Study
- Anukramaṇī
- Source
7 sudāḥ paijavanaḥ| indraḥ|śakkarī, 4-6 mahāpaṃktiḥ, 7 triṣṭup|
pro ṣva̍smai purora̱thamindrā̍ya śū̱ṣama̍rcata |
a̱bhīke̍ cidu loka̱kṛtsa̱ṃge sa̱matsu̍ vṛtra̱hā'smāka̍ṃ bodhi codi̱tā nabha̍ntāmanya̱keṣā̍ṃ jyā̱kā adhi̱ dhanva̍su
||1||प्रो ष्व॑स्मै पुरोर॒थमिन्द्रा॑य शू॒षम॑र्चत ।
अ॒भीके॑ चिदु लोक॒कृत्सं॒गे स॒मत्सु॑ वृत्र॒हाऽस्माकं॑ बोधि चोदि॒ता नभ॑न्तामन्य॒केषां॑ ज्या॒का अधि॒ धन्व॑सु
tvaṃ sindhū̱m̐ravā̍sṛjo'dha̱rāco̱ aha̱nnahi̍m |
a̱śa̱truri̍ndra jajñiṣe̱ viśva̍ṃ puṣyasi̱ vārya̱ṃ taṃ tvā̱ pari̍ ṣvajāmahe̱ nabha̍ntāmanya̱keṣā̍ṃ jyā̱kā adhi̱ dhanva̍su
||2||त्वं सिन्धूँ॒रवा॑सृजोऽध॒राचो॒ अह॒न्नहि॑म् ।
अ॒श॒त्रुरि॑न्द्र जज्ञिषे॒ विश्वं॑ पुष्यसि॒ वार्यं॒ तं त्वा॒ परि॑ ष्वजामहे॒ नभ॑न्तामन्य॒केषां॑ ज्या॒का अधि॒ धन्व॑सु
vi ṣu viśvā̱ arā̍tayo̱'ryo na̍śanta no̱ dhiya̍: |
astā̍si̱ śatra̍ve va̱dhaṃ yo na̍ indra̱ jighā̍ṃsati̱ yā te̍ rā̱tirda̱dirvasu̱ nabha̍ntāmanya̱keṣā̍ṃ jyā̱kā adhi̱ dhanva̍su
||3||वि षु विश्वा॒ अरा॑तयो॒ऽर्यो न॑शन्त नो॒ धिय॑: ।
अस्ता॑सि॒ शत्र॑वे व॒धं यो न॑ इन्द्र॒ जिघां॑सति॒ या ते॑ रा॒तिर्द॒दिर्वसु॒ नभ॑न्तामन्य॒केषां॑ ज्या॒का अधि॒ धन्व॑सु
yo na̍ indrā̱bhito̱ jano̍ vṛkā̱yurā̱dide̍śati |
a̱dha̱spa̱daṃ tamī̍ṃ kṛdhi vibā̱dho a̍si sāsa̱hirnabha̍ntāmanya̱keṣā̍ṃ jyā̱kā adhi̱ dhanva̍su
||4||यो न॑ इन्द्रा॒भितो॒ जनो॑ वृका॒युरा॒दिदे॑शति ।
अ॒ध॒स्प॒दं तमीं॑ कृधि विबा॒धो अ॑सि सास॒हिर्नभ॑न्तामन्य॒केषां॑ ज्या॒का अधि॒ धन्व॑सु
yo na̍ indrābhi̱dāsa̍ti̱ sanā̍bhi̱ryaśca̱ niṣṭya̍: |
ava̱ tasya̱ bala̍ṃ tira ma̱hīva̱ dyauradha̱ tmanā̱ nabha̍ntāmanya̱keṣā̍ṃ jyā̱kā adhi̱ dhanva̍su
||5||यो न॑ इन्द्राभि॒दास॑ति॒ सना॑भि॒र्यश्च॒ निष्ट्य॑: ।
अव॒ तस्य॒ बलं॑ तिर म॒हीव॒ द्यौरध॒ त्मना॒ नभ॑न्तामन्य॒केषां॑ ज्या॒का अधि॒ धन्व॑सु
va̱yami̍ndra tvā̱yava̍: sakhi̱tvamā ra̍bhāmahe |
ṛ̱tasya̍ naḥ pa̱thā na̱yā'ti̱ viśvā̍ni duri̱tā nabha̍ntāmanya̱keṣā̍ṃ jyā̱kā adhi̱ dhanva̍su
||6||व॒यमि॑न्द्र त्वा॒यव॑: सखि॒त्वमा र॑भामहे ।
ऋ॒तस्य॑ नः प॒था न॒याऽति॒ विश्वा॑नि दुरि॒ता नभ॑न्तामन्य॒केषां॑ ज्या॒का अधि॒ धन्व॑सु
a̱smabhya̱ṃ su tvami̍ndra̱ tāṃ śi̍kṣa̱ yā doha̍te̱ prati̱ vara̍ṃ jari̱tre |
acchi̍drodhnī pī̱paya̱dyathā̍ naḥ sa̱hasra̍dhārā̱ paya̍sā ma̱hī gauḥ
||7||अ॒स्मभ्यं॒ सु त्वमि॑न्द्र॒ तां शि॑क्ष॒ या दोह॑ते॒ प्रति॒ वरं॑ जरि॒त्रे ।
अच्छि॑द्रोध्नी पी॒पय॒द्यथा॑ नः स॒हस्र॑धारा॒ पय॑सा म॒ही गौः