Study
- Anukramaṇī
- Source
5 dvito mṛktavāhā ātreyaḥ| agniḥ| anuṣṭup, 5 paṃktiḥ|
prā̱tara̱gniḥ pu̍rupri̱yo vi̱śaḥ sta̍ve̱tāti̍thiḥ |
viśvā̍ni̱ yo ama̍rtyo ha̱vyā marte̍ṣu̱ raṇya̍ti
||1||प्रा॒तर॒ग्निः पु॑रुप्रि॒यो वि॒शः स्त॑वे॒ताति॑थिः ।
विश्वा॑नि॒ यो अम॑र्त्यो ह॒व्या मर्ते॑षु॒ रण्य॑ति
dvi̱tāya̍ mṛ̱ktavā̍hase̱ svasya̱ dakṣa̍sya ma̱ṃhanā̍ |
indu̱ṃ sa dha̍tta ānu̱ṣak sto̱tā ci̍tte amartya
||2||द्वि॒ताय॑ मृ॒क्तवा॑हसे॒ स्वस्य॒ दक्ष॑स्य मं॒हना॑ ।
इन्दुं॒ स ध॑त्त आनु॒षक् स्तो॒ता चि॑त्ते अमर्त्य
taṃ vo̍ dī̱rghāyu̍śociṣaṃ gi̱rā hu̍ve ma̱ghonā̍m |
ari̍ṣṭo̱ yeṣā̱ṃ ratho̱ vya̍śvadāva̱nnīya̍te
||3||तं वो॑ दी॒र्घायु॑शोचिषं गि॒रा हु॑वे म॒घोना॑म् ।
अरि॑ष्टो॒ येषां॒ रथो॒ व्य॑श्वदाव॒न्नीय॑ते
ci̱trā vā̱ yeṣu̱ dīdhi̍tirā̱sannu̱kthā pānti̱ ye |
stī̱rṇaṃ ba̱rhiḥ sva̍rṇare̱ śravā̍ṃsi dadhire̱ pari̍
||4||चि॒त्रा वा॒ येषु॒ दीधि॑तिरा॒सन्नु॒क्था पान्ति॒ ये ।
स्ती॒र्णं ब॒र्हिः स्व॑र्णरे॒ श्रवां॑सि दधिरे॒ परि॑
ye me̍ pañcā̱śata̍ṃ da̱duraśvā̍nāṃ sa̱dhastu̍ti |
dyu̱mada̍gne̱ mahi̱ śravo̍ bṛ̱hat kṛ̍dhi ma̱ghonā̍ṃ nṛ̱vada̍mṛta nṛ̱ṇām
||5||ये मे॑ पञ्चा॒शतं॑ द॒दुरश्वा॑नां स॒धस्तु॑ति ।
द्यु॒मद॑ग्ने॒ महि॒ श्रवो॑ बृ॒हत् कृ॑धि म॒घोनां॑ नृ॒वद॑मृत नृ॒णाम्