Study
- Anukramaṇī
- Source
6 sutaṃbhara ātreyaḥ| agniḥ | jagatī|
jana̍sya go̱pā a̍janiṣṭa̱ jāgṛ̍vira̱gniḥ su̱dakṣa̍: suvi̱tāya̱ navya̍se |
ghṛ̱tapra̍tīko bṛha̱tā di̍vi̱spṛśā̍ dyu̱mad vi bhā̍ti bhara̱tebhya̱: śuci̍:
||1||जन॑स्य गो॒पा अ॑जनिष्ट॒ जागृ॑विर॒ग्निः सु॒दक्ष॑: सुवि॒ताय॒ नव्य॑से ।
घृ॒तप्र॑तीको बृह॒ता दि॑वि॒स्पृशा॑ द्यु॒मद् वि भा॑ति भर॒तेभ्य॒: शुचि॑:
ya̱jñasya̍ ke̱tuṃ pra̍tha̱maṃ pu̱rohi̍tama̱gniṃ nara̍striṣadha̱sthe samī̍dhire |
indre̍ṇa de̱vaiḥ sa̱ratha̱ṃ sa ba̱rhiṣi̱ sīda̱nni hotā̍ ya̱jathā̍ya su̱kratu̍:
||2||य॒ज्ञस्य॑ के॒तुं प्र॑थ॒मं पु॒रोहि॑तम॒ग्निं नर॑स्त्रिषध॒स्थे समी॑धिरे ।
इन्द्रे॑ण दे॒वैः स॒रथं॒ स ब॒र्हिषि॒ सीद॒न्नि होता॑ य॒जथा॑य सु॒क्रतु॑:
asa̍mmṛṣṭo jāyase mā̱troḥ śuci̍rma̱ndraḥ ka̱viruda̍tiṣṭho vi̱vasva̍taḥ |
ghṛ̱tena̍ tvāvardhayannagna āhuta dhū̱maste̍ ke̱tura̍bhavad di̱vi śri̱taḥ
||3||अस॑म्मृष्टो जायसे मा॒त्रोः शुचि॑र्म॒न्द्रः क॒विरुद॑तिष्ठो वि॒वस्व॑तः ।
घृ॒तेन॑ त्वावर्धयन्नग्न आहुत धू॒मस्ते॑ के॒तुर॑भवद् दि॒वि श्रि॒तः
a̱gnirno̍ ya̱jñamupa̍ vetu sādhu̱yā 'gniṃ naro̱ vi bha̍rante gṛ̱hegṛ̍he |
a̱gnirdū̱to a̍bhavaddhavya̱vāha̍no̱'gniṃ vṛ̍ṇā̱nā vṛ̍ṇate ka̱vikra̍tum
||4||अ॒ग्निर्नो॑ य॒ज्ञमुप॑ वेतु साधु॒या ऽग्निं नरो॒ वि भ॑रन्ते गृ॒हेगृ॑हे ।
अ॒ग्निर्दू॒तो अ॑भवद्धव्य॒वाह॑नो॒ऽग्निं वृ॑णा॒ना वृ॑णते क॒विक्र॑तुम्
tubhye̱dama̍gne̱ madhu̍mattama̱ṃ vaca̱stubhya̍ṃ manī̱ṣā i̱yama̍stu̱ śaṃ hṛ̱de |
tvāṃ gira̱: sindhu̍mivā̱vanī̍rma̱hīrā pṛ̍ṇanti̱ śava̍sā va̱rdhaya̍nti ca
||5||तुभ्ये॒दम॑ग्ने॒ मधु॑मत्तमं॒ वच॒स्तुभ्यं॑ मनी॒षा इ॒यम॑स्तु॒ शं हृ॒दे ।
त्वां गिर॒: सिन्धु॑मिवा॒वनी॑र्म॒हीरा पृ॑णन्ति॒ शव॑सा व॒र्धय॑न्ति च
tvāma̍gne̱ aṅgi̍raso̱ guhā̍ hi̱tamanva̍vindañchiśriyā̱ṇaṃ vane̍vane |
sa jā̍yase ma̱thyamā̍na̱: saho̍ ma̱hat tvāmā̍hu̱: saha̍saspu̱trama̍ṅgiraḥ
||6||त्वाम॑ग्ने॒ अङ्गि॑रसो॒ गुहा॑ हि॒तमन्व॑विन्दञ्छिश्रिया॒णं वने॑वने ।
स जा॑यसे म॒थ्यमा॑न॒: सहो॑ म॒हत् त्वामा॑हु॒: सह॑सस्पु॒त्रम॑ङ्गिरः