Study
- Anukramaṇī
- Source
17 gayaḥ plātaḥ| viśve devāḥ, 15-16 pathyā svastiḥ| jagatī, 15 triṣṭubvā; 16-17 triṣṭup|
pa̱rā̱vato̱ ye didhi̍ṣanta̱ āpya̱ṃ manu̍prītāso̱ jani̍mā vi̱vasva̍taḥ |
ya̱yāte̱rye na̍hu̱ṣya̍sya ba̱rhiṣi̍ de̱vā āsa̍te̱ te adhi̍ bruvantu naḥ
||1||प॒रा॒वतो॒ ये दिधि॑षन्त॒ आप्यं॒ मनु॑प्रीतासो॒ जनि॑मा वि॒वस्व॑तः ।
य॒याते॒र्ये न॑हु॒ष्य॑स्य ब॒र्हिषि॑ दे॒वा आस॑ते॒ ते अधि॑ ब्रुवन्तु नः
viśvā̱ hi vo̍ nama̱syā̍ni̱ vandyā̱ nāmā̍ni devā u̱ta ya̱jñiyā̍ni vaḥ |
ye stha jā̱tā adi̍tera̱dbhyaspari̱ ye pṛ̍thi̱vyāste ma̍ i̱ha śru̍tā̱ hava̍m
||2||विश्वा॒ हि वो॑ नम॒स्या॑नि॒ वन्द्या॒ नामा॑नि देवा उ॒त य॒ज्ञिया॑नि वः ।
ये स्थ जा॒ता अदि॑तेर॒द्भ्यस्परि॒ ये पृ॑थि॒व्यास्ते म॑ इ॒ह श्रु॑ता॒ हव॑म्
yebhyo̍ mā̱tā madhu̍ma̱tpinva̍te̱ paya̍: pī̱yūṣa̱ṃ dyauradi̍ti̱radri̍barhāḥ |
u̱kthaśu̍ṣmānvṛṣabha̱rāntsvapna̍sa̱stām̐ ā̍di̱tyām̐ anu̍ madā sva̱staye̍
||3||येभ्यो॑ मा॒ता मधु॑म॒त्पिन्व॑ते॒ पय॑: पी॒यूषं॒ द्यौरदि॑ति॒रद्रि॑बर्हाः ।
उ॒क्थशु॑ष्मान्वृषभ॒रान्त्स्वप्न॑स॒स्ताँ आ॑दि॒त्याँ अनु॑ मदा स्व॒स्तये॑
nṛ̱cakṣa̍so̱ ani̍miṣanto a̱rhaṇā̍ bṛ̱hadde̱vāso̍ amṛta̱tvamā̍naśuḥ |
jyo̱tīra̍thā̱ ahi̍māyā̱ anā̍gaso di̱vo va̱rṣmāṇa̍ṃ vasate sva̱staye̍
||4||नृ॒चक्ष॑सो॒ अनि॑मिषन्तो अ॒र्हणा॑ बृ॒हद्दे॒वासो॑ अमृत॒त्वमा॑नशुः ।
ज्यो॒तीर॑था॒ अहि॑माया॒ अना॑गसो दि॒वो व॒र्ष्माणं॑ वसते स्व॒स्तये॑
sa̱mrājo̱ ye su̱vṛdho̍ ya̱jñamā̍ya̱yurapa̍rihvṛtā dadhi̱re di̱vi kṣaya̍m |
tām̐ ā vi̍vāsa̱ nama̍sā suvṛ̱ktibhi̍rma̱ho ā̍di̱tyām̐ adi̍tiṃ sva̱staye̍
||5||स॒म्राजो॒ ये सु॒वृधो॑ य॒ज्ञमा॑य॒युरप॑रिह्वृता दधि॒रे दि॒वि क्षय॑म् ।
ताँ आ वि॑वास॒ नम॑सा सुवृ॒क्तिभि॑र्म॒हो आ॑दि॒त्याँ अदि॑तिं स्व॒स्तये॑
ko va̱: stoma̍ṃ rādhati̱ yaṃ jujo̍ṣatha̱ viśve̍ devāso manuṣo̱ yati̱ ṣṭhana̍ |
ko vo̍'dhva̱raṃ tu̍vijātā̱ ara̍ṃ kara̱dyo na̱: parṣa̱datyaṃha̍: sva̱staye̍
||6||को व॒: स्तोमं॑ राधति॒ यं जुजो॑षथ॒ विश्वे॑ देवासो मनुषो॒ यति॒ ष्ठन॑ ।
को वो॑ऽध्व॒रं तु॑विजाता॒ अरं॑ कर॒द्यो न॒: पर्ष॒दत्यंह॑: स्व॒स्तये॑
yebhyo̱ hotrā̍ṃ pratha̱māmā̍ye̱je manu̱: sami̍ddhāgni̱rmana̍sā sa̱pta hotṛ̍bhiḥ |
ta ā̍dityā̱ abha̍ya̱ṃ śarma̍ yacchata su̱gā na̍: karta su̱pathā̍ sva̱staye̍
||7||येभ्यो॒ होत्रां॑ प्रथ॒मामा॑ये॒जे मनु॒: समि॑द्धाग्नि॒र्मन॑सा स॒प्त होतृ॑भिः ।
त आ॑दित्या॒ अभ॑यं॒ शर्म॑ यच्छत सु॒गा न॑: कर्त सु॒पथा॑ स्व॒स्तये॑
ya īśi̍re̱ bhuva̍nasya̱ prace̍taso̱ viśva̍sya sthā̱turjaga̍taśca̱ manta̍vaḥ |
te na̍: kṛ̱tādakṛ̍tā̱dena̍sa̱sparya̱dyā de̍vāsaḥ pipṛtā sva̱staye̍
||8||य ईशि॑रे॒ भुव॑नस्य॒ प्रचे॑तसो॒ विश्व॑स्य स्था॒तुर्जग॑तश्च॒ मन्त॑वः ।
ते न॑: कृ॒तादकृ॑ता॒देन॑स॒स्पर्य॒द्या दे॑वासः पिपृता स्व॒स्तये॑
bhare̱ṣvindra̍ṃ su̱hava̍ṃ havāmaheṃ'ho̱muca̍ṃ su̱kṛta̱ṃ daivya̱ṃ jana̍m |
a̱gniṃ mi̱traṃ varu̍ṇaṃ sā̱taye̱ bhaga̱ṃ dyāvā̍pṛthi̱vī ma̱ruta̍: sva̱staye̍
||9||भरे॒ष्विन्द्रं॑ सु॒हवं॑ हवामहेंऽहो॒मुचं॑ सु॒कृतं॒ दैव्यं॒ जन॑म् ।
अ॒ग्निं मि॒त्रं वरु॑णं सा॒तये॒ भगं॒ द्यावा॑पृथि॒वी म॒रुत॑: स्व॒स्तये॑
su̱trāmā̍ṇaṃ pṛthi̱vīṃ dyāma̍ne̱hasa̍ṃ su̱śarmā̍ṇa̱madi̍tiṃ su̱praṇī̍tim |
daivī̱ṃ nāva̍ṃ svari̱trāmanā̍gasa̱masra̍vantī̱mā ru̍hemā sva̱staye̍
||10||सु॒त्रामा॑णं पृथि॒वीं द्याम॑ने॒हसं॑ सु॒शर्मा॑ण॒मदि॑तिं सु॒प्रणी॑तिम् ।
दैवीं॒ नावं॑ स्वरि॒त्रामना॑गस॒मस्र॑वन्ती॒मा रु॑हेमा स्व॒स्तये॑
viśve̍ yajatrā̱ adhi̍ vocato̱taye̱ trāya̍dhvaṃ no du̱revā̍yā abhi̱hruta̍: |
sa̱tyayā̍ vo de̱vahū̍tyā huvema śṛṇva̱to de̍vā̱ ava̍se sva̱staye̍
||11||विश्वे॑ यजत्रा॒ अधि॑ वोचतो॒तये॒ त्राय॑ध्वं नो दु॒रेवा॑या अभि॒ह्रुत॑: ।
स॒त्यया॑ वो दे॒वहू॑त्या हुवेम शृण्व॒तो दे॑वा॒ अव॑से स्व॒स्तये॑
apāmī̍vā̱mapa̱ viśvā̱manā̍huti̱mapārā̍tiṃ durvi̱datrā̍maghāya̱taḥ |
ā̱re de̍vā̱ dveṣo̍ a̱smadyu̍yotano̱ru ṇa̱: śarma̍ yacchatā sva̱staye̍
||12||अपामी॑वा॒मप॒ विश्वा॒मना॑हुति॒मपारा॑तिं दुर्वि॒दत्रा॑मघाय॒तः ।
आ॒रे दे॑वा॒ द्वेषो॑ अ॒स्मद्यु॑योतनो॒रु ण॒: शर्म॑ यच्छता स्व॒स्तये॑
ari̍ṣṭa̱: sa marto̱ viśva̍ edhate̱ pra pra̱jābhi̍rjāyate̱ dharma̍ṇa̱spari̍ |
yamā̍dityāso̱ naya̍thā sunī̱tibhi̱rati̱ viśvā̍ni duri̱tā sva̱staye̍
||13||अरि॑ष्ट॒: स मर्तो॒ विश्व॑ एधते॒ प्र प्र॒जाभि॑र्जायते॒ धर्म॑ण॒स्परि॑ ।
यमा॑दित्यासो॒ नय॑था सुनी॒तिभि॒रति॒ विश्वा॑नि दुरि॒ता स्व॒स्तये॑
yaṃ de̍vā̱so'va̍tha̱ vāja̍sātau̱ yaṃ śūra̍sātā maruto hi̱te dhane̍ |
prā̱ta̱ryāvā̍ṇa̱ṃ ratha̍mindra sāna̱simari̍ṣyanta̱mā ru̍hemā sva̱staye̍
||14||यं दे॑वा॒सोऽव॑थ॒ वाज॑सातौ॒ यं शूर॑साता मरुतो हि॒ते धने॑ ।
प्रा॒त॒र्यावा॑णं॒ रथ॑मिन्द्र सान॒सिमरि॑ष्यन्त॒मा रु॑हेमा स्व॒स्तये॑
sva̱sti na̍: pa̱thyā̍su̱ dhanva̍su sva̱stya1psu vṛ̱jane̱ sva̍rvati |
sva̱sti na̍: putrakṛ̱theṣu̱ yoni̍ṣu sva̱sti rā̱ye ma̍ruto dadhātana
||15||स्व॒स्ति न॑: प॒थ्या॑सु॒ धन्व॑सु स्व॒स्त्य१प्सु वृ॒जने॒ स्व॑र्वति ।
स्व॒स्ति न॑: पुत्रकृ॒थेषु॒ योनि॑षु स्व॒स्ति रा॒ये म॑रुतो दधातन
sva̱stiriddhi prapa̍the̱ śreṣṭhā̱ rekṇa̍svatya̱bhi yā vā̱mameti̍ |
sā no̍ a̱mā so ara̍ṇe̱ ni pā̍tu svāve̱śā bha̍vatu de̱vago̍pā
||16||स्व॒स्तिरिद्धि प्रप॑थे॒ श्रेष्ठा॒ रेक्ण॑स्वत्य॒भि या वा॒ममेति॑ ।
सा नो॑ अ॒मा सो अर॑णे॒ नि पा॑तु स्वावे॒शा भ॑वतु दे॒वगो॑पा
e̱vā pla̱teḥ sū̱nura̍vīvṛdhadvo̱ viśva̍ ādityā adite manī̱ṣī |
ī̱śā̱nāso̱ naro̱ ama̍rtye̱nā'stā̍vi̱ jano̍ di̱vyo gaye̍na
||17||ए॒वा प्ल॒तेः सू॒नुर॑वीवृधद्वो॒ विश्व॑ आदित्या अदिते मनी॒षी ।
ई॒शा॒नासो॒ नरो॒ अम॑र्त्ये॒नाऽस्ता॑वि॒ जनो॑ दि॒व्यो गये॑न