Sūktam 75 — stotā (9 mantras) — Śākala Saṃhitā (Ṛgveda)

Study

prati̍ pri̱yata̍ma̱ṃ ratha̱ṃ vṛṣa̍ṇaṃ vasu̱vāha̍nam |

sto̱tā vā̍maśvinā̱vṛṣi̱: stome̍na̱ prati̍ bhūṣati̱ mādhvī̱ mama̍ śruta̱ṃ hava̍m

||1||

प्रति॑ प्रि॒यत॑मं॒ रथं॒ वृष॑णं वसु॒वाह॑नम् ।

स्तो॒ता वा॑मश्विना॒वृषि॒: स्तोमे॑न॒ प्रति॑ भूषति॒ माध्वी॒ मम॑ श्रुतं॒ हव॑म्

a̱tyāyā̍tamaśvinā ti̱ro viśvā̍ a̱haṃ sanā̍ |

dasrā̱ hira̍ṇyavartanī̱ suṣu̍mnā̱ sindhu̍vāhasā̱ mādhvī̱ mama̍ śruta̱ṃ hava̍m

||2||

अ॒त्याया॑तमश्विना ति॒रो विश्वा॑ अ॒हं सना॑ ।

दस्रा॒ हिर॑ण्यवर्तनी॒ सुषु॑म्ना॒ सिन्धु॑वाहसा॒ माध्वी॒ मम॑ श्रुतं॒ हव॑म्

ā no̱ ratnā̍ni̱ bibhra̍tā̱vaśvi̍nā̱ gaccha̍taṃ yu̱vam |

rudrā̱ hira̍ṇyavartanī juṣā̱ṇā vā̍jinīvasū̱ mādhvī̱ mama̍ śruta̱ṃ hava̍m

||3||

आ नो॒ रत्ना॑नि॒ बिभ्र॑ता॒वश्वि॑ना॒ गच्छ॑तं यु॒वम् ।

रुद्रा॒ हिर॑ण्यवर्तनी जुषा॒णा वा॑जिनीवसू॒ माध्वी॒ मम॑ श्रुतं॒ हव॑म्

su̱ṣṭubho̍ vāṃ vṛṣaṇvasū̱ rathe̱ vāṇī̱cyāhi̍tā |

u̱ta vā̍ṃ kaku̱ho mṛ̱gaḥ pṛkṣa̍: kṛṇoti vāpu̱ṣo mādhvī̱ mama̍ śruta̱ṃ hava̍m

||4||

सु॒ष्टुभो॑ वां वृषण्वसू॒ रथे॒ वाणी॒च्याहि॑ता ।

उ॒त वां॑ ककु॒हो मृ॒गः पृक्ष॑: कृणोति वापु॒षो माध्वी॒ मम॑ श्रुतं॒ हव॑म्

bo̱dhinma̍nasā ra̱thye̍ṣi̱rā ha̍vana̱śrutā̍ |

vibhi̱ścyavā̍namaśvinā̱ ni yā̍tho̱ adva̍yāvina̱ṃ mādhvī̱ mama̍ śruta̱ṃ hava̍m

||5||

बो॒धिन्म॑नसा र॒थ्ये॑षि॒रा ह॑वन॒श्रुता॑ ।

विभि॒श्च्यवा॑नमश्विना॒ नि या॑थो॒ अद्व॑याविनं॒ माध्वी॒ मम॑ श्रुतं॒ हव॑म्

ā vā̍ṃ narā mano̱yujo'śvā̍saḥ pruṣi̱tapsa̍vaḥ |

vayo̍ vahantu pī̱taye̍ sa̱ha su̱mnebhi̍raśvinā̱ mādhvī̱ mama̍ śruta̱ṃ hava̍m

||6||

आ वां॑ नरा मनो॒युजोऽश्वा॑सः प्रुषि॒तप्स॑वः ।

वयो॑ वहन्तु पी॒तये॑ स॒ह सु॒म्नेभि॑रश्विना॒ माध्वी॒ मम॑ श्रुतं॒ हव॑म्

aśvi̍nā̱veha ga̍cchata̱ṃ nāsa̍tyā̱ mā vi ve̍natam |

ti̱raści̍darya̱yā pari̍ va̱rtiryā̍tamadābhyā̱ mādhvī̱ mama̍ śruta̱ṃ hava̍m

||7||

अश्वि॑ना॒वेह ग॑च्छतं॒ नास॑त्या॒ मा वि वे॑नतम् ।

ति॒रश्चि॑दर्य॒या परि॑ व॒र्तिर्या॑तमदाभ्या॒ माध्वी॒ मम॑ श्रुतं॒ हव॑म्

a̱smin ya̱jñe a̍dābhyā jari̱tāra̍ṃ śubhaspatī |

a̱va̱syuma̍śvinā yu̱vaṃ gṛ̱ṇanta̱mupa̍ bhūṣatho̱ mādhvī̱ mama̍ śruta̱ṃ hava̍m

||8||

अ॒स्मिन् य॒ज्ञे अ॑दाभ्या जरि॒तारं॑ शुभस्पती ।

अ॒व॒स्युम॑श्विना यु॒वं गृ॒णन्त॒मुप॑ भूषथो॒ माध्वी॒ मम॑ श्रुतं॒ हव॑म्

abhū̍du̱ṣā ruśa̍t paśu̱rāgnira̍dhāyyṛ̱tviya̍: |

ayo̍ji vāṃ vṛṣaṇvasū̱ ratho̍ dasrā̱vama̍rtyo̱ mādhvī̱ mama̍ śruta̱ṃ hava̍m

||9||

अभू॑दु॒षा रुश॑त् पशु॒राग्निर॑धाय्यृ॒त्विय॑: ।

अयो॑जि वां वृषण्वसू॒ रथो॑ दस्रा॒वम॑र्त्यो॒ माध्वी॒ मम॑ श्रुतं॒ हव॑म्