Study
- Anukramaṇī
- Source
16 śyāvāśva ātreyaḥ| marutaḥ| 1, 5, 10-11, 15 kakup, 2 bṛhatī, 3 anuṣṭup, 4 pura uṣṇik, 6-7, 9, 13-14, 16 satobṛhatī, 8, 12 gāyatrī|
ko ve̍da̱ jāna̍meṣā̱ṃ ko vā̍ pu̱rā su̱mneṣvā̍sa ma̱rutā̍m |
yad yu̍yu̱jre ki̍lā̱sya̍:
||1||को वे॑द॒ जान॑मेषां॒ को वा॑ पु॒रा सु॒म्नेष्वा॑स म॒रुता॑म् ।
यद् यु॑यु॒ज्रे कि॑ला॒स्य॑:
aitān rathe̍ṣu ta̱sthuṣa̱: kaḥ śu̍śrāva ka̱thā ya̍yuḥ |
kasmai̍ sasruḥ su̱dāse̱ anvā̱paya̱ il̤ā̍bhirvṛ̱ṣṭaya̍: sa̱ha
||2||ऐतान् रथे॑षु त॒स्थुष॒: कः शु॑श्राव क॒था य॑युः ।
कस्मै॑ सस्रुः सु॒दासे॒ अन्वा॒पय॒ इळा॑भिर्वृ॒ष्टय॑: स॒ह
te ma̍ āhu̱rya ā̍ya̱yurupa̱ dyubhi̱rvibhi̱rmade̍ |
naro̱ maryā̍ are̱pasa̍ i̱mān paśya̱nniti̍ ṣṭuhi
||3||ते म॑ आहु॒र्य आ॑य॒युरुप॒ द्युभि॒र्विभि॒र्मदे॑ ।
नरो॒ मर्या॑ अरे॒पस॑ इ॒मान् पश्य॒न्निति॑ ष्टुहि
ye a̱ñjiṣu̱ ye vāśī̍ṣu̱ svabhā̍navaḥ sra̱kṣu ru̱kmeṣu̍ khā̱diṣu̍ |
śrā̱yā rathe̍ṣu̱ dhanva̍su
||4||ये अ॒ञ्जिषु॒ ये वाशी॑षु॒ स्वभा॑नवः स्र॒क्षु रु॒क्मेषु॑ खा॒दिषु॑ ।
श्रा॒या रथे॑षु॒ धन्व॑सु
yu̱ṣmāka̍ṃ smā̱ rathā̱m̐ anu̍ mu̱de da̍dhe maruto jīradānavaḥ |
vṛ̱ṣṭī dyāvo̍ ya̱tīri̍va
||5||यु॒ष्माकं॑ स्मा॒ रथाँ॒ अनु॑ मु॒दे द॑धे मरुतो जीरदानवः ।
वृ॒ष्टी द्यावो॑ य॒तीरि॑व
ā yaṃ nara̍: su̱dāna̍vo dadā̱śuṣe̍ di̱vaḥ kośa̱macu̍cyavuḥ |
vi pa̱rjanya̍ṃ sṛjanti̱ roda̍sī̱ anu̱ dhanva̍nā yanti vṛ̱ṣṭaya̍:
||6||आ यं नर॑: सु॒दान॑वो ददा॒शुषे॑ दि॒वः कोश॒मचु॑च्यवुः ।
वि प॒र्जन्यं॑ सृजन्ति॒ रोद॑सी॒ अनु॒ धन्व॑ना यन्ति वृ॒ष्टय॑:
ta̱tṛ̱dā̱nāḥ sindha̍va̱: kṣoda̍sā̱ raja̱: pra sa̍srurdhe̱navo̍ yathā |
sya̱nnā aśvā̍ i̱vādhva̍no vi̱moca̍ne̱ vi yad varta̍nta e̱nya̍:
||7||त॒तृ॒दा॒नाः सिन्ध॑व॒: क्षोद॑सा॒ रज॒: प्र स॑स्रुर्धे॒नवो॑ यथा ।
स्य॒न्ना अश्वा॑ इ॒वाध्व॑नो वि॒मोच॑ने॒ वि यद् वर्त॑न्त ए॒न्य॑:
ā yā̍ta maruto di̱va āntari̍kṣāda̱mādu̱ta |
māva̍ sthāta parā̱vata̍:
||8||आ या॑त मरुतो दि॒व आन्तरि॑क्षाद॒मादु॒त ।
माव॑ स्थात परा॒वत॑:
mā vo̍ ra̱sāni̍tabhā̱ kubhā̱ krumu̱rmā va̱: sindhu̱rni rī̍ramat |
mā va̱: pari̍ ṣṭhāt sa̱rayu̍: purī̱ṣiṇya̱sme it su̱mnama̍stu vaḥ
||9||मा वो॑ र॒सानि॑तभा॒ कुभा॒ क्रुमु॒र्मा व॒: सिन्धु॒र्नि री॑रमत् ।
मा व॒: परि॑ ष्ठात् स॒रयु॑: पुरी॒षिण्य॒स्मे इत् सु॒म्नम॑स्तु वः
taṃ va̱: śardha̱ṃ rathā̍nāṃ tve̱ṣaṃ ga̱ṇaṃ māru̍ta̱ṃ navya̍sīnām |
anu̱ pra ya̍nti vṛ̱ṣṭaya̍:
||10||तं व॒: शर्धं॒ रथा॑नां त्वे॒षं ग॒णं मारु॑तं॒ नव्य॑सीनाम् ।
अनु॒ प्र य॑न्ति वृ॒ष्टय॑:
śardha̍ṃśardhaṃ va eṣā̱ṃ vrāta̍ṃvrātaṃ ga̱ṇaṃga̍ṇaṃ suśa̱stibhi̍: |
anu̍ krāmema dhī̱tibhi̍:
||11||शर्धं॑शर्धं व एषां॒ व्रातं॑व्रातं ग॒णंग॑णं सुश॒स्तिभि॑: ।
अनु॑ क्रामेम धी॒तिभि॑:
kasmā̍ a̱dya sujā̍tāya rā̱taha̍vyāya̱ pra ya̍yuḥ | e̱nā yāme̍na ma̱ruta̍:
||12||कस्मा॑ अ॒द्य सुजा॑ताय रा॒तह॑व्याय॒ प्र य॑युः । ए॒ना यामे॑न म॒रुत॑:
yena̍ to̱kāya̱ tana̍yāya dhā̱nyaṃ1 bīja̱ṃ vaha̍dhve̱ akṣi̍tam |
a̱smabhya̱ṃ tad dha̍ttana̱ yad va̱ īma̍he̱ rādho̍ vi̱śvāyu̱ saubha̍gam
||13||येन॑ तो॒काय॒ तन॑याय धा॒न्यं१ बीजं॒ वह॑ध्वे॒ अक्षि॑तम् ।
अ॒स्मभ्यं॒ तद् ध॑त्तन॒ यद् व॒ ईम॑हे॒ राधो॑ वि॒श्वायु॒ सौभ॑गम्
atī̍yāma ni̱dasti̱raḥ sva̱stibhi̍rhi̱tvāva̱dyamarā̍tīḥ |
vṛ̱ṣṭvī śaṃ yorāpa̍ u̱sri bhe̍ṣa̱jaṃ syāma̍ marutaḥ sa̱ha
||14||अती॑याम नि॒दस्ति॒रः स्व॒स्तिभि॑र्हि॒त्वाव॒द्यमरा॑तीः ।
वृ॒ष्ट्वी शं योराप॑ उ॒स्रि भे॑ष॒जं स्याम॑ मरुतः स॒ह
su̱de̱vaḥ sa̍mahāsati su̱vīro̍ naro maruta̱: sa martya̍: | yaṃ trāya̍dhve̱ syāma̱ te
||15||सु॒दे॒वः स॑महासति सु॒वीरो॑ नरो मरुत॒: स मर्त्य॑: । यं त्राय॑ध्वे॒ स्याम॒ ते
stu̱hi bho̱jān tstu̍va̱to a̍sya̱ yāma̍ni̱ raṇa̱n gāvo̱ na yava̍se |
ya̱taḥ pūrvā̍m̐ iva̱ sakhī̱m̐ranu̍ hvaya gi̱rā gṛ̍ṇīhi kā̱mina̍:
||16||स्तु॒हि भो॒जान् त्स्तु॑व॒तो अ॑स्य॒ याम॑नि॒ रण॒न् गावो॒ न यव॑से ।
य॒तः पूर्वाँ॑ इव॒ सखीँ॒रनु॑ ह्वय गि॒रा गृ॑णीहि का॒मिन॑: