Sūktam 63 — yamatra (7 mantras) — Śākala Saṃhitā (Ṛgveda)

Study

ṛta̍sya gopā̱vadhi̍ tiṣṭhatho̱ ratha̱ṃ satya̍dharmāṇā para̱me vyo̍mani |

yamatra̍ mitrāvaru̱ṇāva̍tho yu̱vaṃ tasmai̍ vṛ̱ṣṭirmadhu̍mat pinvate di̱vaḥ

||1||

ऋत॑स्य गोपा॒वधि॑ तिष्ठथो॒ रथं॒ सत्य॑धर्माणा पर॒मे व्यो॑मनि ।

यमत्र॑ मित्रावरु॒णाव॑थो यु॒वं तस्मै॑ वृ॒ष्टिर्मधु॑मत् पिन्वते दि॒वः

sa̱mrājā̍va̱sya bhuva̍nasya rājatho̱ mitrā̍varuṇā vi̱dathe̍ sva̱rdṛśā̍ |

vṛ̱ṣṭiṃ vā̱ṃ rādho̍ amṛta̱tvamī̍mahe̱ dyāvā̍pṛthi̱vī vi ca̍ranti ta̱nyava̍:

||2||

स॒म्राजा॑व॒स्य भुव॑नस्य राजथो॒ मित्रा॑वरुणा वि॒दथे॑ स्व॒र्दृशा॑ ।

वृ॒ष्टिं वां॒ राधो॑ अमृत॒त्वमी॑महे॒ द्यावा॑पृथि॒वी वि च॑रन्ति त॒न्यव॑:

sa̱mrājā̍ u̱grā vṛ̍ṣa̱bhā di̱vaspatī̍ pṛthi̱vyā mi̱trāvaru̍ṇā̱ vica̍rṣaṇī |

ci̱trebhi̍ra̱bhrairupa̍ tiṣṭhatho̱ rava̱ṃ dyāṃ va̍rṣayatho̱ asu̍rasya mā̱yayā̍

||3||

स॒म्राजा॑ उ॒ग्रा वृ॑ष॒भा दि॒वस्पती॑ पृथि॒व्या मि॒त्रावरु॑णा॒ विच॑र्षणी ।

चि॒त्रेभि॑र॒भ्रैरुप॑ तिष्ठथो॒ रवं॒ द्यां व॑र्षयथो॒ असु॑रस्य मा॒यया॑

mā̱yā vā̍ṃ mitrāvaruṇā di̱vi śri̱tā sūryo̱ jyoti̍ścarati ci̱tramāyu̍dham |

tama̱bhreṇa̍ vṛ̱ṣṭyā gū̍hatho di̱vi parja̍nya dra̱psā madhu̍manta īrate

||4||

मा॒या वां॑ मित्रावरुणा दि॒वि श्रि॒ता सूर्यो॒ ज्योति॑श्चरति चि॒त्रमायु॑धम् ।

तम॒भ्रेण॑ वृ॒ष्ट्या गू॑हथो दि॒वि पर्ज॑न्य द्र॒प्सा मधु॑मन्त ईरते

ratha̍ṃ yuñjate ma̱ruta̍: śu̱bhe su̱khaṃ śūro̱ na mi̍trāvaruṇā̱ gavi̍ṣṭiṣu |

rajā̍ṃsi ci̱trā vi ca̍ranti ta̱nyavo̍ di̱vaḥ sa̍mrājā̱ paya̍sā na ukṣatam

||5||

रथं॑ युञ्जते म॒रुत॑: शु॒भे सु॒खं शूरो॒ न मि॑त्रावरुणा॒ गवि॑ष्टिषु ।

रजां॑सि चि॒त्रा वि च॑रन्ति त॒न्यवो॑ दि॒वः स॑म्राजा॒ पय॑सा न उक्षतम्

vāca̱ṃ su mi̍trāvaruṇā̱virā̍vatīṃ pa̱rjanya̍ści̱trāṃ va̍dati̱ tviṣī̍matīm |

a̱bhrā va̍sata ma̱ruta̱: su mā̱yayā̱ dyāṃ va̍rṣayatamaru̱ṇāma̍re̱pasa̍m

||6||

वाचं॒ सु मि॑त्रावरुणा॒विरा॑वतीं प॒र्जन्य॑श्चि॒त्रां व॑दति॒ त्विषी॑मतीम् ।

अ॒भ्रा व॑सत म॒रुत॒: सु मा॒यया॒ द्यां व॑र्षयतमरु॒णाम॑रे॒पस॑म्

dharma̍ṇā mitrāvaruṇā vipaścitā vra̱tā ra̍kṣethe̱ asu̍rasya mā̱yayā̍ |

ṛ̱tena̱ viśva̱ṃ bhuva̍na̱ṃ vi rā̍jatha̱: sūrya̱mā dha̍ttho di̱vi citrya̱ṃ ratha̍m

||7||

धर्म॑णा मित्रावरुणा विपश्चिता व्र॒ता र॑क्षेथे॒ असु॑रस्य मा॒यया॑ ।

ऋ॒तेन॒ विश्वं॒ भुव॑नं॒ वि रा॑जथ॒: सूर्य॒मा ध॑त्थो दि॒वि चित्र्यं॒ रथ॑म्