Study
- Anukramaṇī
- Source
11 aṣṭako vaiśvāmitraḥ| indraḥ| triṣṭup|
asā̍vi̱ soma̍: puruhūta̱ tubhya̱ṃ hari̍bhyāṃ ya̱jñamupa̍ yāhi̱ tūya̍m |
tubhya̱ṃ giro̱ vipra̍vīrā iyā̱nā da̍dhanvi̱ra i̍ndra̱ pibā̍ su̱tasya̍
||1||असा॑वि॒ सोम॑: पुरुहूत॒ तुभ्यं॒ हरि॑भ्यां य॒ज्ञमुप॑ याहि॒ तूय॑म् ।
तुभ्यं॒ गिरो॒ विप्र॑वीरा इया॒ना द॑धन्वि॒र इ॑न्द्र॒ पिबा॑ सु॒तस्य॑
a̱psu dhū̱tasya̍ hariva̱: pibe̱ha nṛbhi̍: su̱tasya̍ ja̱ṭhara̍ṃ pṛṇasva |
mi̱mi̱kṣuryamadra̍ya indra̱ tubhya̱ṃ tebhi̍rvardhasva̱ mada̍mukthavāhaḥ
||2||अ॒प्सु धू॒तस्य॑ हरिव॒: पिबे॒ह नृभि॑: सु॒तस्य॑ ज॒ठरं॑ पृणस्व ।
मि॒मि॒क्षुर्यमद्र॑य इन्द्र॒ तुभ्यं॒ तेभि॑र्वर्धस्व॒ मद॑मुक्थवाहः
progrāṃ pī̱tiṃ vṛṣṇa̍ iyarmi sa̱tyāṃ pra̱yai su̱tasya̍ haryaśva̱ tubhya̍m |
indra̱ dhenā̍bhiri̱ha mā̍dayasva dhī̱bhirviśvā̍bhi̱: śacyā̍ gṛṇā̱naḥ
||3||प्रोग्रां पी॒तिं वृष्ण॑ इयर्मि स॒त्यां प्र॒यै सु॒तस्य॑ हर्यश्व॒ तुभ्य॑म् ।
इन्द्र॒ धेना॑भिरि॒ह मा॑दयस्व धी॒भिर्विश्वा॑भि॒: शच्या॑ गृणा॒नः
ū̱tī śa̍cīva̱stava̍ vī̱rye̍ṇa̱ vayo̱ dadhā̍nā u̱śija̍ ṛta̱jñāḥ |
pra̱jāva̍dindra̱ manu̍ṣo duro̱ṇe ta̱sthurgṛ̱ṇanta̍: sadha̱mādyā̍saḥ
||4||ऊ॒ती श॑चीव॒स्तव॑ वी॒र्ये॑ण॒ वयो॒ दधा॑ना उ॒शिज॑ ऋत॒ज्ञाः ।
प्र॒जाव॑दिन्द्र॒ मनु॑षो दुरो॒णे त॒स्थुर्गृ॒णन्त॑: सध॒माद्या॑सः
praṇī̍tibhiṣṭe haryaśva su̱ṣṭoḥ su̍ṣu̱mnasya̍ puru̱ruco̱ janā̍saḥ |
maṃhi̍ṣṭhāmū̱tiṃ vi̱tire̱ dadhā̍nā sto̱tāra̍ indra̱ tava̍ sū̱nṛtā̍bhiḥ
||5||प्रणी॑तिभिष्टे हर्यश्व सु॒ष्टोः सु॑षु॒म्नस्य॑ पुरु॒रुचो॒ जना॑सः ।
मंहि॑ष्ठामू॒तिं वि॒तिरे॒ दधा॑ना स्तो॒तार॑ इन्द्र॒ तव॑ सू॒नृता॑भिः
upa̱ brahmā̍ṇi harivo̱ hari̍bhyā̱ṃ soma̍sya yāhi pī̱taye̍ su̱tasya̍ |
indra̍ tvā ya̱jñaḥ kṣama̍māṇamānaḍdā̱śvām̐ a̍syadhva̱rasya̍ prake̱taḥ
||6||उप॒ ब्रह्मा॑णि हरिवो॒ हरि॑भ्यां॒ सोम॑स्य याहि पी॒तये॑ सु॒तस्य॑ ।
इन्द्र॑ त्वा य॒ज्ञः क्षम॑माणमानड्दा॒श्वाँ अ॑स्यध्व॒रस्य॑ प्रके॒तः
sa̱hasra̍vājamabhimāti̱ṣāha̍ṃ su̱tera̍ṇaṃ ma̱ghavā̍naṃ suvṛ̱ktim |
upa̍ bhūṣanti̱ giro̱ apra̍tīta̱mindra̍ṃ nama̱syā ja̍ri̱tuḥ pa̍nanta
||7||स॒हस्र॑वाजमभिमाति॒षाहं॑ सु॒तेर॑णं म॒घवा॑नं सुवृ॒क्तिम् ।
उप॑ भूषन्ति॒ गिरो॒ अप्र॑तीत॒मिन्द्रं॑ नम॒स्या ज॑रि॒तुः प॑नन्त
sa̱ptāpo̍ de̱vīḥ su̱raṇā̱ amṛ̍ktā̱ yābhi̱: sindhu̱mata̍ra indra pū̱rbhit |
na̱va̱tiṃ sro̱tyā nava̍ ca̱ srava̍ntīrde̱vebhyo̍ gā̱tuṃ manu̍ṣe ca vindaḥ
||8||स॒प्तापो॑ दे॒वीः सु॒रणा॒ अमृ॑क्ता॒ याभि॒: सिन्धु॒मत॑र इन्द्र पू॒र्भित् ।
न॒व॒तिं स्रो॒त्या नव॑ च॒ स्रव॑न्तीर्दे॒वेभ्यो॑ गा॒तुं मनु॑षे च विन्दः
a̱po ma̱hīra̱bhiśa̍steramu̱ñco'jā̍garā̱svadhi̍ de̱va eka̍: |
indra̱ yāstvaṃ vṛ̍tra̱tūrye̍ ca̱kartha̱ tābhi̍rvi̱śvāyu̍sta̱nva̍ṃ pupuṣyāḥ
||9||अ॒पो म॒हीर॒भिश॑स्तेरमु॒ञ्चोऽजा॑गरा॒स्वधि॑ दे॒व एक॑: ।
इन्द्र॒ यास्त्वं वृ॑त्र॒तूर्ये॑ च॒कर्थ॒ ताभि॑र्वि॒श्वायु॑स्त॒न्वं॑ पुपुष्याः
vī̱reṇya̱: kratu̱rindra̍: suśa̱stiru̱tāpi̱ dhenā̍ puruhū̱tamī̍ṭṭe |
ārda̍yadvṛ̱tramakṛ̍ṇodu lo̱kaṃ sa̍sā̱he śa̱kraḥ pṛta̍nā abhi̱ṣṭiḥ
||10||वी॒रेण्य॒: क्रतु॒रिन्द्र॑: सुश॒स्तिरु॒तापि॒ धेना॑ पुरुहू॒तमी॑ट्टे ।
आर्द॑यद्वृ॒त्रमकृ॑णोदु लो॒कं स॑सा॒हे श॒क्रः पृत॑ना अभि॒ष्टिः
śu̱naṃ hu̍vema ma̱ghavā̍na̱mindra̍ma̱sminbhare̱ nṛta̍ma̱ṃ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṃ vṛ̱trāṇi̍ sa̱ṃjita̱ṃ dhanā̍nām
||11||शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम्