Study
- Anukramaṇī
- Source
5 suvedāḥ śairīṣiḥ| indraḥ| jagatī, 5 triṣṭup|
śratte̍ dadhāmi pratha̱māya̍ ma̱nyave'ha̱nyadvṛ̱traṃ narya̍ṃ vi̱vera̱paḥ |
u̱bhe yattvā̱ bhava̍to̱ roda̍sī̱ anu̱ reja̍te̱ śuṣmā̍tpṛthi̱vī ci̍dadrivaḥ
||1||श्रत्ते॑ दधामि प्रथ॒माय॑ म॒न्यवेऽह॒न्यद्वृ॒त्रं नर्यं॑ वि॒वेर॒पः ।
उ॒भे यत्त्वा॒ भव॑तो॒ रोद॑सी॒ अनु॒ रेज॑ते॒ शुष्मा॑त्पृथि॒वी चि॑दद्रिवः
tvaṃ mā̱yābhi̍ranavadya mā̱yina̍ṃ śravasya̱tā mana̍sā vṛ̱trama̍rdayaḥ |
tvāminnaro̍ vṛṇate̱ gavi̍ṣṭiṣu̱ tvāṃ viśvā̍su̱ havyā̱sviṣṭi̍ṣu
||2||त्वं मा॒याभि॑रनवद्य मा॒यिनं॑ श्रवस्य॒ता मन॑सा वृ॒त्रम॑र्दयः ।
त्वामिन्नरो॑ वृणते॒ गवि॑ष्टिषु॒ त्वां विश्वा॑सु॒ हव्या॒स्विष्टि॑षु
aiṣu̍ cākandhi puruhūta sū̱riṣu̍ vṛ̱dhāso̱ ye ma̍ghavannāna̱śurma̱gham |
arca̍nti to̱ke tana̍ye̱ pari̍ṣṭiṣu me̱dhasā̍tā vā̱jina̱mahra̍ye̱ dhane̍
||3||ऐषु॑ चाकन्धि पुरुहूत सू॒रिषु॑ वृ॒धासो॒ ये म॑घवन्नान॒शुर्म॒घम् ।
अर्च॑न्ति तो॒के तन॑ये॒ परि॑ष्टिषु मे॒धसा॑ता वा॒जिन॒मह्र॑ये॒ धने॑
sa innu rā̱yaḥ subhṛ̍tasya cākana̱nmada̱ṃ yo a̍sya̱ raṃhya̱ṃ cike̍tati |
tvāvṛ̍dho maghavandā̱śva̍dhvaro ma̱kṣū sa vāja̍ṃ bharate̱ dhanā̱ nṛbhi̍:
||4||स इन्नु रा॒यः सुभृ॑तस्य चाकन॒न्मदं॒ यो अ॑स्य॒ रंह्यं॒ चिके॑तति ।
त्वावृ॑धो मघवन्दा॒श्व॑ध्वरो म॒क्षू स वाजं॑ भरते॒ धना॒ नृभि॑:
tvaṃ śardhā̍ya mahi̱nā gṛ̍ṇā̱na u̱ru kṛ̍dhi maghavañcha̱gdhi rā̱yaḥ |
tvaṃ no̍ mi̱tro varu̍ṇo̱ na mā̱yī pi̱tvo na da̍sma dayase vibha̱ktā
||5||त्वं शर्धा॑य महि॒ना गृ॑णा॒न उ॒रु कृ॑धि मघवञ्छ॒ग्धि रा॒यः ।
त्वं नो॑ मि॒त्रो वरु॑णो॒ न मा॒यी पि॒त्वो न द॑स्म दयसे विभ॒क्ता