Study
- Anukramaṇī
- Source
8 syūmaraśmirbhārgavaḥ| marutaḥ| triṣṭup , 2,5-7 jagatī|
viprā̍so̱ na manma̍bhiḥ svā̱dhyo̍ devā̱vyo̱3 na ya̱jñaiḥ svapna̍saḥ |
rājā̍no̱ na ci̱trāḥ su̍sa̱ṃdṛśa̍: kṣitī̱nāṃ na maryā̍ are̱pasa̍:
||1||विप्रा॑सो॒ न मन्म॑भिः स्वा॒ध्यो॑ देवा॒व्यो॒३ न य॒ज्ञैः स्वप्न॑सः ।
राजा॑नो॒ न चि॒त्राः सु॑सं॒दृश॑: क्षिती॒नां न मर्या॑ अरे॒पस॑:
a̱gnirna ye bhrāja̍sā ru̱kmava̍kṣaso̱ vātā̍so̱ na sva̱yuja̍: sa̱dyaū̍tayaḥ |
pra̱jñā̱tāro̱ na jyeṣṭhā̍: sunī̱taya̍: su̱śarmā̍ṇo̱ na somā̍ ṛ̱taṃ ya̱te
||2||अ॒ग्निर्न ये भ्राज॑सा रु॒क्मव॑क्षसो॒ वाता॑सो॒ न स्व॒युज॑: स॒द्यऊ॑तयः ।
प्र॒ज्ञा॒तारो॒ न ज्येष्ठा॑: सुनी॒तय॑: सु॒शर्मा॑णो॒ न सोमा॑ ऋ॒तं य॒ते
vātā̍so̱ na ye dhuna̍yo jiga̱tnavo̍'gnī̱nāṃ na ji̱hvā vi̍ro̱kiṇa̍: |
varma̍ṇvanto̱ na yo̱dhāḥ śimī̍vantaḥ pitṝ̱ṇāṃ na śaṃsā̍: surā̱taya̍:
||3||वाता॑सो॒ न ये धुन॑यो जिग॒त्नवो॑ऽग्नी॒नां न जि॒ह्वा वि॑रो॒किण॑: ।
वर्म॑ण्वन्तो॒ न यो॒धाः शिमी॑वन्तः पितॄ॒णां न शंसा॑: सुरा॒तय॑:
rathā̍nā̱ṃ na ye̱1rāḥ sanā̍bhayo jigī̱vāṃso̱ na śūrā̍ a̱bhidya̍vaḥ |
va̱re̱yavo̱ na maryā̍ ghṛta̱pruṣo̍'bhisva̱rtāro̍ a̱rkaṃ na su̱ṣṭubha̍:
||4||रथा॑नां॒ न ये॒१राः सना॑भयो जिगी॒वांसो॒ न शूरा॑ अ॒भिद्य॑वः ।
व॒रे॒यवो॒ न मर्या॑ घृत॒प्रुषो॑ऽभिस्व॒र्तारो॑ अ॒र्कं न सु॒ष्टुभ॑:
aśvā̍so̱ na ye jyeṣṭhā̍sa ā̱śavo̍ didhi̱ṣavo̱ na ra̱thya̍: su̱dāna̍vaḥ |
āpo̱ na ni̱mnairu̱dabhi̍rjiga̱tnavo̍ vi̱śvarū̍pā̱ aṅgi̍raso̱ na sāma̍bhiḥ
||5||अश्वा॑सो॒ न ये ज्येष्ठा॑स आ॒शवो॑ दिधि॒षवो॒ न र॒थ्य॑: सु॒दान॑वः ।
आपो॒ न नि॒म्नैरु॒दभि॑र्जिग॒त्नवो॑ वि॒श्वरू॑पा॒ अङ्गि॑रसो॒ न साम॑भिः
grāvā̍ṇo̱ na sū̱raya̱: sindhu̍mātara ādardi̱rāso̱ adra̍yo̱ na vi̱śvahā̍ |
śi̱śūlā̱ na krī̱l̤aya̍: sumā̱taro̍ mahāgrā̱mo na yāma̍nnu̱ta tvi̱ṣā
||6||ग्रावा॑णो॒ न सू॒रय॒: सिन्धु॑मातर आदर्दि॒रासो॒ अद्र॑यो॒ न वि॒श्वहा॑ ।
शि॒शूला॒ न क्री॒ळय॑: सुमा॒तरो॑ महाग्रा॒मो न याम॑न्नु॒त त्वि॒षा
u̱ṣasā̱ṃ na ke̱tavo̍'dhvara̱śriya̍: śubha̱ṃyavo̱ nāñjibhi̱rvya̍śvitan |
sindha̍vo̱ na ya̱yiyo̱ bhrāja̍dṛṣṭayaḥ parā̱vato̱ na yoja̍nāni mamire
||7||उ॒षसां॒ न के॒तवो॑ऽध्वर॒श्रिय॑: शुभं॒यवो॒ नाञ्जिभि॒र्व्य॑श्वितन् ।
सिन्ध॑वो॒ न य॒यियो॒ भ्राज॑दृष्टयः परा॒वतो॒ न योज॑नानि ममिरे
su̱bhā̱gānno̍ devāḥ kṛṇutā su̱ratnā̍na̱smāntsto̱tṝnma̍ruto vāvṛdhā̱nāḥ |
adhi̍ sto̱trasya̍ sa̱khyasya̍ gāta sa̱nāddhi vo̍ ratna̱dheyā̍ni̱ santi̍
||8||सु॒भा॒गान्नो॑ देवाः कृणुता सु॒रत्ना॑न॒स्मान्त्स्तो॒तॄन्म॑रुतो वावृधा॒नाः ।
अधि॑ स्तो॒त्रस्य॑ स॒ख्यस्य॑ गात स॒नाद्धि वो॑ रत्न॒धेया॑नि॒ सन्ति॑