Study
- Anukramaṇī
- Source
17 śyāvāśva ātreyaḥ| marutaḥ| anuṣṭup, 6, 16-17 paṅktiḥ|
pra śyā̍vāśva dhṛṣṇu̱yārcā̍ ma̱rudbhi̱ṝkva̍bhiḥ |
ye a̍dro̱ghama̍nuṣva̱dhaṃ śravo̱ mada̍nti ya̱jñiyā̍:
||1||प्र श्या॑वाश्व धृष्णु॒यार्चा॑ म॒रुद्भि॒ॠक्व॑भिः ।
ये अ॑द्रो॒घम॑नुष्व॒धं श्रवो॒ मद॑न्ति य॒ज्ञिया॑:
te hi sthi̱rasya̱ śava̍sa̱: sakhā̍ya̱: santi̍ dhṛṣṇu̱yā |
te yāma̱nnā dhṛ̍ṣa̱dvina̱stmanā̍ pānti̱ śaśva̍taḥ
||2||ते हि स्थि॒रस्य॒ शव॑स॒: सखा॑य॒: सन्ति॑ धृष्णु॒या ।
ते याम॒न्ना धृ॑ष॒द्विन॒स्त्मना॑ पान्ति॒ शश्व॑तः
te sya̱ndrāso̱ nokṣaṇo'ti̍ ṣkandanti̱ śarva̍rīḥ |
ma̱rutā̱madhā̱ maho̍ di̱vi kṣa̱mā ca̍ manmahe
||3||ते स्य॒न्द्रासो॒ नोक्षणोऽति॑ ष्कन्दन्ति॒ शर्व॑रीः ।
म॒रुता॒मधा॒ महो॑ दि॒वि क्ष॒मा च॑ मन्महे
ma̱rutsu̍ vo dadhīmahi̱ stoma̍ṃ ya̱jñaṃ ca̍ dhṛṣṇu̱yā |
viśve̱ ye mānu̍ṣā yu̱gā pānti̱ martya̍ṃ ri̱ṣaḥ
||4||म॒रुत्सु॑ वो दधीमहि॒ स्तोमं॑ य॒ज्ञं च॑ धृष्णु॒या ।
विश्वे॒ ये मानु॑षा यु॒गा पान्ति॒ मर्त्यं॑ रि॒षः
arha̍nto̱ ye su̱dāna̍vo̱ naro̱ asā̍miśavasaḥ |
pra ya̱jñaṃ ya̱jñiye̍bhyo di̱vo a̍rcā ma̱rudbhya̍:
||5||अर्ह॑न्तो॒ ये सु॒दान॑वो॒ नरो॒ असा॑मिशवसः ।
प्र य॒ज्ञं य॒ज्ञिये॑भ्यो दि॒वो अ॑र्चा म॒रुद्भ्य॑:
ā ru̱kmairā yu̱dhā nara̍ ṛ̱ṣvā ṛ̱ṣṭīra̍sṛkṣata |
anve̍nā̱m̐ aha̍ vi̱dyuto̍ ma̱ruto̱ jajjha̍tīriva bhā̱nura̍rta̱ tmanā̍ di̱vaḥ
||6||आ रु॒क्मैरा यु॒धा नर॑ ऋ॒ष्वा ऋ॒ष्टीर॑सृक्षत ।
अन्वे॑नाँ॒ अह॑ वि॒द्युतो॑ म॒रुतो॒ जज्झ॑तीरिव भा॒नुर॑र्त॒ त्मना॑ दि॒वः
ye vā̍vṛ̱dhanta̱ pārthi̍vā̱ ya u̱rāva̱ntari̍kṣa̱ ā |
vṛ̱jane̍ vā na̱dīnā̍ṃ sa̱dhasthe̍ vā ma̱ho di̱vaḥ
||7||ये वा॑वृ॒धन्त॒ पार्थि॑वा॒ य उ॒राव॒न्तरि॑क्ष॒ आ ।
वृ॒जने॑ वा न॒दीनां॑ स॒धस्थे॑ वा म॒हो दि॒वः
śardho̱ māru̍ta̱muccha̍ṃsa sa̱tyaśa̍vasa̱mṛbhva̍sam |
u̱ta sma̱ te śu̱bhe nara̱: pra sya̱ndrā yu̍jata̱ tmanā̍
||8||शर्धो॒ मारु॑त॒मुच्छं॑स स॒त्यश॑वस॒मृभ्व॑सम् ।
उ॒त स्म॒ ते शु॒भे नर॒: प्र स्य॒न्द्रा यु॑जत॒ त्मना॑
u̱ta sma̱ te paru̍ṣṇyā̱mūrṇā̍ vasata śu̱ndhyava̍: |
u̱ta pa̱vyā rathā̍nā̱madri̍ṃ bhinda̱ntyoja̍sā
||9||उ॒त स्म॒ ते परु॑ष्ण्या॒मूर्णा॑ वसत शु॒न्ध्यव॑: ।
उ॒त प॒व्या रथा॑ना॒मद्रिं॑ भिन्द॒न्त्योज॑सा
āpa̍thayo̱ vipa̍tha̱yo'nta̍spathā̱ anu̍pathāḥ |
e̱tebhi̱rmahya̱ṃ nāma̍bhirya̱jñaṃ vi̍ṣṭā̱ra o̍hate
||10||आप॑थयो॒ विप॑थ॒योऽन्त॑स्पथा॒ अनु॑पथाः ।
ए॒तेभि॒र्मह्यं॒ नाम॑भिर्य॒ज्ञं वि॑ष्टा॒र ओ॑हते
adhā̱ naro̱ nyo̍ha̱te'dhā̍ ni̱yuta̍ ohate |
adhā̱ pārā̍vatā̱ iti̍ ci̱trā rū̱pāṇi̱ darśyā̍
||11||अधा॒ नरो॒ न्यो॑ह॒तेऽधा॑ नि॒युत॑ ओहते ।
अधा॒ पारा॑वता॒ इति॑ चि॒त्रा रू॒पाणि॒ दर्श्या॑
cha̱nda̱:stubha̍: kubha̱nyava̱ utsa̱mā kī̱riṇo̍ nṛtuḥ |
te me̱ ke ci̱nna tā̱yava̱ ūmā̍ āsan dṛ̱śi tvi̱ṣe
||12||छ॒न्द॒:स्तुभ॑: कुभ॒न्यव॒ उत्स॒मा की॒रिणो॑ नृतुः ।
ते मे॒ के चि॒न्न ता॒यव॒ ऊमा॑ आसन् दृ॒शि त्वि॒षे
ya ṛ̱ṣvā ṛ̱ṣṭivi̍dyutaḥ ka̱vaya̱: santi̍ ve̱dhasa̍: |
tamṛ̍ṣe̱ māru̍taṃ ga̱ṇaṃ na̍ma̱syā ra̱mayā̍ gi̱rā
||13||य ऋ॒ष्वा ऋ॒ष्टिवि॑द्युतः क॒वय॒: सन्ति॑ वे॒धस॑: ।
तमृ॑षे॒ मारु॑तं ग॒णं न॑म॒स्या र॒मया॑ गि॒रा
accha̍ ṛṣe̱ māru̍taṃ ga̱ṇaṃ dā̱nā mi̱traṃ na yo̱ṣaṇā̍ |
di̱vo vā̍ dhṛṣṇava̱ oja̍sā stu̱tā dhī̱bhiri̍ṣaṇyata
||14||अच्छ॑ ऋषे॒ मारु॑तं ग॒णं दा॒ना मि॒त्रं न यो॒षणा॑ ।
दि॒वो वा॑ धृष्णव॒ ओज॑सा स्तु॒ता धी॒भिरि॑षण्यत
nū ma̍nvā̱na e̍ṣāṃ de̱vām̐ acchā̱ na va̱kṣaṇā̍ |
dā̱nā sa̍ceta sū̱ribhi̱ryāma̍śrutebhira̱ñjibhi̍:
||15||नू म॑न्वा॒न ए॑षां दे॒वाँ अच्छा॒ न व॒क्षणा॑ ।
दा॒ना स॑चेत सू॒रिभि॒र्याम॑श्रुतेभिर॒ञ्जिभि॑:
pra ye me̍ bandhve̱ṣe gāṃ voca̍nta sū̱raya̱: pṛśni̍ṃ vocanta mā̱tara̍m |
adhā̍ pi̱tara̍mi̱ṣmiṇa̍ṃ ru̱draṃ vo̍canta̱ śikva̍saḥ
||16||प्र ये मे॑ बन्ध्वे॒षे गां वोच॑न्त सू॒रय॒: पृश्निं॑ वोचन्त मा॒तर॑म् ।
अधा॑ पि॒तर॑मि॒ष्मिणं॑ रु॒द्रं वो॑चन्त॒ शिक्व॑सः
sa̱pta me̍ sa̱pta śā̱kina̱ eka̍mekā śa̱tā da̍duḥ |
ya̱munā̍yā̱madhi̍ śru̱tamud rādho̱ gavya̍ṃ mṛje̱ ni rādho̱ aśvya̍ṃ mṛje
||17||स॒प्त मे॑ स॒प्त शा॒किन॒ एक॑मेका श॒ता द॑दुः ।
य॒मुना॑या॒मधि॑ श्रु॒तमुद् राधो॒ गव्यं॑ मृजे॒ नि राधो॒ अश्व्यं॑ मृजे