Study
- Anukramaṇī
- Source
7 gaya ātreyaḥ| agniḥ| anuṣṭup, 5-7 paṃktiḥ|
tvāma̍gne ha̱viṣma̍nto de̱vaṃ martā̍sa īl̤ate |
manye̍ tvā jā̱tave̍dasa̱ṃ sa ha̱vyā va̍kṣyānu̱ṣak
||1||त्वाम॑ग्ने ह॒विष्म॑न्तो दे॒वं मर्ता॑स ईळते ।
मन्ये॑ त्वा जा॒तवे॑दसं॒ स ह॒व्या व॑क्ष्यानु॒षक्
a̱gnirhotā̱ dāsva̍ta̱: kṣaya̍sya vṛ̱ktaba̍rhiṣaḥ |
saṃ ya̱jñāsa̱ścara̍nti̱ yaṃ saṃ vājā̍saḥ śrava̱syava̍:
||2||अ॒ग्निर्होता॒ दास्व॑त॒: क्षय॑स्य वृ॒क्तब॑र्हिषः ।
सं य॒ज्ञास॒श्चर॑न्ति॒ यं सं वाजा॑सः श्रव॒स्यव॑:
u̱ta sma̱ yaṃ śiśu̍ṃ yathā̱ nava̱ṃ jani̍ṣṭā̱raṇī̍ |
dha̱rtāra̱ṃ mānu̍ṣīṇāṃ vi̱śāma̱gniṃ sva̍dhva̱ram
||3||उ॒त स्म॒ यं शिशुं॑ यथा॒ नवं॒ जनि॑ष्टा॒रणी॑ ।
ध॒र्तारं॒ मानु॑षीणां वि॒शाम॒ग्निं स्व॑ध्व॒रम्
u̱ta sma̍ durgṛbhīyase pu̱tro na hvā̱ryāṇā̍m |
pu̱rū yo dagdhāsi̱ vanā 'gne̍ pa̱śurna yava̍se
||4||उ॒त स्म॑ दुर्गृभीयसे पु॒त्रो न ह्वा॒र्याणा॑म् ।
पु॒रू यो दग्धासि॒ वना ऽग्ने॑ प॒शुर्न यव॑से
adha̍ sma̱ yasyā̱rcaya̍: sa̱myak saṃyanti̍ dhū̱mina̍: |
yadī̱maha̍ tri̱to di̱vyupa̱ dhmāte̍va̱ dhama̍ti̱ śiśī̍te dhmā̱tarī̍ yathā
||5||अध॑ स्म॒ यस्या॒र्चय॑: स॒म्यक् संयन्ति॑ धू॒मिन॑: ।
यदी॒मह॑ त्रि॒तो दि॒व्युप॒ ध्माते॑व॒ धम॑ति॒ शिशी॑ते ध्मा॒तरी॑ यथा
tavā̱hama̍gna ū̱tibhi̍rmi̱trasya̍ ca̱ praśa̍stibhiḥ |
dve̱ṣo̱yuto̱ na du̍ri̱tā tu̱ryāma̱ martyā̍nām
||6||तवा॒हम॑ग्न ऊ॒तिभि॑र्मि॒त्रस्य॑ च॒ प्रश॑स्तिभिः ।
द्वे॒षो॒युतो॒ न दु॑रि॒ता तु॒र्याम॒ मर्त्या॑नाम्
taṃ no̍ agne a̱bhī naro̍ ra̱yiṃ sa̍hasva̱ ā bha̍ra |
sa kṣe̍paya̱t sa po̍ṣaya̱d bhuva̱d vāja̍sya sā̱taya̍ u̱taidhi̍ pṛ̱tsu no̍ vṛ̱dhe
||7||तं नो॑ अग्ने अ॒भी नरो॑ र॒यिं स॑हस्व॒ आ भ॑र ।
स क्षे॑पय॒त् स पो॑षय॒द् भुव॒द् वाज॑स्य सा॒तय॑ उ॒तैधि॑ पृ॒त्सु नो॑ वृ॒धे