Study
- Anukramaṇī
- Source
11 vasuśruta ātreyaḥ| agniḥ| triṣṭup|
tvāma̍gne̱ vasu̍pati̱ṃ vasū̍nāma̱bhi pra ma̍nde adhva̱reṣu̍ rājan |
tvayā̱ vāja̍ṃ vāja̱yanto̍ jayemā̱'bhi ṣyā̍ma pṛtsu̱tīrmartyā̍nām
||1||त्वाम॑ग्ने॒ वसु॑पतिं॒ वसू॑नाम॒भि प्र म॑न्दे अध्व॒रेषु॑ राजन् ।
त्वया॒ वाजं॑ वाज॒यन्तो॑ जयेमा॒ऽभि ष्या॑म पृत्सु॒तीर्मर्त्या॑नाम्
ha̱vya̱vāl̤a̱gnira̱jara̍: pi̱tā no̍ vi̱bhurvi̱bhāvā̍ su̱dṛśī̍ko a̱sme |
su̱gā̱rha̱pa̱tyāḥ samiṣo̍ didīhyasma̱drya1k saṃ mi̍mīhi̱ śravā̍ṃsi
||2||ह॒व्य॒वाळ॒ग्निर॒जर॑: पि॒ता नो॑ वि॒भुर्वि॒भावा॑ सु॒दृशी॑को अ॒स्मे ।
सु॒गा॒र्ह॒प॒त्याः समिषो॑ दिदीह्यस्म॒द्र्य१क् सं मि॑मीहि॒ श्रवां॑सि
vi̱śāṃ ka̱viṃ vi̱śpati̱ṃ mānu̍ṣīṇā̱ṃ śuci̍ṃ pāva̱kaṃ ghṛ̱tapṛ̍ṣṭhama̱gnim |
ni hotā̍raṃ viśva̱vida̍ṃ dadhidhve̱ sa de̱veṣu̍ vanate̱ vāryā̍ṇi
||3||वि॒शां क॒विं वि॒श्पतिं॒ मानु॑षीणां॒ शुचिं॑ पाव॒कं घृ॒तपृ॑ष्ठम॒ग्निम् ।
नि होता॑रं विश्व॒विदं॑ दधिध्वे॒ स दे॒वेषु॑ वनते॒ वार्या॑णि
ju̱ṣasvā̍gna̱ il̤a̍yā sa̱joṣā̱ yata̍māno ra̱śmibhi̱: sūrya̍sya |
ju̱ṣasva̍ naḥ sa̱midha̍ṃ jātaveda̱ ā ca̍ de̱vān ha̍vi̱radyā̍ya vakṣi
||4||जु॒षस्वा॑ग्न॒ इळ॑या स॒जोषा॒ यत॑मानो र॒श्मिभि॒: सूर्य॑स्य ।
जु॒षस्व॑ नः स॒मिधं॑ जातवेद॒ आ च॑ दे॒वान् ह॑वि॒रद्या॑य वक्षि
juṣṭo̱ damū̍nā̱ ati̍thirduro̱ṇa i̱maṃ no̍ ya̱jñamupa̍ yāhi vi̱dvān |
viśvā̍ agne abhi̱yujo̍ vi̱hatyā̍ śatrūya̱tāmā bha̍rā̱ bhoja̍nāni
||5||जुष्टो॒ दमू॑ना॒ अति॑थिर्दुरो॒ण इ॒मं नो॑ य॒ज्ञमुप॑ याहि वि॒द्वान् ।
विश्वा॑ अग्ने अभि॒युजो॑ वि॒हत्या॑ शत्रूय॒तामा भ॑रा॒ भोज॑नानि
va̱dhena̱ dasyu̱ṃ pra hi cā̱taya̍sva̱ vaya̍: kṛṇvā̱nasta̱nve̱3 svāyai̍ |
pipa̍rṣi̱ yat sa̍hasasputra de̱vān tso a̍gne pāhi nṛtama̱ vāje̍ a̱smān
||6||व॒धेन॒ दस्युं॒ प्र हि चा॒तय॑स्व॒ वय॑: कृण्वा॒नस्त॒न्वे॒३ स्वायै॑ ।
पिप॑र्षि॒ यत् स॑हसस्पुत्र दे॒वान् त्सो अ॑ग्ने पाहि नृतम॒ वाजे॑ अ॒स्मान्
va̱yaṃ te̍ agna u̱kthairvi̍dhema va̱yaṃ ha̱vyaiḥ pā̍vaka bhadraśoce |
a̱sme ra̱yiṃ vi̱śvavā̍ra̱ṃ sami̍nvā̱sme viśvā̍ni̱ dravi̍ṇāni dhehi
||7||व॒यं ते॑ अग्न उ॒क्थैर्वि॑धेम व॒यं ह॒व्यैः पा॑वक भद्रशोचे ।
अ॒स्मे र॒यिं वि॒श्ववा॑रं॒ समि॑न्वा॒स्मे विश्वा॑नि॒ द्रवि॑णानि धेहि
a̱smāka̍magne adhva̱raṃ ju̍ṣasva̱ saha̍saḥ sūno triṣadhastha ha̱vyam |
va̱yaṃ de̱veṣu̍ su̱kṛta̍: syāma̱ śarma̍ṇā nastri̱varū̍thena pāhi
||8||अ॒स्माक॑मग्ने अध्व॒रं जु॑षस्व॒ सह॑सः सूनो त्रिषधस्थ ह॒व्यम् ।
व॒यं दे॒वेषु॑ सु॒कृत॑: स्याम॒ शर्म॑णा नस्त्रि॒वरू॑थेन पाहि
viśvā̍ni no du̱rgahā̍ jātaveda̱: sindhu̱ṃ na nā̱vā du̍ri̱tāti̍ parṣi |
agne̍ atri̱vannama̍sā gṛṇā̱no̱3'smāka̍ṃ bodhyavi̱tā ta̱nūnā̍m
||9||विश्वा॑नि नो दु॒र्गहा॑ जातवेद॒: सिन्धुं॒ न ना॒वा दु॑रि॒ताति॑ पर्षि ।
अग्ने॑ अत्रि॒वन्नम॑सा गृणा॒नो॒३ऽस्माकं॑ बोध्यवि॒ता त॒नूना॑म्
yastvā̍ hṛ̱dā kī̱riṇā̱ manya̍mā̱no'ma̍rtya̱ṃ martyo̱ joha̍vīmi |
jāta̍vedo̱ yaśo̍ a̱smāsu̍ dhehi pra̱jābhi̍ragne amṛta̱tvama̍śyām
||10||यस्त्वा॑ हृ॒दा की॒रिणा॒ मन्य॑मा॒नोऽम॑र्त्यं॒ मर्त्यो॒ जोह॑वीमि ।
जात॑वेदो॒ यशो॑ अ॒स्मासु॑ धेहि प्र॒जाभि॑रग्ने अमृत॒त्वम॑श्याम्
yasmai̱ tvaṃ su̱kṛte̍ jātaveda u lo̱kama̍gne kṛ̱ṇava̍: syo̱nam |
a̱śvina̱ṃ sa pu̱triṇa̍ṃ vī̱rava̍nta̱ṃ goma̍ntaṃ ra̱yiṃ na̍śate sva̱sti
||11||यस्मै॒ त्वं सु॒कृते॑ जातवेद उ लो॒कम॑ग्ने कृ॒णव॑: स्यो॒नम् ।
अ॒श्विनं॒ स पु॒त्रिणं॑ वी॒रव॑न्तं॒ गोम॑न्तं र॒यिं न॑शते स्व॒स्ति