Study
- Anukramaṇī
- Source
9 vasūyava ātreyāḥ| agniḥ, 9viśve devāḥ | gāyatrī|
agne̍ pāvaka ro̱ciṣā̍ ma̱ndrayā̍ deva ji̱hvayā̍ | ā de̱vān va̍kṣi̱ yakṣi̍ ca
||1||अग्ने॑ पावक रो॒चिषा॑ म॒न्द्रया॑ देव जि॒ह्वया॑ । आ दे॒वान् व॑क्षि॒ यक्षि॑ च
taṃ tvā̍ ghṛtasnavīmahe̱ citra̍bhāno sva̱rdṛśa̍m | de̱vām̐ ā vī̱taye̍ vaha
||2||तं त्वा॑ घृतस्नवीमहे॒ चित्र॑भानो स्व॒र्दृश॑म् । दे॒वाँ आ वी॒तये॑ वह
vī̱tiho̍traṃ tvā kave dyu̱manta̱ṃ sami̍dhīmahi | agne̍ bṛ̱hanta̍madhva̱re
||3||वी॒तिहो॑त्रं त्वा कवे द्यु॒मन्तं॒ समि॑धीमहि । अग्ने॑ बृ॒हन्त॑मध्व॒रे
agne̱ viśve̍bhi̱rā ga̍hi de̱vebhi̍rha̱vyadā̍taye | hotā̍raṃ tvā vṛṇīmahe
||4||अग्ने॒ विश्वे॑भि॒रा ग॑हि दे॒वेभि॑र्ह॒व्यदा॑तये । होता॑रं त्वा वृणीमहे
yaja̍mānāya sunva̱ta āgne̍ su̱vīrya̍ṃ vaha | de̱vairā sa̍tsi ba̱rhiṣi̍
||5||यज॑मानाय सुन्व॒त आग्ने॑ सु॒वीर्यं॑ वह । दे॒वैरा स॑त्सि ब॒र्हिषि॑
sa̱mi̱dhā̱naḥ sa̍hasraji̱dagne̱ dharmā̍ṇi puṣyasi | de̱vānā̍ṃ dū̱ta u̱kthya̍:
||6||स॒मि॒धा॒नः स॑हस्रजि॒दग्ने॒ धर्मा॑णि पुष्यसि । दे॒वानां॑ दू॒त उ॒क्थ्य॑:
nya1gniṃ jā̱tave̍dasaṃ hotra̱vāha̱ṃ yavi̍ṣṭhyam | dadhā̍tā de̱vamṛ̱tvija̍m
||7||न्य१ग्निं जा॒तवे॑दसं होत्र॒वाहं॒ यवि॑ष्ठ्यम् । दधा॑ता दे॒वमृ॒त्विज॑म्
pra ya̱jña e̍tvānu̱ṣaga̱dyā de̱vavya̍castamaḥ | stṛ̱ṇī̱ta ba̱rhirā̱sade̍
||8||प्र य॒ज्ञ ए॑त्वानु॒षग॒द्या दे॒वव्य॑चस्तमः । स्तृ॒णी॒त ब॒र्हिरा॒सदे॑
edaṃ ma̱ruto̍ a̱śvinā̍ mi̱traḥ sī̍dantu̱ varu̍ṇaḥ | de̱vāsa̱: sarva̍yā vi̱śā
||9||एदं म॒रुतो॑ अ॒श्विना॑ मि॒त्रः सी॑दन्तु॒ वरु॑णः । दे॒वास॒: सर्व॑या वि॒शा