Study
- Anukramaṇī
- Source
7 aindro vimadaḥ prājāpatyo vā, vāsukro vasukṛdvā|indraḥ| jagatīḥ 1,7 triṣṭup ,5 abhisāriṇī|
yajā̍maha̱ indra̱ṃ vajra̍dakṣiṇa̱ṃ harī̍ṇāṃ ra̱thyaṃ1 vivra̍tānām |
pra śmaśru̱ dodhu̍vadū̱rdhvathā̍ bhū̱dvi senā̍bhi̱rdaya̍māno̱ vi rādha̍sā
||1||यजा॑मह॒ इन्द्रं॒ वज्र॑दक्षिणं॒ हरी॑णां र॒थ्यं१ विव्र॑तानाम् ।
प्र श्मश्रु॒ दोधु॑वदू॒र्ध्वथा॑ भू॒द्वि सेना॑भि॒र्दय॑मानो॒ वि राध॑सा
harī̱ nva̍sya̱ yā vane̍ vi̱de vasvindro̍ ma̱ghairma̱ghavā̍ vṛtra̱hā bhu̍vat |
ṛ̱bhurvāja̍ ṛbhu̱kṣāḥ pa̍tyate̱ śavo'va̍ kṣṇaumi̱ dāsa̍sya̱ nāma̍ cit
||2||हरी॒ न्व॑स्य॒ या वने॑ वि॒दे वस्विन्द्रो॑ म॒घैर्म॒घवा॑ वृत्र॒हा भु॑वत् ।
ऋ॒भुर्वाज॑ ऋभु॒क्षाः प॑त्यते॒ शवोऽव॑ क्ष्णौमि॒ दास॑स्य॒ नाम॑ चित्
ya̱dā vajra̱ṃ hira̍ṇya̱midathā̱ ratha̱ṃ harī̱ yama̍sya̱ vaha̍to̱ vi sū̱ribhi̍: |
ā ti̍ṣṭhati ma̱ghavā̱ sana̍śruta̱ indro̱ vāja̍sya dī̱rghaśra̍vasa̱spati̍:
||3||य॒दा वज्रं॒ हिर॑ण्य॒मिदथा॒ रथं॒ हरी॒ यम॑स्य॒ वह॑तो॒ वि सू॒रिभि॑: ।
आ ति॑ष्ठति म॒घवा॒ सन॑श्रुत॒ इन्द्रो॒ वाज॑स्य दी॒र्घश्र॑वस॒स्पति॑:
so ci̱nnu vṛ̱ṣṭiryū̱thyā̱3 svā sacā̱m̐ indra̱: śmaśrū̍ṇi̱ hari̍tā̱bhi pru̍ṣṇute |
ava̍ veti su̱kṣaya̍ṃ su̱te madhūdiddhū̍noti̱ vāto̱ yathā̱ vana̍m
||4||सो चि॒न्नु वृ॒ष्टिर्यू॒थ्या॒३ स्वा सचाँ॒ इन्द्र॒: श्मश्रू॑णि॒ हरि॑ता॒भि प्रु॑ष्णुते ।
अव॑ वेति सु॒क्षयं॑ सु॒ते मधूदिद्धू॑नोति॒ वातो॒ यथा॒ वन॑म्
yo vā̱cā vivā̍co mṛ̱dhravā̍caḥ pu̱rū sa̱hasrāśi̍vā ja̱ghāna̍ |
tatta̱dida̍sya̱ pauṃsya̍ṃ gṛṇīmasi pi̱teva̱ yastavi̍ṣīṃ vāvṛ̱dhe śava̍:
||5||यो वा॒चा विवा॑चो मृ॒ध्रवा॑चः पु॒रू स॒हस्राशि॑वा ज॒घान॑ ।
तत्त॒दिद॑स्य॒ पौंस्यं॑ गृणीमसि पि॒तेव॒ यस्तवि॑षीं वावृ॒धे शव॑:
stoma̍ṃ ta indra vima̱dā a̍jījana̱nnapū̍rvyaṃ puru̱tama̍ṃ su̱dāna̍ve |
vi̱dmā hya̍sya̱ bhoja̍nami̱nasya̱ yadā pa̱śuṃ na go̱pāḥ ka̍rāmahe
||6||स्तोमं॑ त इन्द्र विम॒दा अ॑जीजन॒न्नपू॑र्व्यं पुरु॒तमं॑ सु॒दान॑वे ।
वि॒द्मा ह्य॑स्य॒ भोज॑नमि॒नस्य॒ यदा प॒शुं न गो॒पाः क॑रामहे
māki̍rna e̱nā sa̱khyā vi yau̍ṣu̱stava̍ cendra vima̱dasya̍ ca̱ ṛṣe̍: |
vi̱dmā hi te̱ prama̍tiṃ deva jāmi̱vada̱sme te̍ santu sa̱khyā śi̱vāni̍
||7||माकि॑र्न ए॒ना स॒ख्या वि यौ॑षु॒स्तव॑ चेन्द्र विम॒दस्य॑ च॒ ऋषे॑: ।
वि॒द्मा हि ते॒ प्रम॑तिं देव जामि॒वद॒स्मे ते॑ सन्तु स॒ख्या शि॒वानि॑