Study
- Anukramaṇī
- Source
12 vasuśruta ātreyaḥ| agniḥ, 3 marudrudraviṣṇavaḥ| triṣṭup, 1 virāṭ|
tvama̍gne̱ varu̍ṇo̱ jāya̍se̱ yattvaṃ mi̱tro bha̍vasi̱ yatsami̍ddhaḥ |
tve viśve̍ sahasasputra de̱vāstvamindro̍ dā̱śuṣe̱ martyā̍ya
||1||त्वम॑ग्ने॒ वरु॑णो॒ जाय॑से॒ यत्त्वं मि॒त्रो भ॑वसि॒ यत्समि॑द्धः ।
त्वे विश्वे॑ सहसस्पुत्र दे॒वास्त्वमिन्द्रो॑ दा॒शुषे॒ मर्त्या॑य
tvama̍rya̱mā bha̍vasi̱ yat ka̱nīnā̱ṃ nāma̍ svadhāva̱n guhya̍ṃ bibharṣi |
a̱ñjanti̍ mi̱traṃ sudhi̍ta̱ṃ na gobhi̱ryad dampa̍tī̱ sama̍nasā kṛ̱ṇoṣi̍
||2||त्वम॑र्य॒मा भ॑वसि॒ यत् क॒नीनां॒ नाम॑ स्वधाव॒न् गुह्यं॑ बिभर्षि ।
अ॒ञ्जन्ति॑ मि॒त्रं सुधि॑तं॒ न गोभि॒र्यद् दम्प॑ती॒ सम॑नसा कृ॒णोषि॑
tava̍ śri̱ye ma̱ruto̍ marjayanta̱ rudra̱ yat te̱ jani̍ma̱ cāru̍ ci̱tram |
pa̱daṃ yad viṣṇo̍rupa̱maṃ ni̱dhāyi̱ tena̍ pāsi̱ guhya̱ṃ nāma̱ gonā̍m
||3||तव॑ श्रि॒ये म॒रुतो॑ मर्जयन्त॒ रुद्र॒ यत् ते॒ जनि॑म॒ चारु॑ चि॒त्रम् ।
प॒दं यद् विष्णो॑रुप॒मं नि॒धायि॒ तेन॑ पासि॒ गुह्यं॒ नाम॒ गोना॑म्
tava̍ śri̱yā su̱dṛśo̍ deva de̱vāḥ pu̱rū dadhā̍nā a̱mṛta̍ṃ sapanta |
hotā̍rama̱gniṃ manu̍ṣo̱ ni ṣe̍durdaśa̱syanta̍ u̱śija̱: śaṃsa̍mā̱yoḥ
||4||तव॑ श्रि॒या सु॒दृशो॑ देव दे॒वाः पु॒रू दधा॑ना अ॒मृतं॑ सपन्त ।
होता॑रम॒ग्निं मनु॑षो॒ नि षे॑दुर्दश॒स्यन्त॑ उ॒शिज॒: शंस॑मा॒योः
na tvaddhotā̱ pūrvo̍ agne̱ yajī̍yā̱n na kāvyai̍: pa̱ro a̍sti svadhāvaḥ |
vi̱śaśca̱ yasyā̱ ati̍thi̱rbhavā̍si̱ sa ya̱jñena̍ vanavad deva̱ martā̍n
||5||न त्वद्धोता॒ पूर्वो॑ अग्ने॒ यजी॑या॒न् न काव्यै॑: प॒रो अ॑स्ति स्वधावः ।
वि॒शश्च॒ यस्या॒ अति॑थि॒र्भवा॑सि॒ स य॒ज्ञेन॑ वनवद् देव॒ मर्ता॑न्
va̱yama̍gne vanuyāma̱ tvotā̍ vasū̱yavo̍ ha̱viṣā̱ budhya̍mānāḥ |
va̱yaṃ sa̍ma̱rye vi̱dathe̱ṣvahnā̍ṃ va̱yaṃ rā̱yā sa̍hasasputra̱ martā̍n
||6||व॒यम॑ग्ने वनुयाम॒ त्वोता॑ वसू॒यवो॑ ह॒विषा॒ बुध्य॑मानाः ।
व॒यं स॑म॒र्ये वि॒दथे॒ष्वह्नां॑ व॒यं रा॒या स॑हसस्पुत्र॒ मर्ता॑न्
yo na̱ āgo̍ a̱bhyeno̱ bharā̱tyadhīda̱ghama̱ghaśa̍ṃse dadhāta |
ja̱hī ci̍kitvo a̱bhiśa̍stime̱tāmagne̱ yo no̍ ma̱rcaya̍ti dva̱yena̍
||7||यो न॒ आगो॑ अ॒भ्येनो॒ भरा॒त्यधीद॒घम॒घशं॑से दधात ।
ज॒ही चि॑कित्वो अ॒भिश॑स्तिमे॒तामग्ने॒ यो नो॑ म॒र्चय॑ति द्व॒येन॑
tvāma̱syā vyuṣi̍ deva̱ pūrve̍ dū̱taṃ kṛ̍ṇvā̱nā a̍yajanta ha̱vyaiḥ |
sa̱ṃsthe yada̍gna̱ īya̍se rayī̱ṇāṃ de̱vo martai̱rvasu̍bhiri̱dhyamā̍naḥ
||8||त्वाम॒स्या व्युषि॑ देव॒ पूर्वे॑ दू॒तं कृ॑ण्वा॒ना अ॑यजन्त ह॒व्यैः ।
सं॒स्थे यद॑ग्न॒ ईय॑से रयी॒णां दे॒वो मर्तै॒र्वसु॑भिरि॒ध्यमा॑नः
ava̍ spṛdhi pi̱tara̱ṃ yodhi̍ vi̱dvān pu̱tro yaste̍ sahasaḥ sūna ū̱he |
ka̱dā ci̍kitvo a̱bhi ca̍kṣase̱ no'gne̍ ka̱dām̐ ṛ̍ta̱cid yā̍tayāse
||9||अव॑ स्पृधि पि॒तरं॒ योधि॑ वि॒द्वान् पु॒त्रो यस्ते॑ सहसः सून ऊ॒हे ।
क॒दा चि॑कित्वो अ॒भि च॑क्षसे॒ नोऽग्ने॑ क॒दाँ ऋ॑त॒चिद् या॑तयासे
bhūri̱ nāma̱ vanda̍māno dadhāti pi̱tā va̍so̱ yadi̱ tajjo̱ṣayā̍se |
ku̱vid de̱vasya̱ saha̍sā cakā̱naḥ su̱mnama̱gnirva̍nate vāvṛdhā̱naḥ
||10||भूरि॒ नाम॒ वन्द॑मानो दधाति पि॒ता व॑सो॒ यदि॒ तज्जो॒षया॑से ।
कु॒विद् दे॒वस्य॒ सह॑सा चका॒नः सु॒म्नम॒ग्निर्व॑नते वावृधा॒नः
tvama̱ṅga ja̍ri̱tāra̍ṃ yaviṣṭha̱ viśvā̍nyagne duri̱tāti̍ parṣi |
ste̱nā a̍dṛśran ri̱pavo̱ janā̱so'jñā̍taketā vṛji̱nā a̍bhūvan
||11||त्वम॒ङ्ग ज॑रि॒तारं॑ यविष्ठ॒ विश्वा॑न्यग्ने दुरि॒ताति॑ पर्षि ।
स्ते॒ना अ॑दृश्रन् रि॒पवो॒ जना॒सोऽज्ञा॑तकेता वृजि॒ना अ॑भूवन्
i̱me yāmā̍sastva̱driga̍bhūva̱n vasa̍ve vā̱ tadidāgo̍ avāci |
nāhā̱yama̱gnira̱bhiśa̍staye no̱ na rīṣa̍te vāvṛdhā̱naḥ parā̍ dāt
||12||इ॒मे यामा॑सस्त्व॒द्रिग॑भूव॒न् वस॑वे वा॒ तदिदागो॑ अवाचि ।
नाहा॒यम॒ग्निर॒भिश॑स्तये नो॒ न रीष॑ते वावृधा॒नः परा॑ दात्