Study
- Anukramaṇī
- Source
8 prabhūvasurāṅgirasaḥ| indraḥ | anuṣṭup, 8 paṅktiḥ|
yaste̱ sādhi̱ṣṭho'va̍sa̱ indra̱ kratu̱ṣṭamā bha̍ra |
a̱smabhya̍ṃ carṣaṇī̱saha̱ṃ sasni̱ṃ vāje̍ṣu du̱ṣṭara̍m
||1||यस्ते॒ साधि॒ष्ठोऽव॑स॒ इन्द्र॒ क्रतु॒ष्टमा भ॑र ।
अ॒स्मभ्यं॑ चर्षणी॒सहं॒ सस्निं॒ वाजे॑षु दु॒ष्टर॑म्
yadi̍ndra te̱ cata̍sro̱ yacchū̍ra̱ santi̍ ti̱sraḥ |
yad vā̱ pañca̍ kṣitī̱nāmava̱stat su na̱ ā bha̍ra
||2||यदि॑न्द्र ते॒ चत॑स्रो॒ यच्छू॑र॒ सन्ति॑ ति॒स्रः ।
यद् वा॒ पञ्च॑ क्षिती॒नामव॒स्तत् सु न॒ आ भ॑र
ā te'vo̱ vare̍ṇya̱ṃ vṛṣa̍ntamasya hūmahe |
vṛṣa̍jūti̱rhi ja̍jñi̱ṣa ā̱bhūbhi̍rindra tu̱rvaṇi̍:
||3||आ तेऽवो॒ वरे॑ण्यं॒ वृष॑न्तमस्य हूमहे ।
वृष॑जूति॒र्हि ज॑ज्ञि॒ष आ॒भूभि॑रिन्द्र तु॒र्वणि॑:
vṛṣā̱ hyasi̱ rādha̍se jajñi̱ṣe vṛṣṇi̍ te̱ śava̍: |
svakṣa̍traṃ te dhṛ̱ṣanmana̍: satrā̱hami̍ndra̱ pauṃsya̍m
||4||वृषा॒ ह्यसि॒ राध॑से जज्ञि॒षे वृष्णि॑ ते॒ शव॑: ।
स्वक्ष॑त्रं ते धृ॒षन्मन॑: सत्रा॒हमि॑न्द्र॒ पौंस्य॑म्
tvaṃ tami̍ndra̱ martya̍mamitra̱yanta̍madrivaḥ |
sa̱rva̱ra̱thā śa̍takrato̱ ni yā̍hi śavasaspate
||5||त्वं तमि॑न्द्र॒ मर्त्य॑ममित्र॒यन्त॑मद्रिवः ।
स॒र्व॒र॒था श॑तक्रतो॒ नि या॑हि शवसस्पते
tvāmid vṛ̍trahantama̱ janā̍so vṛ̱ktaba̍rhiṣaḥ |
u̱graṃ pū̱rvīṣu̍ pū̱rvyaṃ hava̍nte̱ vāja̍sātaye
||6||त्वामिद् वृ॑त्रहन्तम॒ जना॑सो वृ॒क्तब॑र्हिषः ।
उ॒ग्रं पू॒र्वीषु॑ पू॒र्व्यं हव॑न्ते॒ वाज॑सातये
a̱smāka̍mindra du̱ṣṭara̍ṃ puro̱yāvā̍namā̱jiṣu̍ |
sa̱yāvā̍na̱ṃ dhane̍dhane vāja̱yanta̍mavā̱ ratha̍m
||7||अ॒स्माक॑मिन्द्र दु॒ष्टरं॑ पुरो॒यावा॑नमा॒जिषु॑ ।
स॒यावा॑नं॒ धने॑धने वाज॒यन्त॑मवा॒ रथ॑म्
a̱smāka̍mi̱ndrehi̍ no̱ ratha̍mavā̱ pura̍ṃdhyā |
va̱yaṃ śa̍viṣṭha̱ vārya̍ṃ di̱vi śravo̍ dadhīmahi di̱vi stoma̍ṃ manāmahe
||8||अ॒स्माक॑मि॒न्द्रेहि॑ नो॒ रथ॑मवा॒ पुरं॑ध्या ।
व॒यं श॑विष्ठ॒ वार्यं॑ दि॒वि श्रवो॑ दधीमहि दि॒वि स्तोमं॑ मनामहे