Study
- Anukramaṇī
- Source
8 śyāvāśva ātreyaḥ| marutaḥ| jagatī, 7-8 triṣṭup|
ā ru̍drāsa̱ indra̍vantaḥ sa̱joṣa̍so̱ hira̍ṇyarathāḥ suvi̱tāya̍ gantana |
i̱yaṃ vo̍ a̱smat prati̍ haryate ma̱tistṛ̱ṣṇaje̱ na di̱va utsā̍ uda̱nyave̍
||1||आ रु॑द्रास॒ इन्द्र॑वन्तः स॒जोष॑सो॒ हिर॑ण्यरथाः सुवि॒ताय॑ गन्तन ।
इ॒यं वो॑ अ॒स्मत् प्रति॑ हर्यते म॒तिस्तृ॒ष्णजे॒ न दि॒व उत्सा॑ उद॒न्यवे॑
vāśī̍manta ṛṣṭi̱manto̍ manī̱ṣiṇa̍: su̱dhanvā̍na̱ iṣu̍manto niṣa̱ṅgiṇa̍: |
svaśvā̍: stha su̱rathā̍: pṛśnimātaraḥ svāyu̱dhā ma̍ruto yāthanā̱ śubha̍m
||2||वाशी॑मन्त ऋष्टि॒मन्तो॑ मनी॒षिण॑: सु॒धन्वा॑न॒ इषु॑मन्तो निष॒ङ्गिण॑: ।
स्वश्वा॑: स्थ सु॒रथा॑: पृश्निमातरः स्वायु॒धा म॑रुतो याथना॒ शुभ॑म्
dhū̱nu̱tha dyāṃ parva̍tān dā̱śuṣe̱ vasu̱ ni vo̱ vanā̍ jihate̱ yāma̍no bhi̱yā |
ko̱paya̍tha pṛthi̱vīṃ pṛ̍śnimātaraḥ śu̱bhe yadu̍grā̱: pṛṣa̍tī̱rayu̍gdhvam
||3||धू॒नु॒थ द्यां पर्व॑तान् दा॒शुषे॒ वसु॒ नि वो॒ वना॑ जिहते॒ याम॑नो भि॒या ।
को॒पय॑थ पृथि॒वीं पृ॑श्निमातरः शु॒भे यदु॑ग्रा॒: पृष॑ती॒रयु॑ग्ध्वम्
vāta̍tviṣo ma̱ruto̍ va̱rṣani̍rṇijo ya̱mā i̍va̱ susa̍dṛśaḥ su̱peśa̍saḥ |
pi̱śaṅgā̍śvā aru̱ṇāśvā̍ are̱pasa̱: pratva̍kṣaso mahi̱nā dyauri̍vo̱rava̍:
||4||वात॑त्विषो म॒रुतो॑ व॒र्षनि॑र्णिजो य॒मा इ॑व॒ सुस॑दृशः सु॒पेश॑सः ।
पि॒शङ्गा॑श्वा अरु॒णाश्वा॑ अरे॒पस॒: प्रत्व॑क्षसो महि॒ना द्यौरि॑वो॒रव॑:
pu̱ru̱dra̱psā a̍ñji̱manta̍: su̱dāna̍vastve̱ṣasa̍ṃdṛśo anava̱bhrarā̍dhasaḥ |
su̱jā̱tāso̍ ja̱nuṣā̍ ru̱kmava̍kṣaso di̱vo a̱rkā a̱mṛta̱ṃ nāma̍ bhejire
||5||पु॒रु॒द्र॒प्सा अ॑ञ्जि॒मन्त॑: सु॒दान॑वस्त्वे॒षसं॑दृशो अनव॒भ्ररा॑धसः ।
सु॒जा॒तासो॑ ज॒नुषा॑ रु॒क्मव॑क्षसो दि॒वो अ॒र्का अ॒मृतं॒ नाम॑ भेजिरे
ṛ̱ṣṭayo̍ vo maruto̱ aṃsa̍yo̱radhi̱ saha̱ ojo̍ bā̱hvorvo̱ bala̍ṃ hi̱tam |
nṛ̱mṇā śī̱rṣasvāyu̍dhā̱ rathe̍ṣu vo̱ viśvā̍ va̱: śrīradhi̍ ta̱nūṣu̍ pipiśe
||6||ऋ॒ष्टयो॑ वो मरुतो॒ अंस॑यो॒रधि॒ सह॒ ओजो॑ बा॒ह्वोर्वो॒ बलं॑ हि॒तम् ।
नृ॒म्णा शी॒र्षस्वायु॑धा॒ रथे॑षु वो॒ विश्वा॑ व॒: श्रीरधि॑ त॒नूषु॑ पिपिशे
goma̱daśvā̍va̱d ratha̍vat su̱vīra̍ṃ ca̱ndrava̱d rādho̍ maruto dadā naḥ |
praśa̍stiṃ naḥ kṛṇuta rudriyāso bhakṣī̱ya vo'va̍so̱ daivya̍sya
||7||गोम॒दश्वा॑व॒द् रथ॑वत् सु॒वीरं॑ च॒न्द्रव॒द् राधो॑ मरुतो ददा नः ।
प्रश॑स्तिं नः कृणुत रुद्रियासो भक्षी॒य वोऽव॑सो॒ दैव्य॑स्य
ha̱ye naro̱ maru̍to mṛ̱l̤atā̍ na̱stuvī̍maghāso̱ amṛ̍tā̱ ṛta̍jñāḥ |
satya̍śruta̱: kava̍yo̱ yuvā̍no̱ bṛha̍dgirayo bṛ̱hadu̱kṣamā̍ṇāḥ
||8||ह॒ये नरो॒ मरु॑तो मृ॒ळता॑ न॒स्तुवी॑मघासो॒ अमृ॑ता॒ ऋत॑ज्ञाः ।
सत्य॑श्रुत॒: कव॑यो॒ युवा॑नो॒ बृह॑द्गिरयो बृ॒हदु॒क्षमा॑णाः