Study
- Anukramaṇī
- Source
6 viśvavārātreyī| agniḥ| 1, 3 triṣṭup, 2 jagatī, 4 anuṣṭup, 5-6 gāyatrī|
sami̍ddho a̱gnirdi̱vi śo̱cira̍śret pra̱tyaṅṅu̱ṣasa̍murvi̱yā vi bhā̍ti |
eti̱ prācī̍ vi̱śvavā̍rā̱ namo̍bhirde̱vām̐ īl̤ā̍nā ha̱viṣā̍ ghṛ̱tācī̍
||1||समि॑द्धो अ॒ग्निर्दि॒वि शो॒चिर॑श्रेत् प्र॒त्यङ्ङु॒षस॑मुर्वि॒या वि भा॑ति ।
एति॒ प्राची॑ वि॒श्ववा॑रा॒ नमो॑भिर्दे॒वाँ ईळा॑ना ह॒विषा॑ घृ॒ताची॑
sa̱mi̱dhyamā̍no a̱mṛta̍sya rājasi ha̱viṣkṛ̱ṇvanta̍ṃ sacase sva̱staye̍ |
viśva̱ṃ sa dha̍tte̱ dravi̍ṇa̱ṃ yaminva̍syāti̱thyama̍gne̱ ni ca̍ dhatta̱ it pu̱raḥ
||2||स॒मि॒ध्यमा॑नो अ॒मृत॑स्य राजसि ह॒विष्कृ॒ण्वन्तं॑ सचसे स्व॒स्तये॑ ।
विश्वं॒ स ध॑त्ते॒ द्रवि॑णं॒ यमिन्व॑स्याति॒थ्यम॑ग्ने॒ नि च॑ धत्त॒ इत् पु॒रः
agne̱ śardha̍ maha̱te saubha̍gāya̱ tava̍ dyu̱mnānyu̍tta̱māni̍ santu |
saṃ jā̍spa̱tyaṃ su̱yama̱mā kṛ̍ṇuṣva śatrūya̱tāma̱bhi ti̍ṣṭhā̱ mahā̍ṃsi
||3||अग्ने॒ शर्ध॑ मह॒ते सौभ॑गाय॒ तव॑ द्यु॒म्नान्यु॑त्त॒मानि॑ सन्तु ।
सं जा॑स्प॒त्यं सु॒यम॒मा कृ॑णुष्व शत्रूय॒ताम॒भि ति॑ष्ठा॒ महां॑सि
sami̍ddhasya̱ prama̍ha̱so'gne̱ vande̱ tava̱ śriya̍m |
vṛ̱ṣa̱bho dyu̱mnavā̍m̐ asi̱ sama̍dhva̱reṣvi̍dhyase
||4||समि॑द्धस्य॒ प्रम॑ह॒सोऽग्ने॒ वन्दे॒ तव॒ श्रिय॑म् ।
वृ॒ष॒भो द्यु॒म्नवाँ॑ असि॒ सम॑ध्व॒रेष्वि॑ध्यसे
sami̍ddho agna āhuta de̱vān ya̍kṣi svadhvara | tvaṃ hi ha̍vya̱vāl̤asi̍
||5||समि॑द्धो अग्न आहुत दे॒वान् य॑क्षि स्वध्वर । त्वं हि ह॑व्य॒वाळसि॑
ā ju̍hotā duva̱syatā̱'gniṃ pra̍ya̱tya̍dhva̱re | vṛ̱ṇī̱dhvaṃ ha̍vya̱vāha̍nam
||6||आ जु॑होता दुव॒स्यता॒ऽग्निं प्र॑य॒त्य॑ध्व॒रे । वृ॒णी॒ध्वं ह॑व्य॒वाह॑नम्