Study
- Anukramaṇī
- Source
11 kṛṣṇa āṅgirasaḥ| indraḥ| jagatī,1-3,10-11 triṣṭup|
ā yā̱tvindra̱: svapa̍ti̱rmadā̍ya̱ yo dharma̍ṇā tūtujā̱nastuvi̍ṣmān |
pra̱tva̱kṣā̱ṇo ati̱ viśvā̱ sahā̍ṃsyapā̱reṇa̍ maha̱tā vṛṣṇye̍na
||1||आ या॒त्विन्द्र॒: स्वप॑ति॒र्मदा॑य॒ यो धर्म॑णा तूतुजा॒नस्तुवि॑ष्मान् ।
प्र॒त्व॒क्षा॒णो अति॒ विश्वा॒ सहां॑स्यपा॒रेण॑ मह॒ता वृष्ण्ये॑न
su̱ṣṭhāmā̱ ratha̍: su̱yamā̱ harī̍ te mi̱myakṣa̱ vajro̍ nṛpate̱ gabha̍stau |
śībha̍ṃ rājantsu̱pathā yā̍hya̱rvāṅvardhā̍ma te pa̱puṣo̱ vṛṣṇyā̍ni
||2||सु॒ष्ठामा॒ रथ॑: सु॒यमा॒ हरी॑ ते मि॒म्यक्ष॒ वज्रो॑ नृपते॒ गभ॑स्तौ ।
शीभं॑ राजन्त्सु॒पथा या॑ह्य॒र्वाङ्वर्धा॑म ते प॒पुषो॒ वृष्ण्या॑नि
endra̱vāho̍ nṛ̱pati̱ṃ vajra̍bāhumu̱gramu̱grāsa̍stavi̱ṣāsa̍ enam |
pratva̍kṣasaṃ vṛṣa̱bhaṃ sa̱tyaśu̍ṣma̱mema̍sma̱trā sa̍dha̱mādo̍ vahantu
||3||एन्द्र॒वाहो॑ नृ॒पतिं॒ वज्र॑बाहुमु॒ग्रमु॒ग्रास॑स्तवि॒षास॑ एनम् ।
प्रत्व॑क्षसं वृष॒भं स॒त्यशु॑ष्म॒मेम॑स्म॒त्रा स॑ध॒मादो॑ वहन्तु
e̱vā pati̍ṃ droṇa̱sāca̱ṃ sace̍tasamū̱rjaḥ ska̱mbhaṃ dha̱ruṇa̱ ā vṛ̍ṣāyase |
oja̍: kṛṣva̱ saṃ gṛ̍bhāya̱ tve apyaso̱ yathā̍ keni̱pānā̍mi̱no vṛ̱dhe
||4||ए॒वा पतिं॑ द्रोण॒साचं॒ सचे॑तसमू॒र्जः स्क॒म्भं ध॒रुण॒ आ वृ॑षायसे ।
ओज॑: कृष्व॒ सं गृ॑भाय॒ त्वे अप्यसो॒ यथा॑ केनि॒पाना॑मि॒नो वृ॒धे
gama̍nna̱sme vasū̱nyā hi śaṃsi̍ṣaṃ svā̱śiṣa̱ṃ bhara̱mā yā̍hi so̱mina̍: |
tvamī̍śiṣe̱ sāsminnā sa̍tsi ba̱rhiṣya̍nādhṛ̱ṣyā tava̱ pātrā̍ṇi̱ dharma̍ṇā
||5||गम॑न्न॒स्मे वसू॒न्या हि शंसि॑षं स्वा॒शिषं॒ भर॒मा या॑हि सो॒मिन॑: ।
त्वमी॑शिषे॒ सास्मिन्ना स॑त्सि ब॒र्हिष्य॑नाधृ॒ष्या तव॒ पात्रा॑णि॒ धर्म॑णा
pṛtha̱kprāya̍npratha̱mā de̱vahū̍ta̱yo'kṛ̍ṇvata śrava̱syā̍ni du̱ṣṭarā̍ |
na ye śe̱kurya̱jñiyā̱ṃ nāva̍mā̱ruha̍mī̱rmaiva te nya̍viśanta̱ kepa̍yaḥ
||6||पृथ॒क्प्राय॑न्प्रथ॒मा दे॒वहू॑त॒योऽकृ॑ण्वत श्रव॒स्या॑नि दु॒ष्टरा॑ ।
न ये शे॒कुर्य॒ज्ञियां॒ नाव॑मा॒रुह॑मी॒र्मैव ते न्य॑विशन्त॒ केप॑यः
e̱vaivāpā̱gapa̍re santu dū̱ḍhyo'śvā̱ yeṣā̍ṃ du̱ryuja̍ āyuyu̱jre |
i̱tthā ye prāgupa̍re̱ santi̍ dā̱vane̍ pu̱rūṇi̱ yatra̍ va̱yunā̍ni̱ bhoja̍nā
||7||ए॒वैवापा॒गप॑रे सन्तु दू॒ढ्योऽश्वा॒ येषां॑ दु॒र्युज॑ आयुयु॒ज्रे ।
इ॒त्था ये प्रागुप॑रे॒ सन्ति॑ दा॒वने॑ पु॒रूणि॒ यत्र॑ व॒युना॑नि॒ भोज॑ना
gi̱rīm̐rajrā̱nreja̍mānām̐ adhāraya̱ddyauḥ kra̍ndada̱ntari̍kṣāṇi kopayat |
sa̱mī̱cī̱ne dhi̱ṣaṇe̱ vi ṣka̍bhāyati̱ vṛṣṇa̍: pī̱tvā mada̍ u̱kthāni̍ śaṃsati
||8||गि॒रीँरज्रा॒न्रेज॑मानाँ अधारय॒द्द्यौः क्र॑न्दद॒न्तरि॑क्षाणि कोपयत् ।
स॒मी॒ची॒ने धि॒षणे॒ वि ष्क॑भायति॒ वृष्ण॑: पी॒त्वा मद॑ उ॒क्थानि॑ शंसति
i̱maṃ bi̍bharmi̱ sukṛ̍taṃ te aṅku̱śaṃ yenā̍ru̱jāsi̍ maghavañchaphā̱ruja̍: |
a̱smintsu te̱ sava̍ne astvo̱kya̍ṃ su̱ta i̱ṣṭau ma̍ghavanbo̱dhyābha̍gaḥ
||9||इ॒मं बि॑भर्मि॒ सुकृ॑तं ते अङ्कु॒शं येना॑रु॒जासि॑ मघवञ्छफा॒रुज॑: ।
अ॒स्मिन्त्सु ते॒ सव॑ने अस्त्वो॒क्यं॑ सु॒त इ॒ष्टौ म॑घवन्बो॒ध्याभ॑गः
gobhi̍ṣṭare̱māma̍tiṃ du̱revā̱ṃ yave̍na̱ kṣudha̍ṃ puruhūta̱ viśvā̍m |
va̱yaṃ rāja̍bhiḥ pratha̱mā dhanā̍nya̱smāke̍na vṛ̱jane̍nā jayema
||10||गोभि॑ष्टरे॒माम॑तिं दु॒रेवां॒ यवे॑न॒ क्षुधं॑ पुरुहूत॒ विश्वा॑म् ।
व॒यं राज॑भिः प्रथ॒मा धना॑न्य॒स्माके॑न वृ॒जने॑ना जयेम
bṛha̱spati̍rna̱: pari̍ pātu pa̱ścādu̱totta̍rasmā̱dadha̍rādaghā̱yoḥ |
indra̍: pu̱rastā̍du̱ta ma̍dhya̱to na̱: sakhā̱ sakhi̍bhyo̱ vari̍vaḥ kṛṇotu
||11||बृह॒स्पति॑र्न॒: परि॑ पातु प॒श्चादु॒तोत्त॑रस्मा॒दध॑रादघा॒योः ।
इन्द्र॑: पु॒रस्ता॑दु॒त म॑ध्य॒तो न॒: सखा॒ सखि॑भ्यो॒ वरि॑वः कृणोतु