Study
- Anukramaṇī
- Source
11 sadāpṛṇā ātreyaḥ| viśve devāḥ| triṣṭup 9 purastājjyotiḥ|
vi̱dā di̱vo vi̱ṣyannadri̍mu̱kthairā̍ya̱tyā u̱ṣaso̍ a̱rcino̍ guḥ |
apā̍vṛta vra̱jinī̱rut sva̍rgā̱d vi duro̱ mānu̍ṣīrde̱va ā̍vaḥ
||1||वि॒दा दि॒वो वि॒ष्यन्नद्रि॑मु॒क्थैरा॑य॒त्या उ॒षसो॑ अ॒र्चिनो॑ गुः ।
अपा॑वृत व्र॒जिनी॒रुत् स्व॑र्गा॒द् वि दुरो॒ मानु॑षीर्दे॒व आ॑वः
vi sūryo̍ a̱mati̱ṃ na śriya̍ṃ sā̱dorvād gavā̍ṃ mā̱tā jā̍na̱tī gā̍t |
dhanva̍rṇaso na̱dya1: khādo̍arṇā̱: sthūṇe̍va̱ sumi̍tā dṛṃhata̱ dyauḥ
||2||वि सूर्यो॑ अ॒मतिं॒ न श्रियं॑ सा॒दोर्वाद् गवां॑ मा॒ता जा॑न॒ती गा॑त् ।
धन्व॑र्णसो न॒द्य१: खादो॑अर्णा॒: स्थूणे॑व॒ सुमि॑ता दृंहत॒ द्यौः
a̱smā u̱kthāya̱ parva̍tasya̱ garbho̍ ma̱hīnā̍ṃ ja̱nuṣe̍ pū̱rvyāya̍ |
vi parva̍to̱ jihī̍ta̱ sādha̍ta̱ dyaurā̱vivā̍santo dasayanta̱ bhūma̍
||3||अ॒स्मा उ॒क्थाय॒ पर्व॑तस्य॒ गर्भो॑ म॒हीनां॑ ज॒नुषे॑ पू॒र्व्याय॑ ।
वि पर्व॑तो॒ जिही॑त॒ साध॑त॒ द्यौरा॒विवा॑सन्तो दसयन्त॒ भूम॑
sū̱ktebhi̍rvo̱ vaco̍bhirde̱vaju̍ṣṭai̱rindrā̱ nva1gnī ava̍se hu̱vadhyai̍ |
u̱kthebhi̱rhi ṣmā̍ ka̱vaya̍: suya̱jñā ā̱vivā̍santo ma̱ruto̱ yaja̍nti
||4||सू॒क्तेभि॑र्वो॒ वचो॑भिर्दे॒वजु॑ष्टै॒रिन्द्रा॒ न्व१ग्नी अव॑से हु॒वध्यै॑ ।
उ॒क्थेभि॒र्हि ष्मा॑ क॒वय॑: सुय॒ज्ञा आ॒विवा॑सन्तो म॒रुतो॒ यज॑न्ति
eto̱ nva1dya su̱dhyo̱3 bhavā̍ma̱ pra du̱cchunā̍ minavāmā̱ varī̍yaḥ |
ā̱re dveṣā̍ṃsi sanu̱tarda̍dhā̱mā'yā̍ma̱ prāñco̱ yaja̍māna̱maccha̍
||5||एतो॒ न्व१द्य सु॒ध्यो॒३ भवा॑म॒ प्र दु॒च्छुना॑ मिनवामा॒ वरी॑यः ।
आ॒रे द्वेषां॑सि सनु॒तर्द॑धा॒माऽया॑म॒ प्राञ्चो॒ यज॑मान॒मच्छ॑
etā̱ dhiya̍ṃ kṛ̱ṇavā̍mā sakhā̱yo'pa̱ yā mā̱tām̐ ṛ̍ṇu̱ta vra̱jaṃ goḥ |
yayā̱ manu̍rviśiśi̱praṃ ji̱gāya̱ yayā̍ va̱ṇigva̱ṅkurāpā̱ purī̍ṣam
||6||एता॒ धियं॑ कृ॒णवा॑मा सखा॒योऽप॒ या मा॒ताँ ऋ॑णु॒त व्र॒जं गोः ।
यया॒ मनु॑र्विशिशि॒प्रं जि॒गाय॒ यया॑ व॒णिग्व॒ङ्कुरापा॒ पुरी॑षम्
anū̍no̱datra̱ hasta̍yato̱ adri̱rārca̱n yena̱ daśa̍ mā̱so nava̍gvāḥ |
ṛ̱taṃ ya̱tī sa̱ramā̱ gā a̍vinda̱d viśvā̍ni sa̱tyāṅgi̍rāścakāra
||7||अनू॑नो॒दत्र॒ हस्त॑यतो॒ अद्रि॒रार्च॒न् येन॒ दश॑ मा॒सो नव॑ग्वाः ।
ऋ॒तं य॒ती स॒रमा॒ गा अ॑विन्द॒द् विश्वा॑नि स॒त्याङ्गि॑राश्चकार
viśve̍ a̱syā vyuṣi̱ māhi̍nāyā̱: saṃ yad gobhi̱raṅgi̍raso̱ nava̍nta |
utsa̍ āsāṃ para̱me sa̱dhastha̍ ṛ̱tasya̍ pa̱thā sa̱ramā̍ vida̱d gāḥ
||8||विश्वे॑ अ॒स्या व्युषि॒ माहि॑नाया॒: सं यद् गोभि॒रङ्गि॑रसो॒ नव॑न्त ।
उत्स॑ आसां पर॒मे स॒धस्थ॑ ऋ॒तस्य॑ प॒था स॒रमा॑ विद॒द् गाः
ā sūryo̍ yātu sa̱ptāśva̱: kṣetra̱ṃ yada̍syorvi̱yā dī̍rghayā̱the |
ra̱ghuḥ śye̱naḥ pa̍taya̱dandho̱ acchā̱ yuvā̍ ka̱virdī̍daya̱d goṣu̱ gaccha̍n
||9||आ सूर्यो॑ यातु स॒प्ताश्व॒: क्षेत्रं॒ यद॑स्योर्वि॒या दी॑र्घया॒थे ।
र॒घुः श्ये॒नः प॑तय॒दन्धो॒ अच्छा॒ युवा॑ क॒विर्दी॑दय॒द् गोषु॒ गच्छ॑न्
ā sūryo̍ aruhacchu̱kramarṇo'yu̍kta̱ yaddha̱rito̍ vī̱tapṛ̍ṣṭhāḥ |
u̱dnā na nāva̍manayanta̱ dhīrā̍ āśṛṇva̱tīrāpo̍ a̱rvāga̍tiṣṭhan
||10||आ सूर्यो॑ अरुहच्छु॒क्रमर्णोऽयु॑क्त॒ यद्ध॒रितो॑ वी॒तपृ॑ष्ठाः ।
उ॒द्ना न नाव॑मनयन्त॒ धीरा॑ आशृण्व॒तीरापो॑ अ॒र्वाग॑तिष्ठन्
dhiya̍ṃ vo a̱psu da̍dhiṣe sva̱rṣāṃ yayāta̍ra̱n daśa̍ mā̱so nava̍gvāḥ |
a̱yā dhi̱yā syā̍ma de̱vago̍pā a̱yā dhi̱yā tu̍turyā̱mātyaṃha̍:
||11||धियं॑ वो अ॒प्सु द॑धिषे स्व॒र्षां ययात॑र॒न् दश॑ मा॒सो नव॑ग्वाः ।
अ॒या धि॒या स्या॑म दे॒वगो॑पा अ॒या धि॒या तु॑तुर्या॒मात्यंह॑: