Study
- Anukramaṇī
- Source
5 mṛl̤īko vāsiṣṭhaḥ| agniḥ| bṛhatī, 4-5 upariṣṭājjyotiḥ, 4 jagatī vā|
sami̍ddhaści̱tsami̍dhyase de̱vebhyo̍ havyavāhana | ā̱di̱tyai ru̱drairvasu̍bhirna̱ ā ga̍hi mṛl̤ī̱kāya̍ na̱ ā ga̍hi
||1||समि॑द्धश्चि॒त्समि॑ध्यसे दे॒वेभ्यो॑ हव्यवाहन । आ॒दि॒त्यै रु॒द्रैर्वसु॑भिर्न॒ आ ग॑हि मृळी॒काय॑ न॒ आ ग॑हि
i̱maṃ ya̱jñami̱daṃ vaco̍ jujuṣā̱ṇa u̱pāga̍hi | martā̍sastvā samidhāna havāmahe mṛl̤ī̱kāya̍ havāmahe
||2||इ॒मं य॒ज्ञमि॒दं वचो॑ जुजुषा॒ण उ॒पाग॑हि । मर्ता॑सस्त्वा समिधान हवामहे मृळी॒काय॑ हवामहे
tvāmu̍ jā̱tave̍dasaṃ vi̱śvavā̍raṃ gṛṇe dhi̱yā | agne̍ de̱vām̐ ā va̍ha naḥ pri̱yavra̍tānmṛl̤ī̱kāya̍ pri̱yavra̍tān
||3||त्वामु॑ जा॒तवे॑दसं वि॒श्ववा॑रं गृणे धि॒या । अग्ने॑ दे॒वाँ आ व॑ह नः प्रि॒यव्र॑तान्मृळी॒काय॑ प्रि॒यव्र॑तान्
a̱gnirde̱vo de̱vānā̍mabhavatpu̱rohi̍to̱'gniṃ ma̍nu̱ṣyā̱3 ṛṣa̍ya̱: samī̍dhire |
a̱gniṃ ma̱ho dhana̍sātāva̱haṃ hu̍ve mṛl̤ī̱kaṃ dhana̍sātaye
||4||अ॒ग्निर्दे॒वो दे॒वाना॑मभवत्पु॒रोहि॑तो॒ऽग्निं म॑नु॒ष्या॒३ ऋष॑य॒: समी॑धिरे ।
अ॒ग्निं म॒हो धन॑साताव॒हं हु॑वे मृळी॒कं धन॑सातये
a̱gniratri̍ṃ bha̱radvā̍ja̱ṃ gavi̍ṣṭhira̱ṃ prāva̍nna̱: kaṇva̍ṃ tra̱sada̍syumāha̱ve |
a̱gniṃ vasi̍ṣṭho havate pu̱rohi̍to mṛl̤ī̱kāya̍ pu̱rohi̍taḥ
||5||अ॒ग्निरत्रिं॑ भ॒रद्वा॑जं॒ गवि॑ष्ठिरं॒ प्राव॑न्न॒: कण्वं॑ त्र॒सद॑स्युमाह॒वे ।
अ॒ग्निं वसि॑ष्ठो हवते पु॒रोहि॑तो मृळी॒काय॑ पु॒रोहि॑तः