Study
- Anukramaṇī
- Source
10 śyāvāśva ātreyaḥ| marutaḥ| jagatī, 10 triṣṭup |
praya̍jyavo ma̱ruto̱ bhrāja̍dṛṣṭayo bṛ̱had vayo̍ dadhire ru̱kmava̍kṣasaḥ |
īya̍nte̱ aśvai̍: su̱yame̍bhirā̱śubhi̱: śubha̍ṃ yā̱tāmanu̱ rathā̍ avṛtsata
||1||प्रय॑ज्यवो म॒रुतो॒ भ्राज॑दृष्टयो बृ॒हद् वयो॑ दधिरे रु॒क्मव॑क्षसः ।
ईय॑न्ते॒ अश्वै॑: सु॒यमे॑भिरा॒शुभि॒: शुभं॑ या॒तामनु॒ रथा॑ अवृत्सत
sva̱yaṃ da̍dhidhve̱ tavi̍ṣī̱ṃ yathā̍ vi̱da bṛ̱hanma̍hānta urvi̱yā vi rā̍jatha |
u̱tāntari̍kṣaṃ mamire̱ vyoja̍sā̱ śubha̍ṃ yā̱tāmanu̱ rathā̍ avṛtsata
||2||स्व॒यं द॑धिध्वे॒ तवि॑षीं॒ यथा॑ वि॒द बृ॒हन्म॑हान्त उर्वि॒या वि रा॑जथ ।
उ॒तान्तरि॑क्षं ममिरे॒ व्योज॑सा॒ शुभं॑ या॒तामनु॒ रथा॑ अवृत्सत
sā̱kaṃ jā̱tāḥ su̱bhva̍: sā̱kamu̍kṣi̱tāḥ śri̱ye ci̱dā pra̍ta̱raṃ vā̍vṛdhu̱rnara̍: |
vi̱ro̱kiṇa̱: sūrya̍syeva ra̱śmaya̱: śubha̍ṃ yā̱tāmanu̱ rathā̍ avṛtsata
||3||सा॒कं जा॒ताः सु॒भ्व॑: सा॒कमु॑क्षि॒ताः श्रि॒ये चि॒दा प्र॑त॒रं वा॑वृधु॒र्नर॑: ।
वि॒रो॒किण॒: सूर्य॑स्येव र॒श्मय॒: शुभं॑ या॒तामनु॒ रथा॑ अवृत्सत
ā̱bhū̱ṣeṇya̍ṃ vo maruto mahitva̱naṃ di̍dṛ̱kṣeṇya̱ṃ sūrya̍syeva̱ cakṣa̍ṇam |
u̱to a̱smām̐ a̍mṛta̱tve da̍dhātana̱ śubha̍ṃ yā̱tāmanu̱ rathā̍ avṛtsata
||4||आ॒भू॒षेण्यं॑ वो मरुतो महित्व॒नं दि॑दृ॒क्षेण्यं॒ सूर्य॑स्येव॒ चक्ष॑णम् ।
उ॒तो अ॒स्माँ अ॑मृत॒त्वे द॑धातन॒ शुभं॑ या॒तामनु॒ रथा॑ अवृत्सत
udī̍rayathā marutaḥ samudra̱to yū̱yaṃ vṛ̱ṣṭiṃ va̍rṣayathā purīṣiṇaḥ |
na vo̍ dasrā̱ upa̍ dasyanti dhe̱nava̱: śubha̍ṃ yā̱tāmanu̱ rathā̍ avṛtsata
||5||उदी॑रयथा मरुतः समुद्र॒तो यू॒यं वृ॒ष्टिं व॑र्षयथा पुरीषिणः ।
न वो॑ दस्रा॒ उप॑ दस्यन्ति धे॒नव॒: शुभं॑ या॒तामनु॒ रथा॑ अवृत्सत
yadaśvā̍n dhū̱rṣu pṛṣa̍tī̱rayu̍gdhvaṃ hira̱ṇyayā̱n pratyatkā̱m̐ amu̍gdhvam |
viśvā̱ it spṛdho̍ maruto̱ vya̍syatha̱ śubha̍ṃ yā̱tāmanu̱ rathā̍ avṛtsata
||6||यदश्वा॑न् धू॒र्षु पृष॑ती॒रयु॑ग्ध्वं हिर॒ण्यया॒न् प्रत्यत्काँ॒ अमु॑ग्ध्वम् ।
विश्वा॒ इत् स्पृधो॑ मरुतो॒ व्य॑स्यथ॒ शुभं॑ या॒तामनु॒ रथा॑ अवृत्सत
na parva̍tā̱ na na̱dyo̍ varanta vo̱ yatrāci̍dhvaṃ maruto̱ gaccha̱thedu̱ tat |
u̱ta dyāvā̍pṛthi̱vī yā̍thanā̱ pari̱ śubha̍ṃ yā̱tāmanu̱ rathā̍ avṛtsata
||7||न पर्व॑ता॒ न न॒द्यो॑ वरन्त वो॒ यत्राचि॑ध्वं मरुतो॒ गच्छ॒थेदु॒ तत् ।
उ॒त द्यावा॑पृथि॒वी या॑थना॒ परि॒ शुभं॑ या॒तामनु॒ रथा॑ अवृत्सत
yat pū̱rvyaṃ ma̍ruto̱ yacca̱ nūta̍na̱ṃ yadu̱dyate̍ vasavo̱ yacca̍ śa̱syate̍ |
viśva̍sya̱ tasya̍ bhavathā̱ nave̍dasa̱: śubha̍ṃ yā̱tāmanu̱ rathā̍ avṛtsata
||8||यत् पू॒र्व्यं म॑रुतो॒ यच्च॒ नूत॑नं॒ यदु॒द्यते॑ वसवो॒ यच्च॑ श॒स्यते॑ ।
विश्व॑स्य॒ तस्य॑ भवथा॒ नवे॑दस॒: शुभं॑ या॒तामनु॒ रथा॑ अवृत्सत
mṛ̱l̤ata̍ no maruto̱ mā va̍dhiṣṭanā̱'smabhya̱ṃ śarma̍ bahu̱laṃ vi ya̍ntana |
adhi̍ sto̱trasya̍ sa̱khyasya̍ gātana̱ śubha̍ṃ yā̱tāmanu̱ rathā̍ avṛtsata
||9||मृ॒ळत॑ नो मरुतो॒ मा व॑धिष्टना॒ऽस्मभ्यं॒ शर्म॑ बहु॒लं वि य॑न्तन ।
अधि॑ स्तो॒त्रस्य॑ स॒ख्यस्य॑ गातन॒ शुभं॑ या॒तामनु॒ रथा॑ अवृत्सत
yū̱yama̱smān na̍yata̱ vasyo̱ acchā̱ nira̍ṃha̱tibhyo̍ maruto gṛṇā̱nāḥ |
ju̱ṣadhva̍ṃ no ha̱vyadā̍tiṃ yajatrā va̱yaṃ syā̍ma̱ pata̍yo rayī̱ṇām
||10||यू॒यम॒स्मान् न॑यत॒ वस्यो॒ अच्छा॒ निरं॑ह॒तिभ्यो॑ मरुतो गृणा॒नाः ।
जु॒षध्वं॑ नो ह॒व्यदा॑तिं यजत्रा व॒यं स्या॑म॒ पत॑यो रयी॒णाम्