Study
- Anukramaṇī
- Source
6 satyaśravā ātreyaḥ| uṣā| triṣṭup|
dyu̱tadyā̍mānaṃ bṛha̱tīmṛ̱tena̍ ṛ̱tāva̍rīmaru̱ṇapsu̍ṃ vibhā̱tīm |
de̱vīmu̱ṣasa̱ṃ sva̍rā̱vaha̍ntī̱ṃ prati̱ viprā̍so ma̱tibhi̍rjarante
||1||द्यु॒तद्या॑मानं बृह॒तीमृ॒तेन॑ ऋ॒ताव॑रीमरु॒णप्सुं॑ विभा॒तीम् ।
दे॒वीमु॒षसं॒ स्व॑रा॒वह॑न्तीं॒ प्रति॒ विप्रा॑सो म॒तिभि॑र्जरन्ते
e̱ṣā jana̍ṃ darśa̱tā bo̱dhaya̍ntī su̱gān pa̱thaḥ kṛ̍ṇva̱tī yā̱tyagre̍ |
bṛ̱ha̱dra̱thā bṛ̍ha̱tī vi̍śvami̱nvoṣā jyoti̍ryaccha̱tyagre̱ ahnā̍m
||2||ए॒षा जनं॑ दर्श॒ता बो॒धय॑न्ती सु॒गान् प॒थः कृ॑ण्व॒ती या॒त्यग्रे॑ ।
बृ॒ह॒द्र॒था बृ॑ह॒ती वि॑श्वमि॒न्वोषा ज्योति॑र्यच्छ॒त्यग्रे॒ अह्ना॑म्
e̱ṣā gobhi̍raru̱ṇebhi̍ryujā̱nā 'sre̍dhantī ra̱yimaprā̍yu cakre |
pa̱tho rada̍ntī suvi̱tāya̍ de̱vī pu̍ruṣṭu̱tā vi̱śvavā̍rā̱ vi bhā̍ti
||3||ए॒षा गोभि॑ररु॒णेभि॑र्युजा॒ना ऽस्रे॑धन्ती र॒यिमप्रा॑यु चक्रे ।
प॒थो रद॑न्ती सुवि॒ताय॑ दे॒वी पु॑रुष्टु॒ता वि॒श्ववा॑रा॒ वि भा॑ति
e̱ṣā vye̍nī bhavati dvi̱barhā̍ āviṣkṛṇvā̱nā ta̱nva̍ṃ pu̱rastā̍t |
ṛ̱tasya̱ panthā̱manve̍ti sā̱dhu pra̍jāna̱tīva̱ na diśo̍ mināti
||4||ए॒षा व्ये॑नी भवति द्वि॒बर्हा॑ आविष्कृण्वा॒ना त॒न्वं॑ पु॒रस्ता॑त् ।
ऋ॒तस्य॒ पन्था॒मन्वे॑ति सा॒धु प्र॑जान॒तीव॒ न दिशो॑ मिनाति
e̱ṣā śu̱bhrā na ta̱nvo̍ vidā̱nordhveva̍ snā̱tī dṛ̱śaye̍ no asthāt |
apa̱ dveṣo̱ bādha̍mānā̱ tamā̍ṃsyu̱ṣā di̱vo du̍hi̱tā jyoti̱ṣāgā̍t
||5||ए॒षा शु॒भ्रा न त॒न्वो॑ विदा॒नोर्ध्वेव॑ स्ना॒ती दृ॒शये॑ नो अस्थात् ।
अप॒ द्वेषो॒ बाध॑माना॒ तमां॑स्यु॒षा दि॒वो दु॑हि॒ता ज्योति॒षागा॑त्
e̱ṣā pra̍tī̱cī du̍hi̱tā di̱vo nṝn yoṣe̍va bha̱drā ni ri̍ṇīte̱ apsa̍: |
vyū̱rṇva̱tī dā̱śuṣe̱ vāryā̍ṇi̱ puna̱rjyoti̍ryuva̱tiḥ pū̱rvathā̍kaḥ
||6||ए॒षा प्र॑ती॒ची दु॑हि॒ता दि॒वो नॄन् योषे॑व भ॒द्रा नि रि॑णीते॒ अप्स॑: ।
व्यू॒र्ण्व॒ती दा॒शुषे॒ वार्या॑णि॒ पुन॒र्ज्योति॑र्युव॒तिः पू॒र्वथा॑कः