Sūktam 60 — rathairiva (8 mantras) — Śākala Saṃhitā (Ṛgveda)

Study

īl̤e̍ a̱gniṃ svava̍sa̱ṃ namo̍bhiri̱ha pra̍sa̱tto vi ca̍yat kṛ̱taṃ na̍: |

rathai̍riva̱ pra bha̍re vāja̱yadbhi̍: pradakṣi̱ṇinma̱rutā̱ṃ stoma̍mṛdhyām

||1||

ईळे॑ अ॒ग्निं स्वव॑सं॒ नमो॑भिरि॒ह प्र॑स॒त्तो वि च॑यत् कृ॒तं न॑: ।

रथै॑रिव॒ प्र भ॑रे वाज॒यद्भि॑: प्रदक्षि॒णिन्म॒रुतां॒ स्तोम॑मृध्याम्

ā ye ta̱sthuḥ pṛṣa̍tīṣu śru̱tāsu̍ su̱kheṣu̍ ru̱drā ma̱ruto̱ rathe̍ṣu |

vanā̍ cidugrā jihate̱ ni vo̍ bhi̱yā pṛ̍thi̱vī ci̍d rejate̱ parva̍taścit

||2||

आ ये त॒स्थुः पृष॑तीषु श्रु॒तासु॑ सु॒खेषु॑ रु॒द्रा म॒रुतो॒ रथे॑षु ।

वना॑ चिदुग्रा जिहते॒ नि वो॑ भि॒या पृ॑थि॒वी चि॑द् रेजते॒ पर्व॑तश्चित्

parva̍taści̱nmahi̍ vṛ̱ddho bi̍bhāya di̱vaści̱t sānu̍ rejata sva̱ne va̍: |

yat krīl̤a̍tha maruta ṛṣṭi̱manta̱ āpa̍ iva sa̱dhrya̍ñco dhavadhve

||3||

पर्व॑तश्चि॒न्महि॑ वृ॒द्धो बि॑भाय दि॒वश्चि॒त् सानु॑ रेजत स्व॒ने व॑: ।

यत् क्रीळ॑थ मरुत ऋष्टि॒मन्त॒ आप॑ इव स॒ध्र्य॑ञ्चो धवध्वे

va̱rā i̱ved rai̍va̱tāso̱ hira̍ṇyaira̱bhi sva̱dhābhi̍sta̱nva̍: pipiśre |

śri̱ye śreyā̍ṃsasta̱vaso̱ rathe̍ṣu sa̱trā mahā̍ṃsi cakrire ta̱nūṣu̍

||4||

व॒रा इ॒वेद् रै॑व॒तासो॒ हिर॑ण्यैर॒भि स्व॒धाभि॑स्त॒न्व॑: पिपिश्रे ।

श्रि॒ये श्रेयां॑सस्त॒वसो॒ रथे॑षु स॒त्रा महां॑सि चक्रिरे त॒नूषु॑

a̱jye̱ṣṭhāso̱ aka̍niṣṭhāsa e̱te saṃ bhrāta̍ro vāvṛdhu̱: saubha̍gāya |

yuvā̍ pi̱tā svapā̍ ru̱dra e̍ṣāṃ su̱dughā̱ pṛśni̍: su̱dinā̍ ma̱rudbhya̍:

||5||

अ॒ज्ये॒ष्ठासो॒ अक॑निष्ठास ए॒ते सं भ्रात॑रो वावृधु॒: सौभ॑गाय ।

युवा॑ पि॒ता स्वपा॑ रु॒द्र ए॑षां सु॒दुघा॒ पृश्नि॑: सु॒दिना॑ म॒रुद्भ्य॑:

yadu̍tta̱me ma̍ruto madhya̱me vā̱ yad vā̍va̱me su̍bhagāso di̱vi ṣṭha |

ato̍ no rudrā u̱ta vā̱ nva1syā'gne̍ vi̱ttāddha̱viṣo̱ yad yajā̍ma

||6||

यदु॑त्त॒मे म॑रुतो मध्य॒मे वा॒ यद् वा॑व॒मे सु॑भगासो दि॒वि ष्ठ ।

अतो॑ नो रुद्रा उ॒त वा॒ न्व१स्याऽग्ने॑ वि॒त्ताद्ध॒विषो॒ यद् यजा॑म

a̱gniśca̱ yanma̍ruto viśvavedaso di̱vo vaha̍dhva̱ utta̍rā̱dadhi̱ ṣṇubhi̍: |

te ma̍ndasā̱nā dhuna̍yo riśādaso vā̱maṃ dha̍tta̱ yaja̍mānāya sunva̱te

||7||

अ॒ग्निश्च॒ यन्म॑रुतो विश्ववेदसो दि॒वो वह॑ध्व॒ उत्त॑रा॒दधि॒ ष्णुभि॑: ।

ते म॑न्दसा॒ना धुन॑यो रिशादसो वा॒मं ध॑त्त॒ यज॑मानाय सुन्व॒ते

agne̍ ma̱rudbhi̍: śu̱bhaya̍dbhi̱rṛkva̍bhi̱: soma̍ṃ piba mandasā̱no ga̍ṇa̱śribhi̍: |

pā̱va̱kebhi̍rviśvami̱nvebhi̍rā̱yubhi̱rvaiśvā̍nara pra̱divā̍ ke̱tunā̍ sa̱jūḥ

||8||

अग्ने॑ म॒रुद्भि॑: शु॒भय॑द्भि॒र्ऋक्व॑भि॒: सोमं॑ पिब मन्दसा॒नो ग॑ण॒श्रिभि॑: ।

पा॒व॒केभि॑र्विश्वमि॒न्वेभि॑रा॒युभि॒र्वैश्वा॑नर प्र॒दिवा॑ के॒तुना॑ स॒जूः