Study
- Anukramaṇī
- Source
7 śakapūto nārmedhaḥ| mitrāvaruṇau, 1 dyubhūmyaśvinaḥ| virāḍrūpā, 1 nyaṅkusāriṇī, 2,6 prastārapaṃktiḥ, 7 mahāsatobṛhatī|
ī̱jā̱namiddyaurgū̱rtāva̍surījā̱naṃ bhūmi̍ra̱bhi pra̍bhū̱ṣaṇi̍ |
ī̱jā̱naṃ de̱vāva̱śvinā̍va̱bhi su̱mnaira̍vardhatām
||1||ई॒जा॒नमिद्द्यौर्गू॒र्ताव॑सुरीजा॒नं भूमि॑र॒भि प्र॑भू॒षणि॑ ।
ई॒जा॒नं दे॒वाव॒श्विना॑व॒भि सु॒म्नैर॑वर्धताम्
tā vā̍ṃ mitrāvaruṇā dhāra̱yatkṣi̍tī suṣu̱mneṣi̍ta̱tvatā̍ yajāmasi |
yu̱voḥ krā̱ṇāya̍ sa̱khyaira̱bhi ṣyā̍ma ra̱kṣasa̍:
||2||ता वां॑ मित्रावरुणा धार॒यत्क्षि॑ती सुषु॒म्नेषि॑त॒त्वता॑ यजामसि ।
यु॒वोः क्रा॒णाय॑ स॒ख्यैर॒भि ष्या॑म र॒क्षस॑:
adhā̍ ci̱nnu yaddidhi̍ṣāmahe vāma̱bhi pri̱yaṃ rekṇa̱: patya̍mānāḥ |
da̱dvām̐ vā̱ yatpuṣya̍ti̱ rekṇa̱: samvā̍ra̱nnaki̍rasya ma̱ghāni̍
||3||अधा॑ चि॒न्नु यद्दिधि॑षामहे वाम॒भि प्रि॒यं रेक्ण॒: पत्य॑मानाः ।
द॒द्वाँ वा॒ यत्पुष्य॑ति॒ रेक्ण॒: सम्वा॑र॒न्नकि॑रस्य म॒घानि॑
a̱sāva̱nyo a̍sura sūyata̱ dyaustvaṃ viśve̍ṣāṃ varuṇāsi̱ rājā̍ |
mū̱rdhā ratha̍sya cāka̱nnaitāva̱taina̍sāntaka̱dhruk
||4||अ॒साव॒न्यो अ॑सुर सूयत॒ द्यौस्त्वं विश्वे॑षां वरुणासि॒ राजा॑ ।
मू॒र्धा रथ॑स्य चाक॒न्नैताव॒तैन॑सान्तक॒ध्रुक्
a̱smintsve̱3tacchaka̍pūta̱ eno̍ hi̱te mi̱tre niga̍tānhanti vī̱rān |
a̱vorvā̱ yaddhātta̱nūṣvava̍: pri̱yāsu̍ ya̱jñiyā̱svarvā̍
||5||अ॒स्मिन्त्स्वे॒३तच्छक॑पूत॒ एनो॑ हि॒ते मि॒त्रे निग॑तान्हन्ति वी॒रान् ।
अ॒वोर्वा॒ यद्धात्त॒नूष्वव॑: प्रि॒यासु॑ य॒ज्ञिया॒स्वर्वा॑
yu̱vorhi mā̱tādi̍tirvicetasā̱ dyaurna bhūmi̱: paya̍sā pupū̱tani̍ |
ava̍ pri̱yā di̍diṣṭana̱ sūro̍ ninikta ra̱śmibhi̍:
||6||यु॒वोर्हि मा॒तादि॑तिर्विचेतसा॒ द्यौर्न भूमि॒: पय॑सा पुपू॒तनि॑ ।
अव॑ प्रि॒या दि॑दिष्टन॒ सूरो॑ निनिक्त र॒श्मिभि॑:
yu̱vaṃ hya̍pna̱rājā̱vasī̍data̱ṃ tiṣṭha̱dratha̱ṃ na dhū̱rṣada̍ṃ vana̱rṣada̍m |
tā na̍: kaṇūka̱yantī̍rnṛ̱medha̍statre̱ aṃha̍saḥ su̱medha̍statre̱ aṃha̍saḥ
||7||यु॒वं ह्य॑प्न॒राजा॒वसी॑दतं॒ तिष्ठ॒द्रथं॒ न धू॒र्षदं॑ वन॒र्षद॑म् ।
ता न॑: कणूक॒यन्ती॑र्नृ॒मेध॑स्तत्रे॒ अंह॑सः सु॒मेध॑स्तत्रे॒ अंह॑सः