Study
- Anukramaṇī
- Source
14 devaśravā yāmāyanaḥ| 1-2 saraṇyūḥ,3-6 pūṣā, 7-9 sarasvatī,10-14 āpaḥ, 11-13 somo vā| triṣṭup ,13-14 anuṣṭup, 13 purastādbṛhatī vā|
tvaṣṭā̍ duhi̱tre va̍ha̱tuṃ kṛ̍ṇo̱tītī̱daṃ viśva̱ṃ bhuva̍na̱ṃ same̍ti |
ya̱masya̍ mā̱tā pa̍ryu̱hyamā̍nā ma̱ho jā̱yā viva̍svato nanāśa
||1||त्वष्टा॑ दुहि॒त्रे व॑ह॒तुं कृ॑णो॒तीती॒दं विश्वं॒ भुव॑नं॒ समे॑ति ।
य॒मस्य॑ मा॒ता प॑र्यु॒ह्यमा॑ना म॒हो जा॒या विव॑स्वतो ननाश
apā̍gūhanna̱mṛtā̱ṃ martye̍bhyaḥ kṛ̱tvī sava̍rṇāmadadu̱rviva̍svate |
u̱tāśvinā̍vabhara̱dyattadāsī̱daja̍hādu̱ dvā mi̍thu̱nā sa̍ra̱ṇyūḥ
||2||अपा॑गूहन्न॒मृतां॒ मर्त्ये॑भ्यः कृ॒त्वी सव॑र्णामददु॒र्विव॑स्वते ।
उ॒ताश्विना॑वभर॒द्यत्तदासी॒दज॑हादु॒ द्वा मि॑थु॒ना स॑र॒ण्यूः
pū̱ṣā tve̱taścyā̍vayatu̱ pra vi̱dvānana̍ṣṭapaśu̱rbhuva̍nasya go̱pāḥ |
sa tvai̱tebhya̱: pari̍ dadatpi̱tṛbhyo̱'gnirde̱vebhya̍: suvida̱triye̍bhyaḥ
||3||पू॒षा त्वे॒तश्च्या॑वयतु॒ प्र वि॒द्वानन॑ष्टपशु॒र्भुव॑नस्य गो॒पाः ।
स त्वै॒तेभ्य॒: परि॑ ददत्पि॒तृभ्यो॒ऽग्निर्दे॒वेभ्य॑: सुविद॒त्रिये॑भ्यः
āyu̍rvi̱śvāyu̱: pari̍ pāsati tvā pū̱ṣā tvā̍ pātu̱ prapa̍the pu̱rastā̍t |
yatrāsa̍te su̱kṛto̱ yatra̱ te ya̱yustatra̍ tvā de̱vaḥ sa̍vi̱tā da̍dhātu
||4||आयु॑र्वि॒श्वायु॒: परि॑ पासति त्वा पू॒षा त्वा॑ पातु॒ प्रप॑थे पु॒रस्ता॑त् ।
यत्रास॑ते सु॒कृतो॒ यत्र॒ ते य॒युस्तत्र॑ त्वा दे॒वः स॑वि॒ता द॑धातु
pū̱ṣemā āśā̱ anu̍ veda̱ sarvā̱: so a̱smām̐ abha̍yatamena neṣat |
sva̱sti̱dā āghṛ̍ṇi̱: sarva̍vī̱ro'pra̍yucchanpu̱ra e̍tu prajā̱nan
||5||पू॒षेमा आशा॒ अनु॑ वेद॒ सर्वा॒: सो अ॒स्माँ अभ॑यतमेन नेषत् ।
स्व॒स्ति॒दा आघृ॑णि॒: सर्व॑वी॒रोऽप्र॑युच्छन्पु॒र ए॑तु प्रजा॒नन्
prapa̍the pa̱thāma̍janiṣṭa pū̱ṣā prapa̍the di̱vaḥ prapa̍the pṛthi̱vyāḥ |
u̱bhe a̱bhi pri̱yata̍me sa̱dhasthe̱ ā ca̱ parā̍ ca carati prajā̱nan
||6||प्रप॑थे प॒थाम॑जनिष्ट पू॒षा प्रप॑थे दि॒वः प्रप॑थे पृथि॒व्याः ।
उ॒भे अ॒भि प्रि॒यत॑मे स॒धस्थे॒ आ च॒ परा॑ च चरति प्रजा॒नन्
sara̍svatīṃ deva̱yanto̍ havante̱ sara̍svatīmadhva̱re tā̱yamā̍ne |
sara̍svatīṃ su̱kṛto̍ ahvayanta̱ sara̍svatī dā̱śuṣe̱ vārya̍ṃ dāt
||7||सर॑स्वतीं देव॒यन्तो॑ हवन्ते॒ सर॑स्वतीमध्व॒रे ता॒यमा॑ने ।
सर॑स्वतीं सु॒कृतो॑ अह्वयन्त॒ सर॑स्वती दा॒शुषे॒ वार्यं॑ दात्
sara̍svati̱ yā sa̱ratha̍ṃ ya̱yātha̍ sva̱dhābhi̍rdevi pi̱tṛbhi̱rmada̍ntī |
ā̱sadyā̱sminba̱rhiṣi̍ mādayasvā'namī̱vā iṣa̱ ā dhe̍hya̱sme
||8||सर॑स्वति॒ या स॒रथं॑ य॒याथ॑ स्व॒धाभि॑र्देवि पि॒तृभि॒र्मद॑न्ती ।
आ॒सद्या॒स्मिन्ब॒र्हिषि॑ मादयस्वाऽनमी॒वा इष॒ आ धे॑ह्य॒स्मे
sara̍svatī̱ṃ yāṃ pi̱taro̱ hava̍nte dakṣi̱ṇā ya̱jñama̍bhi̱nakṣa̍māṇāḥ |
sa̱ha̱srā̱rghami̱l̤o atra̍ bhā̱gaṃ rā̱yaspoṣa̱ṃ yaja̍māneṣu dhehi
||9||सर॑स्वतीं॒ यां पि॒तरो॒ हव॑न्ते दक्षि॒णा य॒ज्ञम॑भि॒नक्ष॑माणाः ।
स॒ह॒स्रा॒र्घमि॒ळो अत्र॑ भा॒गं रा॒यस्पोषं॒ यज॑मानेषु धेहि
āpo̍ a̱smānmā̱tara̍: śundhayantu ghṛ̱tena̍ no ghṛta̱pva̍: punantu |
viśva̱ṃ hi ri̱praṃ pra̱vaha̍nti de̱vīrudidā̍bhya̱: śuci̱rā pū̱ta e̍mi
||10||आपो॑ अ॒स्मान्मा॒तर॑: शुन्धयन्तु घृ॒तेन॑ नो घृत॒प्व॑: पुनन्तु ।
विश्वं॒ हि रि॒प्रं प्र॒वह॑न्ति दे॒वीरुदिदा॑भ्य॒: शुचि॒रा पू॒त ए॑मि
dra̱psaśca̍skanda pratha̱mām̐ anu̱ dyūni̱maṃ ca̱ yoni̱manu̱ yaśca̱ pūrva̍: |
sa̱mā̱naṃ yoni̱manu̍ sa̱ṃcara̍ntaṃ dra̱psaṃ ju̍ho̱myanu̍ sa̱pta hotrā̍:
||11||द्र॒प्सश्च॑स्कन्द प्रथ॒माँ अनु॒ द्यूनि॒मं च॒ योनि॒मनु॒ यश्च॒ पूर्व॑: ।
स॒मा॒नं योनि॒मनु॑ सं॒चर॑न्तं द्र॒प्सं जु॑हो॒म्यनु॑ स॒प्त होत्रा॑:
yaste̍ dra̱psaḥ skanda̍ti̱ yaste̍ a̱ṃśurbā̱hucyu̍to dhi̱ṣaṇā̍yā u̱pasthā̍t |
a̱dhva̱ryorvā̱ pari̍ vā̱ yaḥ pa̱vitrā̱ttaṃ te̍ juhomi̱ mana̍sā̱ vaṣa̍ṭkṛtam
||12||यस्ते॑ द्र॒प्सः स्कन्द॑ति॒ यस्ते॑ अं॒शुर्बा॒हुच्यु॑तो धि॒षणा॑या उ॒पस्था॑त् ।
अ॒ध्व॒र्योर्वा॒ परि॑ वा॒ यः प॒वित्रा॒त्तं ते॑ जुहोमि॒ मन॑सा॒ वष॑ट्कृतम्
yaste̍ dra̱psaḥ ska̱nno yaste̍ a̱ṃśura̱vaśca̱ yaḥ pa̱raḥ sru̱cā | a̱yaṃ de̱vo bṛha̱spati̱: saṃ taṃ si̍ñcatu̱ rādha̍se
||13||यस्ते॑ द्र॒प्सः स्क॒न्नो यस्ते॑ अं॒शुर॒वश्च॒ यः प॒रः स्रु॒चा । अ॒यं दे॒वो बृह॒स्पति॒: सं तं सि॑ञ्चतु॒ राध॑से
paya̍svatī̱roṣa̍dhaya̱: paya̍svanmāma̱kaṃ vaca̍: | a̱pāṃ paya̍sva̱ditpaya̱stena̍ mā sa̱ha śu̍ndhata
||14||पय॑स्वती॒रोष॑धय॒: पय॑स्वन्माम॒कं वच॑: । अ॒पां पय॑स्व॒दित्पय॒स्तेन॑ मा स॒ह शु॑न्धत