Study
- Anukramaṇī
- Source
8 mathito yāmāyanaḥ bhṛgurvāruṇirvā, bhārgavaścyavano vā| āpaḥ gāvo vā, 1 uttarārdharcasya agnīṣomau| anuṣṭup, 6 gāyatrī |
ni va̍rtadhva̱ṃ mānu̍ gātā̱'smāntsi̍ṣakta revatīḥ | agnī̍ṣomā punarvasū a̱sme dhā̍rayataṃ ra̱yim
||1||नि व॑र्तध्वं॒ मानु॑ गाता॒ऽस्मान्त्सि॑षक्त रेवतीः । अग्नी॑षोमा पुनर्वसू अ॒स्मे धा॑रयतं र॒यिम्
puna̍renā̱ ni va̍rtaya̱ puna̍renā̱ nyā ku̍ru | indra̍ eṇā̱ ni ya̍cchatva̱gnire̍nā u̱pāja̍tu
||2||पुन॑रेना॒ नि व॑र्तय॒ पुन॑रेना॒ न्या कु॑रु । इन्द्र॑ एणा॒ नि य॑च्छत्व॒ग्निरे॑ना उ॒पाज॑तु
puna̍re̱tā ni va̍rtantāma̱sminpu̍ṣyantu̱ gopa̍tau | i̱haivāgne̱ ni dhā̍raye̱ha ti̍ṣṭhatu̱ yā ra̱yiḥ
||3||पुन॑रे॒ता नि व॑र्तन्ताम॒स्मिन्पु॑ष्यन्तु॒ गोप॑तौ । इ॒हैवाग्ने॒ नि धा॑रये॒ह ति॑ष्ठतु॒ या र॒यिः
yanni̱yāna̱ṃ nyaya̍naṃ sa̱ṃjñāna̱ṃ yatpa̱rāya̍ṇam | ā̱varta̍naṃ ni̱varta̍na̱ṃ yo go̱pā api̱ taṃ hu̍ve
||4||यन्नि॒यानं॒ न्यय॑नं सं॒ज्ञानं॒ यत्प॒राय॑णम् । आ॒वर्त॑नं नि॒वर्त॑नं॒ यो गो॒पा अपि॒ तं हु॑वे
ya u̱dāna̱ḍvyaya̍na̱ṃ ya u̱dāna̍ṭ pa̱rāya̍ṇam | ā̱varta̍naṃ ni̱varta̍na̱mapi̍ go̱pā ni va̍rtatām
||5||य उ॒दान॒ड्व्यय॑नं॒ य उ॒दान॑ट् प॒राय॑णम् । आ॒वर्त॑नं नि॒वर्त॑न॒मपि॑ गो॒पा नि व॑र्तताम्
ā ni̍varta̱ ni va̍rtaya̱ puna̍rna indra̱ gā de̍hi | jī̱vābhi̍rbhunajāmahai
||6||आ नि॑वर्त॒ नि व॑र्तय॒ पुन॑र्न इन्द्र॒ गा दे॑हि । जी॒वाभि॑र्भुनजामहै
pari̍ vo vi̱śvato̍ dadha ū̱rjā ghṛ̱tena̱ paya̍sā | ye de̱vāḥ ke ca̍ ya̱jñiyā̱ste ra̱yyā saṃ sṛ̍jantu naḥ
||7||परि॑ वो वि॒श्वतो॑ दध ऊ॒र्जा घृ॒तेन॒ पय॑सा । ये दे॒वाः के च॑ य॒ज्ञिया॒स्ते र॒य्या सं सृ॑जन्तु नः
ā ni̍vartana vartaya̱ ni ni̍vartana vartaya | bhūmyā̱ścata̍sraḥ pra̱diśa̱stābhya̍ enā̱ ni va̍rtaya
||8||आ नि॑वर्तन वर्तय॒ नि नि॑वर्तन वर्तय । भूम्या॒श्चत॑स्रः प्र॒दिश॒स्ताभ्य॑ एना॒ नि व॑र्तय