Study
- Anukramaṇī
- Source
10 vairūpo nabhaḥ prabhedanaḥ| indraḥ| triṣṭup|
indra̱ piba̍ pratikā̱maṃ su̱tasya̍ prātaḥsā̱vastava̱ hi pū̱rvapī̍tiḥ |
harṣa̍sva̱ hanta̍ve śūra̱ śatrū̍nu̱kthebhi̍ṣṭe vī̱ryā̱3 pra bra̍vāma
||1||इन्द्र॒ पिब॑ प्रतिका॒मं सु॒तस्य॑ प्रातःसा॒वस्तव॒ हि पू॒र्वपी॑तिः ।
हर्ष॑स्व॒ हन्त॑वे शूर॒ शत्रू॑नु॒क्थेभि॑ष्टे वी॒र्या॒३ प्र ब्र॑वाम
yaste̱ ratho̱ mana̍so̱ javī̍yā̱nendra̱ tena̍ soma̱peyā̍ya yāhi |
tūya̱mā te̱ hara̍ya̱: pra dra̍vantu̱ yebhi̱ryāsi̱ vṛṣa̍bhi̱rmanda̍mānaḥ
||2||यस्ते॒ रथो॒ मन॑सो॒ जवी॑या॒नेन्द्र॒ तेन॑ सोम॒पेया॑य याहि ।
तूय॒मा ते॒ हर॑य॒: प्र द्र॑वन्तु॒ येभि॒र्यासि॒ वृष॑भि॒र्मन्द॑मानः
hari̍tvatā̱ varca̍sā̱ sūrya̍sya̱ śreṣṭhai̍ rū̱paista̱nva̍ṃ sparśayasva |
a̱smābhi̍rindra̱ sakhi̍bhirhuvā̱naḥ sa̍dhrīcī̱no mā̍dayasvā ni̱ṣadya̍
||3||हरि॑त्वता॒ वर्च॑सा॒ सूर्य॑स्य॒ श्रेष्ठै॑ रू॒पैस्त॒न्वं॑ स्पर्शयस्व ।
अ॒स्माभि॑रिन्द्र॒ सखि॑भिर्हुवा॒नः स॑ध्रीची॒नो मा॑दयस्वा नि॒षद्य॑
yasya̱ tyatte̍ mahi̱māna̱ṃ made̍ṣvi̱me ma̱hī roda̍sī̱ nāvi̍viktām |
tadoka̱ ā hari̍bhirindra yu̱ktaiḥ pri̱yebhi̍ryāhi pri̱yamanna̱maccha̍
||4||यस्य॒ त्यत्ते॑ महि॒मानं॒ मदे॑ष्वि॒मे म॒ही रोद॑सी॒ नावि॑विक्ताम् ।
तदोक॒ आ हरि॑भिरिन्द्र यु॒क्तैः प्रि॒येभि॑र्याहि प्रि॒यमन्न॒मच्छ॑
yasya̱ śaśva̍tpapi̱vām̐ i̍ndra̱ śatrū̍nanānukṛ̱tyā raṇyā̍ ca̱kartha̍ |
sa te̱ pura̍ṃdhi̱ṃ tavi̍ṣīmiyarti̱ sa te̱ madā̍ya su̱ta i̍ndra̱ soma̍:
||5||यस्य॒ शश्व॑त्पपि॒वाँ इ॑न्द्र॒ शत्रू॑ननानुकृ॒त्या रण्या॑ च॒कर्थ॑ ।
स ते॒ पुरं॑धिं॒ तवि॑षीमियर्ति॒ स ते॒ मदा॑य सु॒त इ॑न्द्र॒ सोम॑:
i̱daṃ te̱ pātra̱ṃ sana̍vittamindra̱ pibā̱ soma̍me̱nā śa̍takrato |
pū̱rṇa ā̍hā̱vo ma̍di̱rasya̱ madhvo̱ yaṃ viśva̱ ida̍bhi̱harya̍nti de̱vāḥ
||6||इ॒दं ते॒ पात्रं॒ सन॑वित्तमिन्द्र॒ पिबा॒ सोम॑मे॒ना श॑तक्रतो ।
पू॒र्ण आ॑हा॒वो म॑दि॒रस्य॒ मध्वो॒ यं विश्व॒ इद॑भि॒हर्य॑न्ति दे॒वाः
vi hi tvāmi̍ndra puru̱dhā janā̍so hi̱tapra̍yaso vṛṣabha̱ hvaya̍nte |
a̱smāka̍ṃ te̱ madhu̍mattamānī̱mā bhu̍va̱ntsava̍nā̱ teṣu̍ harya
||7||वि हि त्वामि॑न्द्र पुरु॒धा जना॑सो हि॒तप्र॑यसो वृषभ॒ ह्वय॑न्ते ।
अ॒स्माकं॑ ते॒ मधु॑मत्तमानी॒मा भु॑व॒न्त्सव॑ना॒ तेषु॑ हर्य
pra ta̍ indra pū̱rvyāṇi̱ pra nū̱naṃ vī̱ryā̍ vocaṃ pratha̱mā kṛ̱tāni̍ |
sa̱tī̱nama̍nyuraśrathāyo̱ adri̍ṃ suveda̱nāma̍kṛṇo̱rbrahma̍ṇe̱ gām
||8||प्र त॑ इन्द्र पू॒र्व्याणि॒ प्र नू॒नं वी॒र्या॑ वोचं प्रथ॒मा कृ॒तानि॑ ।
स॒ती॒नम॑न्युरश्रथायो॒ अद्रिं॑ सुवेद॒नाम॑कृणो॒र्ब्रह्म॑णे॒ गाम्
ni ṣu sī̍da gaṇapate ga̱ṇeṣu̱ tvāmā̍hu̱rvipra̍tamaṃ kavī̱nām |
na ṛ̱te tvatkri̍yate̱ kiṃ ca̱nāre ma̱hāma̱rkaṃ ma̍ghavañci̱trama̍rca
||9||नि षु सी॑द गणपते ग॒णेषु॒ त्वामा॑हु॒र्विप्र॑तमं कवी॒नाम् ।
न ऋ॒ते त्वत्क्रि॑यते॒ किं च॒नारे म॒हाम॒र्कं म॑घवञ्चि॒त्रम॑र्च
a̱bhi̱khyā no̍ maghava̱nnādha̍mānā̱ntsakhe̍ bo̱dhi va̍supate̱ sakhī̍nām |
raṇa̍ṃ kṛdhi raṇakṛtsatyaśu̱ṣmā'bha̍kte ci̱dā bha̍jā rā̱ye a̱smān
||10||अ॒भि॒ख्या नो॑ मघव॒न्नाध॑माना॒न्त्सखे॑ बो॒धि व॑सुपते॒ सखी॑नाम् ।
रणं॑ कृधि रणकृत्सत्यशु॒ष्माऽभ॑क्ते चि॒दा भ॑जा रा॒ये अ॒स्मान्