Study
- Anukramaṇī
- Source
10 vasuśruta ātreyaḥ| agniḥ| paṃktiḥ|
a̱gniṃ taṃ ma̍nye̱ yo vasu̱rasta̱ṃ yaṃ yanti̍ dhe̱nava̍: |
asta̱marva̍nta ā̱śavo'sta̱ṃ nityā̍so vā̱jina̱ iṣa̍ṃ sto̱tṛbhya̱ ā bha̍ra
||1||अ॒ग्निं तं म॑न्ये॒ यो वसु॒रस्तं॒ यं यन्ति॑ धे॒नव॑: ।
अस्त॒मर्व॑न्त आ॒शवोऽस्तं॒ नित्या॑सो वा॒जिन॒ इषं॑ स्तो॒तृभ्य॒ आ भ॑र
so a̱gniryo vasu̍rgṛ̱ṇe saṃ yamā̱yanti̍ dhe̱nava̍: |
samarva̍nto raghu̱druva̱: saṃ su̍jā̱tāsa̍: sū̱raya̱ iṣa̍ṃ sto̱tṛbhya̱ ā bha̍ra
||2||सो अ॒ग्निर्यो वसु॑र्गृ॒णे सं यमा॒यन्ति॑ धे॒नव॑: ।
समर्व॑न्तो रघु॒द्रुव॒: सं सु॑जा॒तास॑: सू॒रय॒ इषं॑ स्तो॒तृभ्य॒ आ भ॑र
a̱gnirhi vā̱jina̍ṃ vi̱śe dadā̍ti vi̱śvaca̍rṣaṇiḥ |
a̱gnī rā̱ye svā̱bhuva̱ṃ sa prī̱to yā̍ti̱ vārya̱miṣa̍ṃ sto̱tṛbhya̱ ā bha̍ra
||3||अ॒ग्निर्हि वा॒जिनं॑ वि॒शे ददा॑ति वि॒श्वच॑र्षणिः ।
अ॒ग्नी रा॒ये स्वा॒भुवं॒ स प्री॒तो या॑ति॒ वार्य॒मिषं॑ स्तो॒तृभ्य॒ आ भ॑र
ā te̍ agna idhīmahi dyu̱manta̍ṃ devā̱jara̍m |
yaddha̱ syā te̱ panī̍yasī sa̱mid dī̱daya̍ti̱ dyavīṣa̍ṃ sto̱tṛbhya̱ ā bha̍ra
||4||आ ते॑ अग्न इधीमहि द्यु॒मन्तं॑ देवा॒जर॑म् ।
यद्ध॒ स्या ते॒ पनी॑यसी स॒मिद् दी॒दय॑ति॒ द्यवीषं॑ स्तो॒तृभ्य॒ आ भ॑र
ā te̍ agna ṛ̱cā ha̱viḥ śukra̍sya śociṣaspate |
suśca̍ndra̱ dasma̱ viśpa̍te̱ havya̍vā̱ṭ tubhya̍ṃ hūyata̱ iṣa̍ṃ sto̱tṛbhya̱ ā bha̍ra
||5||आ ते॑ अग्न ऋ॒चा ह॒विः शुक्र॑स्य शोचिषस्पते ।
सुश्च॑न्द्र॒ दस्म॒ विश्प॑ते॒ हव्य॑वा॒ट् तुभ्यं॑ हूयत॒ इषं॑ स्तो॒तृभ्य॒ आ भ॑र
pro tye a̱gnayo̱'gniṣu̱ viśva̍ṃ puṣyanti̱ vārya̍m |
te hi̍nvire̱ ta i̍nvire̱ ta i̍ṣaṇyantyānu̱ṣagiṣa̍ṃ sto̱tṛbhya̱ ā bha̍ra
||6||प्रो त्ये अ॒ग्नयो॒ऽग्निषु॒ विश्वं॑ पुष्यन्ति॒ वार्य॑म् ।
ते हि॑न्विरे॒ त इ॑न्विरे॒ त इ॑षण्यन्त्यानु॒षगिषं॑ स्तो॒तृभ्य॒ आ भ॑र
tava̱ tye a̍gne a̱rcayo̱ mahi̍ vrādhanta vā̱jina̍: |
ye patva̍bhiḥ śa̱phānā̍ṃ vra̱jā bhu̱ranta̱ gonā̱miṣa̍ṃ sto̱tṛbhya̱ ā bha̍ra
||7||तव॒ त्ये अ॑ग्ने अ॒र्चयो॒ महि॑ व्राधन्त वा॒जिन॑: ।
ये पत्व॑भिः श॒फानां॑ व्र॒जा भु॒रन्त॒ गोना॒मिषं॑ स्तो॒तृभ्य॒ आ भ॑र
navā̍ no agna̱ ā bha̍ra sto̱tṛbhya̍: sukṣi̱tīriṣa̍: |
te syā̍ma̱ ya ā̍nṛ̱custvādū̍tāso̱ dame̍dama̱ iṣa̍ṃ sto̱tṛbhya̱ ā bha̍ra
||8||नवा॑ नो अग्न॒ आ भ॑र स्तो॒तृभ्य॑: सुक्षि॒तीरिष॑: ।
ते स्या॑म॒ य आ॑नृ॒चुस्त्वादू॑तासो॒ दमे॑दम॒ इषं॑ स्तो॒तृभ्य॒ आ भ॑र
u̱bhe su̍ścandra sa̱rpiṣo̱ darvī̍ śrīṇīṣa ā̱sani̍ |
u̱to na̱ ut pu̍pūryā u̱ktheṣu̍ śavasaspata̱ iṣa̍ṃ sto̱tṛbhya̱ ā bha̍ra
||9||उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ ।
उ॒तो न॒ उत् पु॑पूर्या उ॒क्थेषु॑ शवसस्पत॒ इषं॑ स्तो॒तृभ्य॒ आ भ॑र
e̱vām̐ a̱gnima̍juryamurgī̱rbhirya̱jñebhi̍rānu̱ṣak |
dadha̍da̱sme su̱vīrya̍mu̱ta tyadā̱śvaśvya̱miṣa̍ṃ sto̱tṛbhya̱ ā bha̍ra
||10||ए॒वाँ अ॒ग्निम॑जुर्यमुर्गी॒र्भिर्य॒ज्ञेभि॑रानु॒षक् ।
दध॑द॒स्मे सु॒वीर्य॑मु॒त त्यदा॒श्वश्व्य॒मिषं॑ स्तो॒तृभ्य॒ आ भ॑र