Study
- Anukramaṇī
- Source
15 svastyātreyaḥ| viśve devāḥ, 4, 6-7 indravāyū, 5 vāyuḥ|1-4 gāyatrī, 5-10 uṣṇik, 11-13 jagatī triṣṭubvā, 14-15 anuṣṭup|
agne̍ su̱tasya̍ pī̱taye̱ viśvai̱rūme̍bhi̱rā ga̍hi | de̱vebhi̍rha̱vyadā̍taye
||1||अग्ने॑ सु॒तस्य॑ पी॒तये॒ विश्वै॒रूमे॑भि॒रा ग॑हि । दे॒वेभि॑र्ह॒व्यदा॑तये
ṛta̍dhītaya̱ ā ga̍ta̱ satya̍dharmāṇo adhva̱ram | a̱gneḥ pi̍bata ji̱hvayā̍
||2||ऋत॑धीतय॒ आ ग॑त॒ सत्य॑धर्माणो अध्व॒रम् । अ॒ग्नेः पि॑बत जि॒ह्वया॑
vipre̍bhirvipra santya prāta̱ryāva̍bhi̱rā ga̍hi | de̱vebhi̱: soma̍pītaye
||3||विप्रे॑भिर्विप्र सन्त्य प्रात॒र्याव॑भि॒रा ग॑हि । दे॒वेभि॒: सोम॑पीतये
a̱yaṃ soma̍śca̱mū su̱to'ma̍tre̱ pari̍ ṣicyate | pri̱ya indrā̍ya vā̱yave̍
||4||अ॒यं सोम॑श्च॒मू सु॒तोऽम॑त्रे॒ परि॑ षिच्यते । प्रि॒य इन्द्रा॑य वा॒यवे॑
vāya̱vā yā̍hi vī̱taye̍ juṣā̱ṇo ha̱vyadā̍taye | pibā̍ su̱tasyāndha̍so a̱bhi praya̍:
||5||वाय॒वा या॑हि वी॒तये॑ जुषा॒णो ह॒व्यदा॑तये । पिबा॑ सु॒तस्यान्ध॑सो अ॒भि प्रय॑:
indra̍śca vāyaveṣāṃ su̱tānā̍ṃ pī̱tima̍rhathaḥ | tāñju̍ṣethāmare̱pasā̍va̱bhi praya̍:
||6||इन्द्र॑श्च वायवेषां सु॒तानां॑ पी॒तिम॑र्हथः । ताञ्जु॑षेथामरे॒पसा॑व॒भि प्रय॑:
su̱tā indrā̍ya vā̱yave̱ somā̍so̱ dadhyā̍śiraḥ | ni̱mnaṃ na ya̍nti̱ sindha̍vo̱'bhi praya̍:
||7||सु॒ता इन्द्रा॑य वा॒यवे॒ सोमा॑सो॒ दध्या॑शिरः । नि॒म्नं न य॑न्ति॒ सिन्ध॑वो॒ऽभि प्रय॑:
sa̱jūrviśve̍bhirde̱vebhi̍ra̱śvibhyā̍mu̱ṣasā̍ sa̱jūḥ | ā yā̍hyagne atri̱vat su̱te ra̍ṇa
||8||स॒जूर्विश्वे॑भिर्दे॒वेभि॑र॒श्विभ्या॑मु॒षसा॑ स॒जूः । आ या॑ह्यग्ने अत्रि॒वत् सु॒ते र॑ण
sa̱jūrmi̱trāvaru̍ṇābhyāṃ sa̱jūḥ some̍na̱ viṣṇu̍nā | ā yā̍hyagne atri̱vat su̱te ra̍ṇa
||9||स॒जूर्मि॒त्रावरु॑णाभ्यां स॒जूः सोमे॑न॒ विष्णु॑ना । आ या॑ह्यग्ने अत्रि॒वत् सु॒ते र॑ण
sa̱jūrā̍di̱tyairvasu̍bhiḥ sa̱jūrindre̍ṇa vā̱yunā̍ | ā yā̍hyagne atri̱vat su̱te ra̍ṇa
||10||स॒जूरा॑दि॒त्यैर्वसु॑भिः स॒जूरिन्द्रे॑ण वा॒युना॑ । आ या॑ह्यग्ने अत्रि॒वत् सु॒ते र॑ण
sva̱sti no̍ mimītāma̱śvinā̱ bhaga̍: sva̱sti de̱vyadi̍tirana̱rvaṇa̍: |
sva̱sti pū̱ṣā asu̍ro dadhātu naḥ sva̱sti dyāvā̍pṛthi̱vī su̍ce̱tunā̍
||11||स्व॒स्ति नो॑ मिमीताम॒श्विना॒ भग॑: स्व॒स्ति दे॒व्यदि॑तिरन॒र्वण॑: ।
स्व॒स्ति पू॒षा असु॑रो दधातु नः स्व॒स्ति द्यावा॑पृथि॒वी सु॑चे॒तुना॑
sva̱staye̍ vā̱yumupa̍ bravāmahai̱ soma̍ṃ sva̱sti bhuva̍nasya̱ yaspati̍: |
bṛha̱spati̱ṃ sarva̍gaṇaṃ sva̱staye̍ sva̱staya̍ ādi̱tyāso̍ bhavantu naḥ
||12||स्व॒स्तये॑ वा॒युमुप॑ ब्रवामहै॒ सोमं॑ स्व॒स्ति भुव॑नस्य॒ यस्पति॑: ।
बृह॒स्पतिं॒ सर्व॑गणं स्व॒स्तये॑ स्व॒स्तय॑ आदि॒त्यासो॑ भवन्तु नः
viśve̍ de̱vā no̍ a̱dyā sva̱staye̍ vaiśvāna̱ro vasu̍ra̱gniḥ sva̱staye̍ |
de̱vā a̍vantvṛ̱bhava̍: sva̱staye̍ sva̱sti no̍ ru̱draḥ pā̱tvaṃha̍saḥ
||13||विश्वे॑ दे॒वा नो॑ अ॒द्या स्व॒स्तये॑ वैश्वान॒रो वसु॑र॒ग्निः स्व॒स्तये॑ ।
दे॒वा अ॑वन्त्वृ॒भव॑: स्व॒स्तये॑ स्व॒स्ति नो॑ रु॒द्रः पा॒त्वंह॑सः
sva̱sti mi̍trāvaruṇā sva̱sti pa̍thye revati |
sva̱sti na̱ indra̍ścā̱gniśca̍ sva̱sti no̍ adite kṛdhi
||14||स्व॒स्ति मि॑त्रावरुणा स्व॒स्ति प॑थ्ये रेवति ।
स्व॒स्ति न॒ इन्द्र॑श्चा॒ग्निश्च॑ स्व॒स्ति नो॑ अदिते कृधि
sva̱sti panthā̱manu̍ carema sūryācandra̱masā̍viva |
puna̱rdada̱tāghna̍tā jāna̱tā saṃ ga̍memahi
||15||स्व॒स्ति पन्था॒मनु॑ चरेम सूर्याचन्द्र॒मसा॑विव ।
पुन॒र्दद॒ताघ्न॑ता जान॒ता सं ग॑मेमहि