Study
- Anukramaṇī
- Source
15 babhrurātreyaḥ| indraḥ, 12-15 ṛṇaṃcayendrau| triṣṭup|
kva1 sya vī̱raḥ ko a̍paśya̱dindra̍ṃ su̱khara̍tha̱mīya̍māna̱ṃ hari̍bhyām |
yo rā̱yā va̱jrī su̱taso̍mami̱cchan tadoko̱ gantā̍ puruhū̱ta ū̱tī
||1||क्व१ स्य वी॒रः को अ॑पश्य॒दिन्द्रं॑ सु॒खर॑थ॒मीय॑मानं॒ हरि॑भ्याम् ।
यो रा॒या व॒ज्री सु॒तसो॑ममि॒च्छन् तदोको॒ गन्ता॑ पुरुहू॒त ऊ॒ती
avā̍cacakṣaṃ pa̱dama̍sya sa̱svaru̱graṃ ni̍dhā̱turanvā̍yami̱cchan |
apṛ̍cchama̱nyām̐ u̱ta te ma̍ āhu̱rindra̱ṃ naro̍ bubudhā̱nā a̍śema
||2||अवा॑चचक्षं प॒दम॑स्य स॒स्वरु॒ग्रं नि॑धा॒तुरन्वा॑यमि॒च्छन् ।
अपृ॑च्छम॒न्याँ उ॒त ते म॑ आहु॒रिन्द्रं॒ नरो॑ बुबुधा॒ना अ॑शेम
pra nu va̱yaṃ su̱te yā te̍ kṛ̱tānīndra̱ bravā̍ma̱ yāni̍ no̱ jujo̍ṣaḥ |
veda̱davi̍dvāñchṛ̱ṇava̍cca vi̱dvān vaha̍te̱'yaṃ ma̱ghavā̱ sarva̍senaḥ
||3||प्र नु व॒यं सु॒ते या ते॑ कृ॒तानीन्द्र॒ ब्रवा॑म॒ यानि॑ नो॒ जुजो॑षः ।
वेद॒दवि॑द्वाञ्छृ॒णव॑च्च वि॒द्वान् वह॑ते॒ऽयं म॒घवा॒ सर्व॑सेनः
sthi̱raṃ mana̍ścakṛṣe jā̱ta i̍ndra̱ veṣīdeko̍ yu̱dhaye̱ bhūya̍saścit |
aśmā̍naṃ ci̱cchava̍sā didyuto̱ vi vi̱do gavā̍mū̱rvamu̱sriyā̍ṇām
||4||स्थि॒रं मन॑श्चकृषे जा॒त इ॑न्द्र॒ वेषीदेको॑ यु॒धये॒ भूय॑सश्चित् ।
अश्मा॑नं चि॒च्छव॑सा दिद्युतो॒ वि वि॒दो गवा॑मू॒र्वमु॒स्रिया॑णाम्
pa̱ro yat tvaṃ pa̍ra̱ma ā̱jani̍ṣṭhāḥ parā̱vati̱ śrutya̱ṃ nāma̱ bibhra̍t |
ata̍ści̱dindrā̍dabhayanta de̱vā viśvā̍ a̱po a̍jayad dā̱sapa̍tnīḥ
||5||प॒रो यत् त्वं प॑र॒म आ॒जनि॑ष्ठाः परा॒वति॒ श्रुत्यं॒ नाम॒ बिभ्र॑त् ।
अत॑श्चि॒दिन्द्रा॑दभयन्त दे॒वा विश्वा॑ अ॒पो अ॑जयद् दा॒सप॑त्नीः
tubhyede̱te ma̱ruta̍: su̱śevā̱ arca̍ntya̱rkaṃ su̱nvantyandha̍: |
ahi̍mohā̱nama̱pa ā̱śayā̍na̱ṃ pra mā̱yābhi̍rmā̱yina̍ṃ sakṣa̱dindra̍:
||6||तुभ्येदे॒ते म॒रुत॑: सु॒शेवा॒ अर्च॑न्त्य॒र्कं सु॒न्वन्त्यन्ध॑: ।
अहि॑मोहा॒नम॒प आ॒शया॑नं॒ प्र मा॒याभि॑र्मा॒यिनं॑ सक्ष॒दिन्द्र॑:
vi ṣū mṛdho̍ ja̱nuṣā̱ dāna̱minva̱nnaha̱n gavā̍ maghavan tsaṃcakā̱naḥ |
atrā̍ dā̱sasya̱ namu̍ce̱: śiro̱ yadava̍rtayo̱ mana̍ve gā̱tumi̱cchan
||7||वि षू मृधो॑ ज॒नुषा॒ दान॒मिन्व॒न्नह॒न् गवा॑ मघवन् त्संचका॒नः ।
अत्रा॑ दा॒सस्य॒ नमु॑चे॒: शिरो॒ यदव॑र्तयो॒ मन॑वे गा॒तुमि॒च्छन्
yuja̱ṃ hi māmakṛ̍thā̱ ādidi̍ndra̱ śiro̍ dā̱sasya̱ namu̍cermathā̱yan |
aśmā̍naṃ cit sva̱ryaṃ1 varta̍māna̱ṃ pra ca̱kriye̍va̱ roda̍sī ma̱rudbhya̍:
||8||युजं॒ हि मामकृ॑था॒ आदिदि॑न्द्र॒ शिरो॑ दा॒सस्य॒ नमु॑चेर्मथा॒यन् ।
अश्मा॑नं चित् स्व॒र्यं१ वर्त॑मानं॒ प्र च॒क्रिये॑व॒ रोद॑सी म॒रुद्भ्य॑:
striyo̱ hi dā̱sa āyu̍dhāni ca̱kre kiṃ mā̍ karannaba̱lā a̍sya̱ senā̍: |
a̱ntarhyakhya̍du̱bhe a̍sya̱ dhene̱ athopa̱ praidyu̱ yu̱dhaye̱ dasyu̱mindra̍:
||9||स्त्रियो॒ हि दा॒स आयु॑धानि च॒क्रे किं मा॑ करन्नब॒ला अ॑स्य॒ सेना॑: ।
अ॒न्तर्ह्यख्य॑दु॒भे अ॑स्य॒ धेने॒ अथोप॒ प्रैद्यु॒ यु॒धये॒ दस्यु॒मिन्द्र॑:
samatra̱ gāvo̱'bhito̍'navante̱heha̍ va̱tsairviyu̍tā̱ yadāsa̍n |
saṃ tā indro̍ asṛjadasya śā̱kairyadī̱ṃ somā̍sa̱: suṣu̍tā̱ ama̍ndan
||10||समत्र॒ गावो॒ऽभितो॑ऽनवन्ते॒हेह॑ व॒त्सैर्वियु॑ता॒ यदास॑न् ।
सं ता इन्द्रो॑ असृजदस्य शा॒कैर्यदीं॒ सोमा॑स॒: सुषु॑ता॒ अम॑न्दन्
yadī̱ṃ somā̍ ba̱bhrudhū̍tā̱ ama̍nda̱nnaro̍ravīd vṛṣa̱bhaḥ sāda̍neṣu |
pu̱ra̱ṃda̱raḥ pa̍pi̱vām̐ indro̍ asya̱ puna̱rgavā̍madadādu̱sriyā̍ṇām
||11||यदीं॒ सोमा॑ ब॒भ्रुधू॑ता॒ अम॑न्द॒न्नरो॑रवीद् वृष॒भः साद॑नेषु ।
पु॒रं॒द॒रः प॑पि॒वाँ इन्द्रो॑ अस्य॒ पुन॒र्गवा॑मददादु॒स्रिया॑णाम्
bha̱drami̱daṃ ru̱śamā̍ agne akra̱n gavā̍ṃ ca̱tvāri̱ dada̍taḥ sa̱hasrā̍ |
ṛ̱ṇa̱ṃca̱yasya̱ praya̍tā ma̱ghāni̱ pratya̍grabhīṣma̱ nṛta̍masya nṛ̱ṇām
||12||भ॒द्रमि॒दं रु॒शमा॑ अग्ने अक्र॒न् गवां॑ च॒त्वारि॒ दद॑तः स॒हस्रा॑ ।
ऋ॒णं॒च॒यस्य॒ प्रय॑ता म॒घानि॒ प्रत्य॑ग्रभीष्म॒ नृत॑मस्य नृ॒णाम्
su̱peśa̍sa̱ṃ māva̍ sṛja̱ntyasta̱ṃ gavā̍ṃ sa̱hasrai̍ ru̱śamā̍so agne |
tī̱vrā indra̍mamamanduḥ su̱tāso̱'ktorvyu̍ṣṭau̱ pari̍takmyāyāḥ
||13||सु॒पेश॑सं॒ माव॑ सृज॒न्त्यस्तं॒ गवां॑ स॒हस्रै॑ रु॒शमा॑सो अग्ने ।
ती॒व्रा इन्द्र॑मममन्दुः सु॒तासो॒ऽक्तोर्व्यु॑ष्टौ॒ परि॑तक्म्यायाः
auccha̱t sā rātrī̱ pari̍takmyā̱ yām̐ ṛ̍ṇaṃca̱ye rāja̍ni ru̱śamā̍nām |
atyo̱ na vā̱jī ra̱ghura̱jyamā̍no ba̱bhruśca̱tvārya̍sanat sa̱hasrā̍
||14||औच्छ॒त् सा रात्री॒ परि॑तक्म्या॒ याँ ऋ॑णंच॒ये राज॑नि रु॒शमा॑नाम् ।
अत्यो॒ न वा॒जी र॒घुर॒ज्यमा॑नो ब॒भ्रुश्च॒त्वार्य॑सनत् स॒हस्रा॑
catu̍:sahasra̱ṃ gavya̍sya pa̱śvaḥ pratya̍grabhīṣma ru̱śame̍ṣvagne |
gha̱rmaści̍t ta̱ptaḥ pra̱vṛje̱ ya āsī̍daya̱smaya̱stamvādā̍ma̱ viprā̍:
||15||चतु॑:सहस्रं॒ गव्य॑स्य प॒श्वः प्रत्य॑ग्रभीष्म रु॒शमे॑ष्वग्ने ।
घ॒र्मश्चि॑त् त॒प्तः प्र॒वृजे॒ य आसी॑दय॒स्मय॒स्तम्वादा॑म॒ विप्रा॑: