Study
- Anukramaṇī
- Source
10 vairūpaḥ śataprabhedanaḥ| indraḥ| jagatī, 10 triṣṭup|
tama̍sya̱ dyāvā̍pṛthi̱vī sace̍tasā̱ viśve̍bhirde̱vairanu̱ śuṣma̍māvatām |
yadaitkṛ̍ṇvā̱no ma̍hi̱māna̍mindri̱yaṃ pī̱tvī soma̍sya̱ kratu̍mām̐ avardhata
||1||तम॑स्य॒ द्यावा॑पृथि॒वी सचे॑तसा॒ विश्वे॑भिर्दे॒वैरनु॒ शुष्म॑मावताम् ।
यदैत्कृ॑ण्वा॒नो म॑हि॒मान॑मिन्द्रि॒यं पी॒त्वी सोम॑स्य॒ क्रतु॑माँ अवर्धत
tama̍sya̱ viṣṇu̍rmahi̱māna̱moja̍sā̱ṃ'śuṃ da̍dha̱nvānmadhu̍no̱ vi ra̍pśate |
de̱vebhi̱rindro̍ ma̱ghavā̍ sa̱yāva̍bhirvṛ̱traṃ ja̍gha̱nvām̐ a̍bhava̱dvare̍ṇyaḥ
||2||तम॑स्य॒ विष्णु॑र्महि॒मान॒मोज॑सां॒ऽशुं द॑ध॒न्वान्मधु॑नो॒ वि र॑प्शते ।
दे॒वेभि॒रिन्द्रो॑ म॒घवा॑ स॒याव॑भिर्वृ॒त्रं ज॑घ॒न्वाँ अ॑भव॒द्वरे॑ण्यः
vṛ̱treṇa̱ yadahi̍nā̱ bibhra̱dāyu̍dhā sa̱masthi̍thā yu̱dhaye̱ śaṃsa̍mā̱vide̍ |
viśve̍ te̱ atra̍ ma̱ruta̍: sa̱ha tmanā'va̍rdhannugra mahi̱māna̍mindri̱yam
||3||वृ॒त्रेण॒ यदहि॑ना॒ बिभ्र॒दायु॑धा स॒मस्थि॑था यु॒धये॒ शंस॑मा॒विदे॑ ।
विश्वे॑ ते॒ अत्र॑ म॒रुत॑: स॒ह त्मनाऽव॑र्धन्नुग्र महि॒मान॑मिन्द्रि॒यम्
ja̱jñā̱na e̱va vya̍bādhata̱ spṛdha̱: prāpa̍śyadvī̱ro a̱bhi pauṃsya̱ṃ raṇa̍m |
avṛ̍śca̱dadri̱mava̍ sa̱syada̍: sṛja̱dasta̍bhnā̱nnāka̍ṃ svapa̱syayā̍ pṛ̱thum
||4||ज॒ज्ञा॒न ए॒व व्य॑बाधत॒ स्पृध॒: प्राप॑श्यद्वी॒रो अ॒भि पौंस्यं॒ रण॑म् ।
अवृ॑श्च॒दद्रि॒मव॑ स॒स्यद॑: सृज॒दस्त॑भ्ना॒न्नाकं॑ स्वप॒स्यया॑ पृ॒थुम्
ādindra̍: sa̱trā tavi̍ṣīrapatyata̱ varī̍yo̱ dyāvā̍pṛthi̱vī a̍bādhata |
avā̍bharaddhṛṣi̱to vajra̍māya̱saṃ śeva̍ṃ mi̱trāya̱ varu̍ṇāya dā̱śuṣe̍
||5||आदिन्द्र॑: स॒त्रा तवि॑षीरपत्यत॒ वरी॑यो॒ द्यावा॑पृथि॒वी अ॑बाधत ।
अवा॑भरद्धृषि॒तो वज्र॑माय॒सं शेवं॑ मि॒त्राय॒ वरु॑णाय दा॒शुषे॑
indra̱syātra̱ tavi̍ṣībhyo vira̱pśina̍ ṛghāya̱to a̍raṃhayanta ma̱nyave̍ |
vṛ̱traṃ yadu̱gro vyavṛ̍śca̱doja̍sā̱'po bibhra̍ta̱ṃ tama̍sā̱ parī̍vṛtam
||6||इन्द्र॒स्यात्र॒ तवि॑षीभ्यो विर॒प्शिन॑ ऋघाय॒तो अ॑रंहयन्त म॒न्यवे॑ ।
वृ॒त्रं यदु॒ग्रो व्यवृ॑श्च॒दोज॑सा॒ऽपो बिभ्र॑तं॒ तम॑सा॒ परी॑वृतम्
yā vī̱ryā̍ṇi pratha̱māni̱ kartvā̍ mahi̱tvebhi̱ryata̍mānau samī̱yatu̍: |
dhvā̱ntaṃ tamo'va̍ dadhvase ha̱ta indro̍ ma̱hnā pū̱rvahū̍tāvapatyata
||7||या वी॒र्या॑णि प्रथ॒मानि॒ कर्त्वा॑ महि॒त्वेभि॒र्यत॑मानौ समी॒यतु॑: ।
ध्वा॒न्तं तमोऽव॑ दध्वसे ह॒त इन्द्रो॑ म॒ह्ना पू॒र्वहू॑तावपत्यत
viśve̍ de̱vāso̱ adha̱ vṛṣṇyā̍ni̱ te'va̍rdhaya̱ntsoma̍vatyā vaca̱syayā̍ |
ra̱ddhaṃ vṛ̱tramahi̱mindra̍sya̱ hanma̍nā̱'gnirna jambhai̍stṛ̱ṣvanna̍māvayat
||8||विश्वे॑ दे॒वासो॒ अध॒ वृष्ण्या॑नि॒ तेऽव॑र्धय॒न्त्सोम॑वत्या वच॒स्यया॑ ।
र॒द्धं वृ॒त्रमहि॒मिन्द्र॑स्य॒ हन्म॑ना॒ऽग्निर्न जम्भै॑स्तृ॒ष्वन्न॑मावयत्
bhūri̱ dakṣe̍bhirvaca̱nebhi̱ṝkva̍bhiḥ sa̱khyebhi̍: sa̱khyāni̱ pra vo̍cata |
indro̱ dhuni̍ṃ ca̱ cumu̍riṃ ca da̱mbhaya̍ñchraddhāmana̱syā śṛ̍ṇute da̱bhīta̍ye
||9||भूरि॒ दक्षे॑भिर्वच॒नेभि॒ॠक्व॑भिः स॒ख्येभि॑: स॒ख्यानि॒ प्र वो॑चत ।
इन्द्रो॒ धुनिं॑ च॒ चुमु॑रिं च द॒म्भय॑ञ्छ्रद्धामन॒स्या शृ॑णुते द॒भीत॑ये
tvaṃ pu̱rūṇyā bha̍rā̱ svaśvyā̱ yebhi̱rmaṃsai̍ ni̱vaca̍nāni̱ śaṃsa̍n |
su̱gebhi̱rviśvā̍ duri̱tā ta̍rema vi̱do ṣu ṇa̍ urvi̱yā gā̱dhama̱dya
||10||त्वं पु॒रूण्या भ॑रा॒ स्वश्व्या॒ येभि॒र्मंसै॑ नि॒वच॑नानि॒ शंस॑न् ।
सु॒गेभि॒र्विश्वा॑ दुरि॒ता त॑रेम वि॒दो षु ण॑ उर्वि॒या गा॒धम॒द्य