Study
- Anukramaṇī
- Source
5 bhaumo'triḥ| aśvinau| triṣṭup|
prā̱ta̱ryāvā̍ṇā pratha̱mā ya̍jadhvaṃ pu̱rā gṛdhrā̱dara̍ruṣaḥ pibātaḥ |
prā̱tarhi ya̱jñama̱śvinā̍ da̱dhāte̱ pra śa̍ṃsanti ka̱vaya̍: pūrva̱bhāja̍:
||1||प्रा॒त॒र्यावा॑णा प्रथ॒मा य॑जध्वं पु॒रा गृध्रा॒दर॑रुषः पिबातः ।
प्रा॒तर्हि य॒ज्ञम॒श्विना॑ द॒धाते॒ प्र शं॑सन्ति क॒वय॑: पूर्व॒भाज॑:
prā̱tarya̍jadhvama̱śvinā̍ hinota̱ na sā̱yama̍sti deva̱yā aju̍ṣṭam |
u̱tānyo a̱smad ya̍jate̱ vi cāva̱: pūrva̍:pūrvo̱ yaja̍māno̱ vanī̍yān
||2||प्रा॒तर्य॑जध्वम॒श्विना॑ हिनोत॒ न सा॒यम॑स्ति देव॒या अजु॑ष्टम् ।
उ॒तान्यो अ॒स्मद् य॑जते॒ वि चाव॒: पूर्व॑:पूर्वो॒ यज॑मानो॒ वनी॑यान्
hira̍ṇyatva̱ṅmadhu̍varṇo ghṛ̱tasnu̱: pṛkṣo̱ vaha̱nnā ratho̍ vartate vām |
mano̍javā aśvinā̱ vāta̍raṃhā̱ yenā̍tiyā̱tho du̍ri̱tāni̱ viśvā̍
||3||हिर॑ण्यत्व॒ङ्मधु॑वर्णो घृ॒तस्नु॒: पृक्षो॒ वह॒न्ना रथो॑ वर्तते वाम् ।
मनो॑जवा अश्विना॒ वात॑रंहा॒ येना॑तिया॒थो दु॑रि॒तानि॒ विश्वा॑
yo bhūyi̍ṣṭha̱ṃ nāsa̍tyābhyāṃ vi̱veṣa̱ cani̍ṣṭhaṃ pi̱tvo rara̍te vibhā̱ge |
sa to̱kama̍sya pīpara̱cchamī̍bhi̱ranū̍rdhvabhāsa̱: sada̱mit tu̍turyāt
||4||यो भूयि॑ष्ठं॒ नास॑त्याभ्यां वि॒वेष॒ चनि॑ष्ठं पि॒त्वो रर॑ते विभा॒गे ।
स तो॒कम॑स्य पीपर॒च्छमी॑भि॒रनू॑र्ध्वभास॒: सद॒मित् तु॑तुर्यात्
sama̱śvino̱rava̍sā̱ nūta̍nena mayo̱bhuvā̍ su̱praṇī̍tī gamema |
ā no̍ ra̱yiṃ va̍hata̱mota vī̱rānā viśvā̍nyamṛtā̱ saubha̍gāni
||5||सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि