Study
- Anukramaṇī
- Source
6 sutaṃbhara ātreyaḥ| agniḥ | triṣṭup|
prāgnaye̍ bṛha̱te ya̱jñiyā̍ya ṛ̱tasya̱ vṛṣṇe̱ asu̍rāya̱ manma̍ |
ghṛ̱taṃ na ya̱jña ā̱sye̱3 supū̍ta̱ṃ gira̍ṃ bhare vṛṣa̱bhāya̍ pratī̱cīm
||1||प्राग्नये॑ बृह॒ते य॒ज्ञिया॑य ऋ॒तस्य॒ वृष्णे॒ असु॑राय॒ मन्म॑ ।
घृ॒तं न य॒ज्ञ आ॒स्ये॒३ सुपू॑तं॒ गिरं॑ भरे वृष॒भाय॑ प्रती॒चीम्
ṛ̱taṃ ci̍kitva ṛ̱tamicci̍kiddhyṛ̱tasya̱ dhārā̱ anu̍ tṛndhi pū̱rvīḥ |
nāhaṃ yā̱tuṃ saha̍sā̱ na dva̱yena̍ ṛ̱taṃ sa̍pāmyaru̱ṣasya̱ vṛṣṇa̍:
||2||ऋ॒तं चि॑कित्व ऋ॒तमिच्चि॑किद्ध्यृ॒तस्य॒ धारा॒ अनु॑ तृन्धि पू॒र्वीः ।
नाहं या॒तुं सह॑सा॒ न द्व॒येन॑ ऋ॒तं स॑पाम्यरु॒षस्य॒ वृष्ण॑:
kayā̍ no agna ṛ̱taya̍nnṛ̱tena̱ bhuvo̱ nave̍dā u̱catha̍sya̱ navya̍: |
vedā̍ me de̱va ṛ̍tu̱pā ṛ̍tū̱nāṃ nāhaṃ pati̍ṃ sani̱tura̱sya rā̱yaḥ
||3||कया॑ नो अग्न ऋ॒तय॑न्नृ॒तेन॒ भुवो॒ नवे॑दा उ॒चथ॑स्य॒ नव्य॑: ।
वेदा॑ मे दे॒व ऋ॑तु॒पा ऋ॑तू॒नां नाहं पतिं॑ सनि॒तुर॒स्य रा॒यः
ke te̍ agne ri̱pave̱ bandha̍nāsa̱: ke pā̱yava̍: saniṣanta dyu̱manta̍: |
ke dhā̱sima̍gne̱ anṛ̍tasya pānti̱ ka āsa̍to̱ vaca̍saḥ santi go̱pāḥ
||4||के ते॑ अग्ने रि॒पवे॒ बन्ध॑नास॒: के पा॒यव॑: सनिषन्त द्यु॒मन्त॑: ।
के धा॒सिम॑ग्ने॒ अनृ॑तस्य पान्ति॒ क आस॑तो॒ वच॑सः सन्ति गो॒पाः
sakhā̍yaste̱ viṣu̍ṇā agna e̱te śi̱vāsa̱: santo̱ aśi̍vā abhūvan |
adhū̍rṣata sva̱yame̱te vaco̍bhirṛjūya̱te vṛ̍ji̱nāni̍ bru̱vanta̍:
||5||सखा॑यस्ते॒ विषु॑णा अग्न ए॒ते शि॒वास॒: सन्तो॒ अशि॑वा अभूवन् ।
अधू॑र्षत स्व॒यमे॒ते वचो॑भिर्ऋजूय॒ते वृ॑जि॒नानि॑ ब्रु॒वन्त॑:
yaste̍ agne̱ nama̍sā ya̱jñamīṭṭa̍ ṛ̱taṃ sa pā̍tyaru̱ṣasya̱ vṛṣṇa̍: |
tasya̱ kṣaya̍: pṛ̱thurā sā̱dhure̍tu pra̱sarsrā̍ṇasya̱ nahu̍ṣasya̱ śeṣa̍:
||6||यस्ते॑ अग्ने॒ नम॑सा य॒ज्ञमीट्ट॑ ऋ॒तं स पा॑त्यरु॒षस्य॒ वृष्ण॑: ।
तस्य॒ क्षय॑: पृ॒थुरा सा॒धुरे॑तु प्र॒सर्स्रा॑णस्य॒ नहु॑षस्य॒ शेष॑: