Study
- Anukramaṇī
- Source
12 duvasyurvāndanaḥ| viśvedevāḥ| jagatī, 12 triṣṭup|
indra̱ dṛhya̍ maghava̱ntvāva̱didbhu̱ja i̱ha stu̱taḥ su̍ta̱pā bo̍dhi no vṛ̱dhe |
de̱vebhi̍rnaḥ savi̱tā prāva̍tu śru̱tamā sa̱rvatā̍ti̱madi̍tiṃ vṛṇīmahe
||1||इन्द्र॒ दृह्य॑ मघव॒न्त्वाव॒दिद्भु॒ज इ॒ह स्तु॒तः सु॑त॒पा बो॑धि नो वृ॒धे ।
दे॒वेभि॑र्नः सवि॒ता प्राव॑तु श्रु॒तमा स॒र्वता॑ति॒मदि॑तिं वृणीमहे
bharā̍ya̱ su bha̍rata bhā̱gamṛ̱tviya̱ṃ pra vā̱yave̍ śuci̱pe kra̱ndadi̍ṣṭaye |
gau̱rasya̱ yaḥ paya̍saḥ pī̱timā̍na̱śa ā sa̱rvatā̍ti̱madi̍tiṃ vṛṇīmahe
||2||भरा॑य॒ सु भ॑रत भा॒गमृ॒त्वियं॒ प्र वा॒यवे॑ शुचि॒पे क्र॒न्ददि॑ष्टये ।
गौ॒रस्य॒ यः पय॑सः पी॒तिमा॑न॒श आ स॒र्वता॑ति॒मदि॑तिं वृणीमहे
ā no̍ de̱vaḥ sa̍vi̱tā sā̍viṣa̱dvaya̍ ṛjūya̱te yaja̍mānāya sunva̱te |
yathā̍ de̱vānpra̍ti̱bhūṣe̍ma pāka̱vadā sa̱rvatā̍ti̱madi̍tiṃ vṛṇīmahe
||3||आ नो॑ दे॒वः स॑वि॒ता सा॑विष॒द्वय॑ ऋजूय॒ते यज॑मानाय सुन्व॒ते ।
यथा॑ दे॒वान्प्र॑ति॒भूषे॑म पाक॒वदा स॒र्वता॑ति॒मदि॑तिं वृणीमहे
indro̍ a̱sme su̱manā̍ astu vi̱śvahā̱ rājā̱ soma̍: suvi̱tasyādhye̍tu naḥ |
yathā̍yathā mi̱tradhi̍tāni saṃda̱dhurā sa̱rvatā̍ti̱madi̍tiṃ vṛṇīmahe
||4||इन्द्रो॑ अ॒स्मे सु॒मना॑ अस्तु वि॒श्वहा॒ राजा॒ सोम॑: सुवि॒तस्याध्ये॑तु नः ।
यथा॑यथा मि॒त्रधि॑तानि संद॒धुरा स॒र्वता॑ति॒मदि॑तिं वृणीमहे
indra̍ u̱kthena̱ śava̍sā̱ paru̍rdadhe̱ bṛha̍spate pratarī̱tāsyāyu̍ṣaḥ |
ya̱jño manu̱: prama̍tirnaḥ pi̱tā hi ka̱mā sa̱rvatā̍ti̱madi̍tiṃ vṛṇīmahe
||5||इन्द्र॑ उ॒क्थेन॒ शव॑सा॒ परु॑र्दधे॒ बृह॑स्पते प्रतरी॒तास्यायु॑षः ।
य॒ज्ञो मनु॒: प्रम॑तिर्नः पि॒ता हि क॒मा स॒र्वता॑ति॒मदि॑तिं वृणीमहे
indra̍sya̱ nu sukṛ̍ta̱ṃ daivya̱ṃ saho̱'gnirgṛ̱he ja̍ri̱tā medhi̍raḥ ka̱viḥ |
ya̱jñaśca̍ bhūdvi̱dathe̱ cāru̱ranta̍ma̱ ā sa̱rvatā̍ti̱madi̍tiṃ vṛṇīmahe
||6||इन्द्र॑स्य॒ नु सुकृ॑तं॒ दैव्यं॒ सहो॒ऽग्निर्गृ॒हे ज॑रि॒ता मेधि॑रः क॒विः ।
य॒ज्ञश्च॑ भूद्वि॒दथे॒ चारु॒रन्त॑म॒ आ स॒र्वता॑ति॒मदि॑तिं वृणीमहे
na vo̱ guhā̍ cakṛma̱ bhūri̍ duṣkṛ̱taṃ nāviṣṭya̍ṃ vasavo deva̱hel̤a̍nam |
māki̍rno devā̱ anṛ̍tasya̱ varpa̍sa̱ ā sa̱rvatā̍ti̱madi̍tiṃ vṛṇīmahe
||7||न वो॒ गुहा॑ चकृम॒ भूरि॑ दुष्कृ॒तं नाविष्ट्यं॑ वसवो देव॒हेळ॑नम् ।
माकि॑र्नो देवा॒ अनृ॑तस्य॒ वर्प॑स॒ आ स॒र्वता॑ति॒मदि॑तिं वृणीमहे
apāmī̍vāṃ savi̱tā sā̍viṣa̱nnya1gvarī̍ya̱ idapa̍ sedha̱ntvadra̍yaḥ |
grāvā̱ yatra̍ madhu̱ṣudu̱cyate̍ bṛ̱hadā sa̱rvatā̍ti̱madi̍tiṃ vṛṇīmahe
||8||अपामी॑वां सवि॒ता सा॑विष॒न्न्य१ग्वरी॑य॒ इदप॑ सेध॒न्त्वद्र॑यः ।
ग्रावा॒ यत्र॑ मधु॒षुदु॒च्यते॑ बृ॒हदा स॒र्वता॑ति॒मदि॑तिं वृणीमहे
ū̱rdhvo grāvā̍ vasavo'stu so̱tari̱ viśvā̱ dveṣā̍ṃsi sanu̱taryu̍yota |
sa no̍ de̱vaḥ sa̍vi̱tā pā̱yurīḍya̱ ā sa̱rvatā̍ti̱madi̍tiṃ vṛṇīmahe
||9||ऊ॒र्ध्वो ग्रावा॑ वसवोऽस्तु सो॒तरि॒ विश्वा॒ द्वेषां॑सि सनु॒तर्यु॑योत ।
स नो॑ दे॒वः स॑वि॒ता पा॒युरीड्य॒ आ स॒र्वता॑ति॒मदि॑तिं वृणीमहे
ūrja̍ṃ gāvo̱ yava̍se̱ pīvo̍ attana ṛ̱tasya̱ yāḥ sada̍ne̱ kośe̍ a̱ṅgdhve |
ta̱nūre̱va ta̱nvo̍ astu bheṣa̱jamā sa̱rvatā̍ti̱madi̍tiṃ vṛṇīmahe
||10||ऊर्जं॑ गावो॒ यव॑से॒ पीवो॑ अत्तन ऋ॒तस्य॒ याः सद॑ने॒ कोशे॑ अ॒ङ्ग्ध्वे ।
त॒नूरे॒व त॒न्वो॑ अस्तु भेष॒जमा स॒र्वता॑ति॒मदि॑तिं वृणीमहे
kra̱tu̱prāvā̍ jari̱tā śaśva̍tā̱mava̱ indra̱ idbha̱drā prama̍tiḥ su̱tāva̍tām |
pū̱rṇamūdha̍rdi̱vyaṃ yasya̍ si̱ktaya̱ ā sa̱rvatā̍ti̱madi̍tiṃ vṛṇīmahe
||11||क्र॒तु॒प्रावा॑ जरि॒ता शश्व॑ता॒मव॒ इन्द्र॒ इद्भ॒द्रा प्रम॑तिः सु॒ताव॑ताम् ।
पू॒र्णमूध॑र्दि॒व्यं यस्य॑ सि॒क्तय॒ आ स॒र्वता॑ति॒मदि॑तिं वृणीमहे
ci̱traste̍ bhā̱nuḥ kra̍tu̱prā a̍bhi̱ṣṭiḥ santi̱ spṛdho̍ jaraṇi̱prā adhṛ̍ṣṭāḥ |
raji̍ṣṭhayā̱ rajyā̍ pa̱śva ā gostūtū̍rṣati̱ paryagra̍ṃ duva̱syuḥ
||12||चि॒त्रस्ते॑ भा॒नुः क्र॑तु॒प्रा अ॑भि॒ष्टिः सन्ति॒ स्पृधो॑ जरणि॒प्रा अधृ॑ष्टाः ।
रजि॑ष्ठया॒ रज्या॑ प॒श्व आ गोस्तूतू॑र्षति॒ पर्यग्रं॑ दुव॒स्युः