Study
- Anukramaṇī
- Source
15 śāryāto mānavaḥ| viśvedevāḥ| jagatī|
ya̱jñasya̍ vo ra̱thya̍ṃ vi̱śpati̍ṃ vi̱śāṃ hotā̍rama̱ktorati̍thiṃ vi̱bhāva̍sum |
śoca̱ñchuṣkā̍su̱ hari̍ṇīṣu̱ jarbhu̍ra̱dvṛṣā̍ ke̱turya̍ja̱to dyāma̍śāyata
||1||य॒ज्ञस्य॑ वो र॒थ्यं॑ वि॒श्पतिं॑ वि॒शां होता॑रम॒क्तोरति॑थिं वि॒भाव॑सुम् ।
शोच॒ञ्छुष्का॑सु॒ हरि॑णीषु॒ जर्भु॑र॒द्वृषा॑ के॒तुर्य॑ज॒तो द्याम॑शायत
i̱mama̍ñja̱spāmu̱bhaye̍ akṛṇvata dha̱rmāṇa̍ma̱gniṃ vi̱datha̍sya̱ sādha̍nam |
a̱ktuṃ na ya̱hvamu̱ṣasa̍: pu̱rohi̍ta̱ṃ tanū̱napā̍tamaru̱ṣasya̍ niṃsate
||2||इ॒मम॑ञ्ज॒स्पामु॒भये॑ अकृण्वत ध॒र्माण॑म॒ग्निं वि॒दथ॑स्य॒ साध॑नम् ।
अ॒क्तुं न य॒ह्वमु॒षस॑: पु॒रोहि॑तं॒ तनू॒नपा॑तमरु॒षस्य॑ निंसते
bal̤a̍sya nī̱thā vi pa̱ṇeśca̍ manmahe va̱yā a̍sya̱ prahu̍tā āsu̱ratta̍ve |
ya̱dā gho̱rāso̍ amṛta̱tvamāśa̱tādijjana̍sya̱ daivya̍sya carkiran
||3||बळ॑स्य नी॒था वि प॒णेश्च॑ मन्महे व॒या अ॑स्य॒ प्रहु॑ता आसु॒रत्त॑वे ।
य॒दा घो॒रासो॑ अमृत॒त्वमाश॒तादिज्जन॑स्य॒ दैव्य॑स्य चर्किरन्
ṛ̱tasya̱ hi prasi̍ti̱rdyauru̱ru vyaco̱ namo̍ ma̱hya1rama̍ti̱: panī̍yasī |
indro̍ mi̱tro varu̍ṇa̱: saṃ ci̍kitri̱re'tho̱ bhaga̍: savi̱tā pū̱tada̍kṣasaḥ
||4||ऋ॒तस्य॒ हि प्रसि॑ति॒र्द्यौरु॒रु व्यचो॒ नमो॑ म॒ह्य१रम॑ति॒: पनी॑यसी ।
इन्द्रो॑ मि॒त्रो वरु॑ण॒: सं चि॑कित्रि॒रेऽथो॒ भग॑: सवि॒ता पू॒तद॑क्षसः
pra ru̱dreṇa̍ ya̱yinā̍ yanti̱ sindha̍vasti̱ro ma̱hīma̱rama̍tiṃ dadhanvire |
yebhi̱: pari̍jmā pari̱yannu̱ru jrayo̱ vi roru̍vajja̱ṭhare̱ viśva̍mu̱kṣate̍
||5||प्र रु॒द्रेण॑ य॒यिना॑ यन्ति॒ सिन्ध॑वस्ति॒रो म॒हीम॒रम॑तिं दधन्विरे ।
येभि॒: परि॑ज्मा परि॒यन्नु॒रु ज्रयो॒ वि रोरु॑वज्ज॒ठरे॒ विश्व॑मु॒क्षते॑
krā̱ṇā ru̱drā ma̱ruto̍ vi̱śvakṛ̍ṣṭayo di̱vaḥ śye̱nāso̱ asu̍rasya nī̱l̤aya̍: |
tebhi̍ścaṣṭe̱ varu̍ṇo mi̱tro a̍rya̱mendro̍ de̱vebhi̍rarva̱śebhi̱rarva̍śaḥ
||6||क्रा॒णा रु॒द्रा म॒रुतो॑ वि॒श्वकृ॑ष्टयो दि॒वः श्ये॒नासो॒ असु॑रस्य नी॒ळय॑: ।
तेभि॑श्चष्टे॒ वरु॑णो मि॒त्रो अ॑र्य॒मेन्द्रो॑ दे॒वेभि॑रर्व॒शेभि॒रर्व॑शः
indre̱ bhuja̍ṃ śaśamā̱nāsa̍ āśata̱ sūro̱ dṛśī̍ke̱ vṛṣa̍ṇaśca̱ pauṃsye̍ |
pra ye nva̍syā̱rhaṇā̍ tatakṣi̱re yuja̱ṃ vajra̍ṃ nṛ̱ṣada̍neṣu kā̱rava̍:
||7||इन्द्रे॒ भुजं॑ शशमा॒नास॑ आशत॒ सूरो॒ दृशी॑के॒ वृष॑णश्च॒ पौंस्ये॑ ।
प्र ये न्व॑स्या॒र्हणा॑ ततक्षि॒रे युजं॒ वज्रं॑ नृ॒षद॑नेषु का॒रव॑:
sūra̍ści̱dā ha̱rito̍ asya rīrama̱dindrā̱dā kaści̍dbhayata̱ja tavī̍yasaḥ |
bhī̱masya̱ vṛṣṇo̍ ja̱ṭharā̍dabhi̱śvaso̍ di̱vedi̍ve̱ sahu̍riḥ sta̱nnabā̍dhitaḥ
||8||सूर॑श्चि॒दा ह॒रितो॑ अस्य रीरम॒दिन्द्रा॒दा कश्चि॑द्भयत॒ज तवी॑यसः ।
भी॒मस्य॒ वृष्णो॑ ज॒ठरा॑दभि॒श्वसो॑ दि॒वेदि॑वे॒ सहु॑रिः स्त॒न्नबा॑धितः
stoma̍ṃ vo a̱dya ru̱drāya̱ śikva̍se kṣa̱yadvī̍rāya̱ nama̍sā didiṣṭana |
yebhi̍: śi̱vaḥ svavā̍m̐ eva̱yāva̍bhirdi̱vaḥ siṣa̍kti̱ svaya̍śā̱ nikā̍mabhiḥ
||9||स्तोमं॑ वो अ॒द्य रु॒द्राय॒ शिक्व॑से क्ष॒यद्वी॑राय॒ नम॑सा दिदिष्टन ।
येभि॑: शि॒वः स्ववाँ॑ एव॒याव॑भिर्दि॒वः सिष॑क्ति॒ स्वय॑शा॒ निका॑मभिः
te hi pra̱jāyā̱ abha̍ranta̱ vi śravo̱ bṛha̱spati̍rvṛṣa̱bhaḥ soma̍jāmayaḥ |
ya̱jñairatha̍rvā pratha̱mo vi dhā̍rayadde̱vā dakṣai̱rbhṛga̍va̱: saṃ ci̍kitrire
||10||ते हि प्र॒जाया॒ अभ॑रन्त॒ वि श्रवो॒ बृह॒स्पति॑र्वृष॒भः सोम॑जामयः ।
य॒ज्ञैरथ॑र्वा प्रथ॒मो वि धा॑रयद्दे॒वा दक्षै॒र्भृग॑व॒: सं चि॑कित्रिरे
te hi dyāvā̍pṛthi̱vī bhūri̍retasā̱ narā̱śaṃsa̱ścatu̍raṅgo ya̱mo'di̍tiḥ |
de̱vastvaṣṭā̍ draviṇo̱dā ṛ̍bhu̱kṣaṇa̱: pra ro̍da̱sī ma̱ruto̱ viṣṇu̍rarhire
||11||ते हि द्यावा॑पृथि॒वी भूरि॑रेतसा॒ नरा॒शंस॒श्चतु॑रङ्गो य॒मोऽदि॑तिः ।
दे॒वस्त्वष्टा॑ द्रविणो॒दा ऋ॑भु॒क्षण॒: प्र रो॑द॒सी म॒रुतो॒ विष्णु॑रर्हिरे
u̱ta sya na̍ u̱śijā̍murvi̱yā ka̱virahi̍: śṛṇotu bu̱dhnyo̱3 havī̍mani |
sūryā̱māsā̍ vi̱cara̍ntā divi̱kṣitā̍ dhi̱yā śa̍mīnahuṣī a̱sya bo̍dhatam
||12||उ॒त स्य न॑ उ॒शिजा॑मुर्वि॒या क॒विरहि॑: शृणोतु बु॒ध्न्यो॒३ हवी॑मनि ।
सूर्या॒मासा॑ वि॒चर॑न्ता दिवि॒क्षिता॑ धि॒या श॑मीनहुषी अ॒स्य बो॑धतम्
pra na̍: pū̱ṣā ca̱ratha̍ṃ vi̱śvade̍vyo̱'pāṃ napā̍davatu vā̱yuri̱ṣṭaye̍ |
ā̱tmāna̱ṃ vasyo̍ a̱bhi vāta̍marcata̱ tada̍śvinā suhavā̱ yāma̍ni śrutam
||13||प्र न॑: पू॒षा च॒रथं॑ वि॒श्वदे॑व्यो॒ऽपां नपा॑दवतु वा॒युरि॒ष्टये॑ ।
आ॒त्मानं॒ वस्यो॑ अ॒भि वात॑मर्चत॒ तद॑श्विना सुहवा॒ याम॑नि श्रुतम्
vi̱śāmā̱sāmabha̍yānāmadhi̱kṣita̍ṃ gī̱rbhiru̱ svaya̍śasaṃ gṛṇīmasi |
gnābhi̱rviśvā̍bhi̱radi̍timana̱rvaṇa̍ma̱ktoryuvā̍naṃ nṛ̱maṇā̱ adhā̱ pati̍m
||14||वि॒शामा॒सामभ॑यानामधि॒क्षितं॑ गी॒र्भिरु॒ स्वय॑शसं गृणीमसि ।
ग्नाभि॒र्विश्वा॑भि॒रदि॑तिमन॒र्वण॑म॒क्तोर्युवा॑नं नृ॒मणा॒ अधा॒ पति॑म्
rebha̱datra̍ ja̱nuṣā̱ pūrvo̱ aṅgi̍rā̱ grāvā̍ṇa ū̱rdhvā a̱bhi ca̍kṣuradhva̱ram |
yebhi̱rvihā̍yā̱ abha̍vadvicakṣa̱ṇaḥ pātha̍: su̱meka̱ṃ svadhi̍ti̱rvana̍nvati
||15||रेभ॒दत्र॑ ज॒नुषा॒ पूर्वो॒ अङ्गि॑रा॒ ग्रावा॑ण ऊ॒र्ध्वा अ॒भि च॑क्षुरध्व॒रम् ।
येभि॒र्विहा॑या॒ अभ॑वद्विचक्ष॒णः पाथ॑: सु॒मेकं॒ स्वधि॑ति॒र्वन॑न्वति