॒तावा॑ पर्षति द्वि॒षः
sa hi sa̱tyo yaṃ pūrve̍ cid de̱vāsa̍ści̱d yamī̍dhi̱re |
hotā̍raṃ ma̱ndraji̍hva̱mit su̍dī̱tibhi̍rvi̱bhāva̍sum
||2||स हि स॒त्यो यं पूर्वे॑ चिद् दे॒वास॑श्चि॒द् यमी॑धि॒रे ।
होता॑रं म॒न्द्रजि॑ह्व॒मित् सु॑दी॒तिभि॑र्वि॒भाव॑सुम्
sa no̍ dhī̱tī vari̍ṣṭhayā̱ śreṣṭha̍yā ca suma̱tyā |
agne̍ rā̱yo di̍dīhi naḥ suvṛ̱ktibhi̍rvareṇya
||3||स नो॑ धी॒ती वरि॑ष्ठया॒ श्रेष्ठ॑या च सुम॒त्या ।
अग्ने॑ रा॒यो दि॑दीहि नः सुवृ॒क्तिभि॑र्वरेण्य
a̱gnirde̱veṣu̍ rājatya̱gnirmarte̍ṣvāvi̱śan |
a̱gnirno̍ havya̱vāha̍no̱'gniṃ dhī̱bhiḥ sa̍paryata
||4||अ॒ग्निर्दे॒वेषु॑ राजत्य॒ग्निर्मर्ते॑ष्वावि॒शन् ।
अ॒ग्निर्नो॑ हव्य॒वाह॑नो॒ऽग्निं धी॒भिः स॑पर्यत
a̱gnistu̱viśra̍vastamaṃ tu̱vibra̍hmāṇamutta̱mam |
a̱tūrta̍ṃ śrāva̱yatpa̍tiṃ pu̱traṃ da̍dāti dā̱śuṣe̍
||5||अ॒ग्निस्तु॒विश्र॑वस्तमं तु॒विब्र॑ह्माणमुत्त॒मम् ।
अ॒तूर्तं॑ श्राव॒यत्प॑तिं पु॒त्रं द॑दाति दा॒शुषे॑
a̱gnirda̍dāti̱ satpa̍tiṃ sā̱sāha̱ yo yu̱dhā nṛbhi̍: |
a̱gniratya̍ṃ raghu̱ṣyada̱ṃ jetā̍ra̱mapa̍rājitam
||6||अ॒ग्निर्द॑दाति॒ सत्प॑तिं सा॒साह॒ यो यु॒धा नृभि॑: ।
अ॒ग्निरत्यं॑ रघु॒ष्यदं॒ जेता॑र॒मप॑राजितम्
yad vāhi̍ṣṭha̱ṃ tada̱gnaye̍ bṛ̱hada̍rca vibhāvaso |
mahi̍ṣīva̱ tvad ra̱yistvad vājā̱ udī̍rate
||7||यद् वाहि॑ष्ठं॒ तद॒ग्नये॑ बृ॒हद॑र्च विभावसो ।
महि॑षीव॒ त्वद् र॒यिस्त्वद् वाजा॒ उदी॑रते
tava̍ dyu̱manto̍ a̱rcayo̱ grāve̍vocyate bṛ̱hat |
u̱to te̍ tanya̱turya̍thā svā̱no a̍rta̱ tmanā̍ di̱vaḥ
||8||तव॑ द्यु॒मन्तो॑ अ॒र्चयो॒ ग्रावे॑वोच्यते बृ॒हत् ।
उ॒तो ते॑ तन्य॒तुर्य॑था स्वा॒नो अ॑र्त॒ त्मना॑ दि॒वः
e̱vām̐ a̱gniṃ va̍sū̱yava̍: sahasā̱naṃ va̍vandima |
sa no̱ viśvā̱ ati̱ dviṣa̱: parṣa̍nnā̱veva̍ su̱kratu̍:
||9||ए॒वाँ अ॒ग्निं व॑सू॒यव॑: सहसा॒नं व॑वन्दिम ।
स नो॒ विश्वा॒ अति॒ द्विष॒: पर्ष॑न्ना॒वेव॑ सु॒क्रतु॑: