Study
- Anukramaṇī
- Source
5 bhaumo'triḥ| indraḥ| anuṣṭup, 5paṅktiḥ|
yadi̍ndra citra me̱hanāsti̱ tvādā̍tamadrivaḥ |
rādha̱stanno̍ vidadvasa ubhayāha̱styā bha̍ra
||1||यदि॑न्द्र चित्र मे॒हनास्ति॒ त्वादा॑तमद्रिवः ।
राध॒स्तन्नो॑ विदद्वस उभयाह॒स्त्या भ॑र
yanmanya̍se̱ vare̍ṇya̱mindra̍ dyu̱kṣaṃ tadā bha̍ra |
vi̱dyāma̱ tasya̍ te va̱yamakū̍pārasya dā̱vane̍
||2||यन्मन्य॑से॒ वरे॑ण्य॒मिन्द्र॑ द्यु॒क्षं तदा भ॑र ।
वि॒द्याम॒ तस्य॑ ते व॒यमकू॑पारस्य दा॒वने॑
yat te̍ di̱tsu pra̱rādhya̱ṃ mano̱ asti̍ śru̱taṃ bṛ̱hat |
tena̍ dṛ̱l̤ahā ci̍dadriva̱ ā vāja̍ṃ darṣi sā̱taye̍
||3||यत् ते॑ दि॒त्सु प्र॒राध्यं॒ मनो॒ अस्ति॑ श्रु॒तं बृ॒हत् ।
तेन॑ दृ॒ळहा चि॑दद्रिव॒ आ वाजं॑ दर्षि सा॒तये॑
maṃhi̍ṣṭhaṃ vo ma̱ghonā̱ṃ rājā̍naṃ carṣaṇī̱nām |
indra̱mupa̱ praśa̍staye pū̱rvībhi̍rjujuṣe̱ gira̍:
||4||मंहि॑ष्ठं वो म॒घोनां॒ राजा॑नं चर्षणी॒नाम् ।
इन्द्र॒मुप॒ प्रश॑स्तये पू॒र्वीभि॑र्जुजुषे॒ गिर॑:
asmā̱ it kāvya̱ṃ vaca̍ u̱kthamindrā̍ya̱ śaṃsya̍m |
tasmā̍ u̱ brahma̍vāhase̱ giro̍ vardha̱ntyatra̍yo̱ gira̍: śumbha̱ntyatra̍yaḥ
||5||अस्मा॒ इत् काव्यं॒ वच॑ उ॒क्थमिन्द्रा॑य॒ शंस्य॑म् ।
तस्मा॑ उ॒ ब्रह्म॑वाहसे॒ गिरो॑ वर्ध॒न्त्यत्र॑यो॒ गिर॑: शुम्भ॒न्त्यत्र॑यः