Study
- Anukramaṇī
- Source
5 arcan hairaṇyastūpaḥ| savitā| triṣṭup|
sa̱vi̱tā ya̱ntraiḥ pṛ̍thi̱vīma̍ramṇādaskambha̱ne sa̍vi̱tā dyāma̍dṛṃhat |
aśva̍mivādhukṣa̱ddhuni̍ma̱ntari̍kṣama̱tūrte̍ ba̱ddhaṃ sa̍vi̱tā sa̍mu̱dram
||1||स॒वि॒ता य॒न्त्रैः पृ॑थि॒वीम॑रम्णादस्कम्भ॒ने स॑वि॒ता द्याम॑दृंहत् ।
अश्व॑मिवाधुक्ष॒द्धुनि॑म॒न्तरि॑क्षम॒तूर्ते॑ ब॒द्धं स॑वि॒ता स॑मु॒द्रम्
yatrā̍ samu̱draḥ ska̍bhi̱to vyauna̱dapā̍ṃ napātsavi̱tā tasya̍ veda |
ato̱ bhūrata̍ ā̱ utthi̍ta̱ṃ rajo'to̱ dyāvā̍pṛthi̱vī a̍prathetām
||2||यत्रा॑ समु॒द्रः स्क॑भि॒तो व्यौन॒दपां॑ नपात्सवि॒ता तस्य॑ वेद ।
अतो॒ भूरत॑ आ॒ उत्थि॑तं॒ रजोऽतो॒ द्यावा॑पृथि॒वी अ॑प्रथेताम्
pa̱ścedama̱nyada̍bhava̱dyaja̍tra̱mama̍rtyasya̱ bhuva̍nasya bhū̱nā |
su̱pa̱rṇo a̱ṅga sa̍vi̱turga̱rutmā̱npūrvo̍ jā̱taḥ sa u̍ a̱syānu̱ dharma̍
||3||प॒श्चेदम॒न्यद॑भव॒द्यज॑त्र॒मम॑र्त्यस्य॒ भुव॑नस्य भू॒ना ।
सु॒प॒र्णो अ॒ङ्ग स॑वि॒तुर्ग॒रुत्मा॒न्पूर्वो॑ जा॒तः स उ॑ अ॒स्यानु॒ धर्म॑
gāva̍ iva̱ grāma̱ṃ yūyu̍dhiri̱vāśvā̍nvā̱śreva̍ va̱tsaṃ su̱manā̱ duhā̍nā |
pati̍riva jā̱yāma̱bhi no̱ nye̍tu dha̱rtā di̱vaḥ sa̍vi̱tā vi̱śvavā̍raḥ
||4||गाव॑ इव॒ ग्रामं॒ यूयु॑धिरि॒वाश्वा॑न्वा॒श्रेव॑ व॒त्सं सु॒मना॒ दुहा॑ना ।
पति॑रिव जा॒याम॒भि नो॒ न्ये॑तु ध॒र्ता दि॒वः स॑वि॒ता वि॒श्ववा॑रः
hira̍ṇyastūpaḥ savita̱ryathā̍ tvā''ṅgira̱so ju̱hve vāje̍ a̱smin |
e̱vā tvārca̱nnava̍se̱ vanda̍māna̱: soma̍syevā̱ṃśuṃ prati̍ jāgarā̱ham
||5||हिर॑ण्यस्तूपः सवित॒र्यथा॑ त्वाऽऽङ्गिर॒सो जु॒ह्वे वाजे॑ अ॒स्मिन् ।
ए॒वा त्वार्च॒न्नव॑से॒ वन्द॑मान॒: सोम॑स्येवां॒शुं प्रति॑ जागरा॒हम्