Study
- Anukramaṇī
- Source
6 traivṛṣṇastryaruṇaḥ, paurukutsasrasadasyuḥ bhārato'śvamedhaśca rājānaḥ, (atrirbhauma iti kecit)| agniḥ 6 indrāgnī|triṣṭup, 4-6 anuṣṭup|
ana̍svantā̱ satpa̍tirmāmahe me̱ gāvā̱ ceti̍ṣṭho̱ asu̍ro ma̱ghona̍: |
trai̱vṛ̱ṣṇo a̍gne da̱śabhi̍: sa̱hasrai̱rvaiśvā̍nara̱ trya̍ruṇaściketa
||1||अन॑स्वन्ता॒ सत्प॑तिर्मामहे मे॒ गावा॒ चेति॑ष्ठो॒ असु॑रो म॒घोन॑: ।
त्रै॒वृ॒ष्णो अ॑ग्ने द॒शभि॑: स॒हस्रै॒र्वैश्वा॑नर॒ त्र्य॑रुणश्चिकेत
yo me̍ śa̱tā ca̍ viṃśa̱tiṃ ca̱ gonā̱ṃ harī̍ ca yu̱ktā su̱dhurā̱ dadā̍ti |
vaiśvā̍nara̱ suṣṭu̍to vāvṛdhā̱no'gne̱ yaccha̱ trya̍ruṇāya̱ śarma̍
||2||यो मे॑ श॒ता च॑ विंश॒तिं च॒ गोनां॒ हरी॑ च यु॒क्ता सु॒धुरा॒ ददा॑ति ।
वैश्वा॑नर॒ सुष्टु॑तो वावृधा॒नोऽग्ने॒ यच्छ॒ त्र्य॑रुणाय॒ शर्म॑
e̱vā te̍ agne suma̱tiṃ ca̍kā̱no navi̍ṣṭhāya nava̱maṃ tra̱sada̍syuḥ |
yo me̱ gira̍stuvijā̱tasya̍ pū̱rvīryu̱ktenā̱bhi trya̍ruṇo gṛ̱ṇāti̍
||3||ए॒वा ते॑ अग्ने सुम॒तिं च॑का॒नो नवि॑ष्ठाय नव॒मं त्र॒सद॑स्युः ।
यो मे॒ गिर॑स्तुविजा॒तस्य॑ पू॒र्वीर्यु॒क्तेना॒भि त्र्य॑रुणो गृ॒णाति॑
yo ma̱ iti̍ pra̱voca̱tyaśva̍medhāya sū̱raye̍ |
dada̍dṛ̱cā sa̱niṃ ya̱te dada̍nme̱dhāmṛ̍tāya̱te
||4||यो म॒ इति॑ प्र॒वोच॒त्यश्व॑मेधाय सू॒रये॑ ।
दद॑दृ॒चा स॒निं य॒ते दद॑न्मे॒धामृ॑ताय॒ते
yasya̍ mā paru̱ṣāḥ śa̱tamu̍ddha̱rṣaya̍ntyu̱kṣaṇa̍: |
aśva̍medhasya̱ dānā̱: somā̍ iva̱ tryā̍śiraḥ
||5||यस्य॑ मा परु॒षाः श॒तमु॑द्ध॒र्षय॑न्त्यु॒क्षण॑: ।
अश्व॑मेधस्य॒ दाना॒: सोमा॑ इव॒ त्र्या॑शिरः
indrā̍gnī śata̱dāvnyaśva̍medhe su̱vīrya̍m |
kṣa̱traṃ dhā̍rayataṃ bṛ̱had di̱vi sūrya̍mivā̱jara̍m
||6||इन्द्रा॑ग्नी शत॒दाव्न्यश्व॑मेधे सु॒वीर्य॑म् ।
क्ष॒त्रं धा॑रयतं बृ॒हद् दि॒वि सूर्य॑मिवा॒जर॑म्