Study
- Anukramaṇī
- Source
7 trita āptyaḥ| agniḥ| triṣṭup|
a̱yaṃ sa yasya̱ śarma̱nnavo̍bhira̱gneredha̍te jari̱tābhiṣṭau̍ |
jyeṣṭhe̍bhi̱ryo bhā̱nubhi̍ṝṣū̱ṇāṃ pa̱ryeti̱ pari̍vīto vi̱bhāvā̍
||1||अ॒यं स यस्य॒ शर्म॒न्नवो॑भिर॒ग्नेरेध॑ते जरि॒ताभिष्टौ॑ ।
ज्येष्ठे॑भि॒र्यो भा॒नुभि॑ॠषू॒णां प॒र्येति॒ परि॑वीतो वि॒भावा॑
yo bhā̱nubhi̍rvi̱bhāvā̍ vi̱bhātya̱gnirde̱vebhi̍ṝ̱tāvāja̍sraḥ |
ā yo vi̱vāya̍ sa̱khyā sakhi̱bhyo'pa̍rihvṛto̱ atyo̱ na sapti̍:
||2||यो भा॒नुभि॑र्वि॒भावा॑ वि॒भात्य॒ग्निर्दे॒वेभि॑ॠ॒तावाज॑स्रः ।
आ यो वि॒वाय॑ स॒ख्या सखि॒भ्योऽप॑रिह्वृतो॒ अत्यो॒ न सप्ति॑:
īśe̱ yo viśva̍syā de̱vavī̍te̱rīśe̍ vi̱śvāyu̍ru̱ṣaso̱ vyu̍ṣṭau | ā yasmi̍nma̱nā ha̱vīṃṣya̱gnāvari̍ṣṭarathaḥ ska̱bhnāti̍ śū̱ṣaiḥ
||3||ईशे॒ यो विश्व॑स्या दे॒ववी॑ते॒रीशे॑ वि॒श्वायु॑रु॒षसो॒ व्यु॑ष्टौ । आ यस्मि॑न्म॒ना ह॒वींष्य॒ग्नावरि॑ष्टरथः स्क॒भ्नाति॑ शू॒षैः
śū̱ṣebhi̍rvṛ̱dho ju̍ṣā̱ṇo a̱rkairde̱vām̐ acchā̍ raghu̱patvā̍ jigāti |
ma̱ndro hotā̱ sa ju̱hvā̱3 yaji̍ṣṭha̱: sammi̍ślo a̱gnirā ji̍gharti de̱vān
||4||शू॒षेभि॑र्वृ॒धो जु॑षा॒णो अ॒र्कैर्दे॒वाँ अच्छा॑ रघु॒पत्वा॑ जिगाति ।
म॒न्द्रो होता॒ स जु॒ह्वा॒३ यजि॑ष्ठ॒: सम्मि॑श्लो अ॒ग्निरा जि॑घर्ति दे॒वान्
tamu̱srāmindra̱ṃ na reja̍mānama̱gniṃ gī̱rbhirnamo̍bhi̱rā kṛ̍ṇudhvam |
ā yaṃ viprā̍so ma̱tibhi̍rgṛ̱ṇanti̍ jā̱tave̍dasaṃ ju̱hva̍ṃ sa̱hānā̍m
||5||तमु॒स्रामिन्द्रं॒ न रेज॑मानम॒ग्निं गी॒र्भिर्नमो॑भि॒रा कृ॑णुध्वम् ।
आ यं विप्रा॑सो म॒तिभि॑र्गृ॒णन्ति॑ जा॒तवे॑दसं जु॒ह्वं॑ स॒हाना॑म्
saṃ yasmi̱nviśvā̱ vasū̍ni ja̱gmurvāje̱ nāśvā̱: saptī̍vanta̱ evai̍: |
a̱sme ū̱tīrindra̍vātatamā arvācī̱nā a̍gna̱ ā kṛ̍ṇuṣva
||6||सं यस्मि॒न्विश्वा॒ वसू॑नि ज॒ग्मुर्वाजे॒ नाश्वा॒: सप्ती॑वन्त॒ एवै॑: ।
अ॒स्मे ऊ॒तीरिन्द्र॑वाततमा अर्वाची॒ना अ॑ग्न॒ आ कृ॑णुष्व
adhā̱ hya̍gne ma̱hnā ni̱ṣadyā̍ sa̱dyo ja̍jñā̱no havyo̍ ba̱bhūtha̍ |
taṃ te̍ de̱vāso̱ anu̱ keta̍māya̱nnadhā̍vardhanta pratha̱māsa̱ ūmā̍:
||7||अधा॒ ह्य॑ग्ने म॒ह्ना नि॒षद्या॑ स॒द्यो ज॑ज्ञा॒नो हव्यो॑ ब॒भूथ॑ ।
तं ते॑ दे॒वासो॒ अनु॒ केत॑माय॒न्नधा॑वर्धन्त प्रथ॒मास॒ ऊमा॑: