Study
- Anukramaṇī
- Source
15 vasukarṇo vāsukra:| viśvedevāḥ| jagatī, 15 triṣṭup|
de̱vānhu̍ve bṛ̱hacchra̍vasaḥ sva̱staye̍ jyoti̱ṣkṛto̍ adhva̱rasya̱ prace̍tasaḥ |
ye vā̍vṛ̱dhuḥ pra̍ta̱raṃ vi̱śvave̍dasa̱ indra̍jyeṣṭhāso a̱mṛtā̍ ṛtā̱vṛdha̍:
||1||दे॒वान्हु॑वे बृ॒हच्छ्र॑वसः स्व॒स्तये॑ ज्योति॒ष्कृतो॑ अध्व॒रस्य॒ प्रचे॑तसः ।
ये वा॑वृ॒धुः प्र॑त॒रं वि॒श्ववे॑दस॒ इन्द्र॑ज्येष्ठासो अ॒मृता॑ ऋता॒वृध॑:
indra̍prasūtā̱ varu̍ṇapraśiṣṭā̱ ye sūrya̍sya̱ jyoti̍ṣo bhā̱gamā̍na̱śuḥ |
ma̱rudga̍ṇe vṛ̱jane̱ manma̍ dhīmahi̱ māgho̍ne ya̱jñaṃ ja̍nayanta sū̱raya̍:
||2||इन्द्र॑प्रसूता॒ वरु॑णप्रशिष्टा॒ ये सूर्य॑स्य॒ ज्योति॑षो भा॒गमा॑न॒शुः ।
म॒रुद्ग॑णे वृ॒जने॒ मन्म॑ धीमहि॒ माघो॑ने य॒ज्ञं ज॑नयन्त सू॒रय॑:
indro̱ vasu̍bhi̱: pari̍ pātu no̱ gaya̍mādi̱tyairno̱ adi̍ti̱: śarma̍ yacchatu |
ru̱dro ru̱drebhi̍rde̱vo mṛ̍l̤ayāti na̱stvaṣṭā̍ no̱ gnābhi̍: suvi̱tāya̍ jinvatu
||3||इन्द्रो॒ वसु॑भि॒: परि॑ पातु नो॒ गय॑मादि॒त्यैर्नो॒ अदि॑ति॒: शर्म॑ यच्छतु ।
रु॒द्रो रु॒द्रेभि॑र्दे॒वो मृ॑ळयाति न॒स्त्वष्टा॑ नो॒ ग्नाभि॑: सुवि॒ताय॑ जिन्वतु
adi̍ti̱rdyāvā̍pṛthi̱vī ṛ̱taṃ ma̱hadindrā̱viṣṇū̍ ma̱ruta̱: sva̍rbṛ̱hat |
de̱vām̐ ā̍di̱tyām̐ ava̍se havāmahe̱ vasū̍nru̱drāntsa̍vi̱tāra̍ṃ su̱daṃsa̍sam
||4||अदि॑ति॒र्द्यावा॑पृथि॒वी ऋ॒तं म॒हदिन्द्रा॒विष्णू॑ म॒रुत॒: स्व॑र्बृ॒हत् ।
दे॒वाँ आ॑दि॒त्याँ अव॑से हवामहे॒ वसू॑न्रु॒द्रान्त्स॑वि॒तारं॑ सु॒दंस॑सम्
sara̍svāndhī̱bhirvaru̍ṇo dhṛ̱tavra̍taḥ pū̱ṣā viṣṇu̍rmahi̱mā vā̱yura̱śvinā̍ |
bra̱hma̱kṛto̍ a̱mṛtā̍ vi̱śvave̍dasa̱: śarma̍ no yaṃsantri̱varū̍tha̱maṃha̍saḥ
||5||सर॑स्वान्धी॒भिर्वरु॑णो धृ॒तव्र॑तः पू॒षा विष्णु॑र्महि॒मा वा॒युर॒श्विना॑ ।
ब्र॒ह्म॒कृतो॑ अ॒मृता॑ वि॒श्ववे॑दस॒: शर्म॑ नो यंसन्त्रि॒वरू॑थ॒मंह॑सः
vṛṣā̍ ya̱jño vṛṣa̍ṇaḥ santu ya̱jñiyā̱ vṛṣa̍ṇo de̱vā vṛṣa̍ṇo havi̱ṣkṛta̍: |
vṛṣa̍ṇā̱ dyāvā̍pṛthi̱vī ṛ̱tāva̍rī̱ vṛṣā̍ pa̱rjanyo̱ vṛṣa̍ṇo vṛṣa̱stubha̍:
||6||वृषा॑ य॒ज्ञो वृष॑णः सन्तु य॒ज्ञिया॒ वृष॑णो दे॒वा वृष॑णो हवि॒ष्कृत॑: ।
वृष॑णा॒ द्यावा॑पृथि॒वी ऋ॒ताव॑री॒ वृषा॑ प॒र्जन्यो॒ वृष॑णो वृष॒स्तुभ॑:
a̱gnīṣomā̱ vṛṣa̍ṇā̱ vāja̍sātaye purupraśa̱stā vṛṣa̍ṇā̱ upa̍ bruve |
yāvī̍ji̱re vṛṣa̍ṇo devaya̱jyayā̱ tā na̱: śarma̍ tri̱varū̍tha̱ṃ vi ya̍ṃsataḥ
||7||अ॒ग्नीषोमा॒ वृष॑णा॒ वाज॑सातये पुरुप्रश॒स्ता वृष॑णा॒ उप॑ ब्रुवे ।
यावी॑जि॒रे वृष॑णो देवय॒ज्यया॒ ता न॒: शर्म॑ त्रि॒वरू॑थं॒ वि यं॑सतः
dhṛ̱tavra̍tāḥ kṣa̱triyā̍ yajñani̱ṣkṛto̍ bṛhaddi̱vā a̍dhva̱rāṇā̍mabhi̱śriya̍: |
a̱gniho̍tāra ṛta̱sāpo̍ a̱druho̱'po a̍sṛja̱nnanu̍ vṛtra̱tūrye̍
||8||धृ॒तव्र॑ताः क्ष॒त्रिया॑ यज्ञनि॒ष्कृतो॑ बृहद्दि॒वा अ॑ध्व॒राणा॑मभि॒श्रिय॑: ।
अ॒ग्निहो॑तार ऋत॒सापो॑ अ॒द्रुहो॒ऽपो अ॑सृज॒न्ननु॑ वृत्र॒तूर्ये॑
dyāvā̍pṛthi̱vī ja̍nayanna̱bhi vra̱tā''pa̱ oṣa̍dhīrva̱ninā̍ni ya̱jñiyā̍ |
a̱ntari̍kṣa̱ṃ sva1rā pa̍prurū̱taye̱ vaśa̍ṃ de̱vāsa̍sta̱nvī̱3 ni mā̍mṛjuḥ
||9||द्यावा॑पृथि॒वी ज॑नयन्न॒भि व्र॒ताऽऽप॒ ओष॑धीर्व॒निना॑नि य॒ज्ञिया॑ ।
अ॒न्तरि॑क्षं॒ स्व१रा प॑प्रुरू॒तये॒ वशं॑ दे॒वास॑स्त॒न्वी॒३ नि मा॑मृजुः
dha̱rtāro̍ di̱va ṛ̱bhava̍: su̱hastā̍ vātāparja̱nyā ma̍hi̱ṣasya̍ tanya̱toḥ |
āpa̱ oṣa̍dhī̱: pra ti̍rantu no̱ giro̱ bhago̍ rā̱tirvā̱jino̍ yantu me̱ hava̍m
||10||ध॒र्तारो॑ दि॒व ऋ॒भव॑: सु॒हस्ता॑ वातापर्ज॒न्या म॑हि॒षस्य॑ तन्य॒तोः ।
आप॒ ओष॑धी॒: प्र ति॑रन्तु नो॒ गिरो॒ भगो॑ रा॒तिर्वा॒जिनो॑ यन्तु मे॒ हव॑म्
sa̱mu̱draḥ sindhū̱ rajo̍ a̱ntari̍kṣama̱ja eka̍pāttanayi̱tnura̍rṇa̱vaḥ |
ahi̍rbu̱dhnya̍: śṛṇava̱dvacā̍ṃsi me̱ viśve̍ de̱vāsa̍ u̱ta sū̱rayo̱ mama̍
||11||स॒मु॒द्रः सिन्धू॒ रजो॑ अ॒न्तरि॑क्षम॒ज एक॑पात्तनयि॒त्नुर॑र्ण॒वः ।
अहि॑र्बु॒ध्न्य॑: शृणव॒द्वचां॑सि मे॒ विश्वे॑ दे॒वास॑ उ॒त सू॒रयो॒ मम॑
syāma̍ vo̱ mana̍vo de̱vavī̍taye̱ prāñca̍ṃ no ya̱jñaṃ pra ṇa̍yata sādhu̱yā |
ādi̍tyā̱ rudrā̱ vasa̍va̱: sudā̍nava i̱mā brahma̍ śa̱syamā̍nāni jinvata
||12||स्याम॑ वो॒ मन॑वो दे॒ववी॑तये॒ प्राञ्चं॑ नो य॒ज्ञं प्र ण॑यत साधु॒या ।
आदि॑त्या॒ रुद्रा॒ वस॑व॒: सुदा॑नव इ॒मा ब्रह्म॑ श॒स्यमा॑नानि जिन्वत
daivyā̱ hotā̍rā pratha̱mā pu̱rohi̍ta ṛ̱tasya̱ panthā̱manve̍mi sādhu̱yā |
kṣetra̍sya̱ pati̱ṃ prati̍veśamīmahe̱ viśvā̍nde̱vām̐ a̱mṛtā̱m̐ apra̍yucchataḥ
||13||दैव्या॒ होता॑रा प्रथ॒मा पु॒रोहि॑त ऋ॒तस्य॒ पन्था॒मन्वे॑मि साधु॒या ।
क्षेत्र॑स्य॒ पतिं॒ प्रति॑वेशमीमहे॒ विश्वा॑न्दे॒वाँ अ॒मृताँ॒ अप्र॑युच्छतः
vasi̍ṣṭhāsaḥ pitṛ̱vadvāca̍makrata de̱vām̐ īl̤ā̍nā ṛṣi̱vatsva̱staye̍ |
prī̱tā i̍va jñā̱taya̱: kāma̱metyā̱'sme de̍vā̱so'va̍ dhūnutā̱ vasu̍
||14||वसि॑ष्ठासः पितृ॒वद्वाच॑मक्रत दे॒वाँ ईळा॑ना ऋषि॒वत्स्व॒स्तये॑ ।
प्री॒ता इ॑व ज्ञा॒तय॒: काम॒मेत्या॒ऽस्मे दे॑वा॒सोऽव॑ धूनुता॒ वसु॑
de̱vānvasi̍ṣṭho a̱mṛtā̍nvavande̱ ye viśvā̱ bhuva̍nā̱bhi pra̍ta̱sthuḥ |
te no̍ rāsantāmurugā̱yama̱dya yū̱yaṃ pā̍ta sva̱stibhi̱: sadā̍ naḥ
||15||दे॒वान्वसि॑ष्ठो अ॒मृता॑न्ववन्दे॒ ये विश्वा॒ भुव॑ना॒भि प्र॑त॒स्थुः ।
ते नो॑ रासन्तामुरुगा॒यम॒द्य यू॒यं पा॑त स्व॒स्तिभि॒: सदा॑ नः