Study
- Anukramaṇī
- Source
12 gāturātreyaḥ| indraḥ| triṣṭup|
ada̍rda̱rutsa̱masṛ̍jo̱ vi khāni̱ tvama̍rṇa̱vān ba̍dbadhā̱nām̐ a̍ramṇāḥ |
ma̱hānta̍mindra̱ parva̍ta̱ṃ vi yad vaḥ sṛ̱jo vi dhārā̱ ava̍ dāna̱vaṃ ha̍n
||1||अद॑र्द॒रुत्स॒मसृ॑जो॒ वि खानि॒ त्वम॑र्ण॒वान् ब॑द्बधा॒नाँ अ॑रम्णाः ।
म॒हान्त॑मिन्द्र॒ पर्व॑तं॒ वि यद् वः सृ॒जो वि धारा॒ अव॑ दान॒वं ह॑न्
tvamutsā̍m̐ ṛ̱tubhi̍rbadbadhā̱nām̐ ara̍ṃha̱ ūdha̱: parva̍tasya vajrin |
ahi̍ṃ cidugra̱ prayu̍ta̱ṃ śayā̍naṃ jagha̱nvām̐ i̍ndra̱ tavi̍ṣīmadhatthāḥ
||2||त्वमुत्साँ॑ ऋ॒तुभि॑र्बद्बधा॒नाँ अरं॑ह॒ ऊध॒: पर्व॑तस्य वज्रिन् ।
अहिं॑ चिदुग्र॒ प्रयु॑तं॒ शया॑नं जघ॒न्वाँ इ॑न्द्र॒ तवि॑षीमधत्थाः
tyasya̍ cinmaha̱to nirmṛ̱gasya̱ vadha̍rjaghāna̱ tavi̍ṣībhi̱rindra̍: |
ya eka̱ ida̍pra̱tirmanya̍māna̱ āda̍smāda̱nyo a̍janiṣṭa̱ tavyā̍n
||3||त्यस्य॑ चिन्मह॒तो निर्मृ॒गस्य॒ वध॑र्जघान॒ तवि॑षीभि॒रिन्द्र॑: ।
य एक॒ इद॑प्र॒तिर्मन्य॑मान॒ आद॑स्माद॒न्यो अ॑जनिष्ट॒ तव्या॑न्
tyaṃ ci̍deṣāṃ sva̱dhayā̱ mada̍ntaṃ mi̱ho napā̍taṃ su̱vṛdha̍ṃ tamo̱gām |
vṛṣa̍prabharmā dāna̱vasya̱ bhāma̱ṃ vajre̍ṇa va̱jrī ni ja̍ghāna̱ śuṣṇa̍m
||4||त्यं चि॑देषां स्व॒धया॒ मद॑न्तं मि॒हो नपा॑तं सु॒वृधं॑ तमो॒गाम् ।
वृष॑प्रभर्मा दान॒वस्य॒ भामं॒ वज्रे॑ण व॒ज्री नि ज॑घान॒ शुष्ण॑म्
tyaṃ ci̍dasya̱ kratu̍bhi̱rniṣa̍ttamama̱rmaṇo̍ vi̱dadida̍sya̱ marma̍ |
yadī̍ṃ sukṣatra̱ prabhṛ̍tā̱ mada̍sya̱ yuyu̍tsanta̱ṃ tama̍si ha̱rmye dhāḥ
||5||त्यं चि॑दस्य॒ क्रतु॑भि॒र्निष॑त्तमम॒र्मणो॑ वि॒ददिद॑स्य॒ मर्म॑ ।
यदीं॑ सुक्षत्र॒ प्रभृ॑ता॒ मद॑स्य॒ युयु॑त्सन्तं॒ तम॑सि ह॒र्म्ये धाः
tyaṃ ci̍di̱tthā ka̍tpa̱yaṃ śayā̍namasū̱rye tama̍si vāvṛdhā̱nam |
taṃ ci̍nmandā̱no vṛ̍ṣa̱bhaḥ su̱tasyo̱ccairindro̍ apa̱gūryā̍ jaghāna
||6||त्यं चि॑दि॒त्था क॑त्प॒यं शया॑नमसू॒र्ये तम॑सि वावृधा॒नम् ।
तं चि॑न्मन्दा॒नो वृ॑ष॒भः सु॒तस्यो॒च्चैरिन्द्रो॑ अप॒गूर्या॑ जघान
ud yadindro̍ maha̱te dā̍na̱vāya̱ vadha̱ryami̍ṣṭa̱ saho̱ apra̍tītam |
yadī̱ṃ vajra̍sya̱ prabhṛ̍tau da̱dābha̱ viśva̍sya ja̱ntora̍dha̱maṃ ca̍kāra
||7||उद् यदिन्द्रो॑ मह॒ते दा॑न॒वाय॒ वध॒र्यमि॑ष्ट॒ सहो॒ अप्र॑तीतम् ।
यदीं॒ वज्र॑स्य॒ प्रभृ॑तौ द॒दाभ॒ विश्व॑स्य ज॒न्तोर॑ध॒मं च॑कार
tyaṃ ci̱darṇa̍ṃ madhu̱paṃ śayā̍namasi̱nvaṃ va̱vraṃ mahyāda̍du̱graḥ |
a̱pāda̍ma̱traṃ ma̍ha̱tā va̱dhena̱ ni du̍ryo̱ṇa ā̍vṛṇaṅ mṛ̱dhravā̍cam
||8||त्यं चि॒दर्णं॑ मधु॒पं शया॑नमसि॒न्वं व॒व्रं मह्याद॑दु॒ग्रः ।
अ॒पाद॑म॒त्रं म॑ह॒ता व॒धेन॒ नि दु॑र्यो॒ण आ॑वृणङ् मृ॒ध्रवा॑चम्
ko a̍sya̱ śuṣma̱ṃ tavi̍ṣīṃ varāta̱ eko̱ dhanā̍ bharate̱ apra̍tītaḥ |
i̱me ci̍dasya̱ jraya̍so̱ nu de̱vī indra̱syauja̍so bhi̱yasā̍ jihāte
||9||को अ॑स्य॒ शुष्मं॒ तवि॑षीं वरात॒ एको॒ धना॑ भरते॒ अप्र॑तीतः ।
इ॒मे चि॑दस्य॒ ज्रय॑सो॒ नु दे॒वी इन्द्र॒स्यौज॑सो भि॒यसा॑ जिहाते
nya̍smai de̱vī svadhi̍tirjihīta̱ indrā̍ya gā̱turu̍śa̱tīva̍ yeme |
saṃ yadojo̍ yu̱vate̱ viśva̍mābhi̱ranu̍ sva̱dhāvne̍ kṣi̱tayo̍ namanta
||10||न्य॑स्मै दे॒वी स्वधि॑तिर्जिहीत॒ इन्द्रा॑य गा॒तुरु॑श॒तीव॑ येमे ।
सं यदोजो॑ यु॒वते॒ विश्व॑माभि॒रनु॑ स्व॒धाव्ने॑ क्षि॒तयो॑ नमन्त
eka̱ṃ nu tvā̱ satpa̍ti̱ṃ pāñca̍janyaṃ jā̱taṃ śṛ̍ṇomi ya̱śasa̱ṃ jane̍ṣu |
taṃ me̍ jagṛbhra ā̱śaso̱ navi̍ṣṭhaṃ do̱ṣā vasto̱rhava̍mānāsa̱ indra̍m
||11||एकं॒ नु त्वा॒ सत्प॑तिं॒ पाञ्च॑जन्यं जा॒तं शृ॑णोमि य॒शसं॒ जने॑षु ।
तं मे॑ जगृभ्र आ॒शसो॒ नवि॑ष्ठं दो॒षा वस्तो॒र्हव॑मानास॒ इन्द्र॑म्
e̱vā hi tvāmṛ̍tu̱thā yā̱taya̍ntaṃ ma̱ghā vipre̍bhyo̱ dada̍taṃ śṛ̱ṇomi̍ |
kiṃ te̍ bra̱hmāṇo̍ gṛhate̱ sakhā̍yo̱ ye tvā̱yā ni̍da̱dhuḥ kāma̍mindra
||12||ए॒वा हि त्वामृ॑तु॒था या॒तय॑न्तं म॒घा विप्रे॑भ्यो॒ दद॑तं शृ॒णोमि॑ ।
किं ते॑ ब्र॒ह्माणो॑ गृहते॒ सखा॑यो॒ ये त्वा॒या नि॑द॒धुः काम॑मिन्द्र